MATIUS 21 - Tanou Moonsoi Timugon

Inurumat toojo i Jisus sumubol ra bandar Jirusalim

¹ Paat ri Jisus am maamaya'-maamaya' Nano makaimpal ra Jirusalim, apit ilo galing ra pamagunan Bitpagi, giu' ra Bulur Jaitun. Giu' no nanusub i Jisus ruo ngaulun maamaya' sumigulu risilo

² am pambilin, “Ongoi kano ra pamagunan no am makakito kau sanginan kaladai pinarukug am anak nano soroi minumbir. Bugali' am ibito' karuruo Raki'.

³ Amon ru mokoondo' ulun mangkuot, balai' ulun no, ‘Tuhan makapakuan ragitio,’ am polosoon ru ulun no paibiti'.”

⁴ Gitio masauk, maa' raginio masauk boo pambalaan ru nabi,

⁵ “Balai' mamagun ru bandar Sion, ilai' raja' mino matong ra raino ti rirun. Io no minggana' guang am siminakoi ra kaladai, am ra sanginan anak kaladai ondo' mamulok.”

⁶ Ruo ngaulun maamaya' ni pana ugar am baalo' nilo bala' ri Jisus risilo.

⁷ Ibito' nilo kaladai i am anak nano am apini' nilo bakulung ru kaladai-kaladai no ra sukub nilo i, am sakoi i Jisus.

⁸ Ulun masuang napabanta' ra sukub nilono ra ralan, am mokoondo' niayuk ulun-ulun ra bokon napabanta' ra raan ondo' inindaanan nilo i.

⁹ Ulun masuang ondo' minugar siminigulu am timinauli ri Jisus i, tumalimpuun ilo mompogolok, “Omporo' Anak ru raja' Daut! Kabarakat noyo Io ondo' minatong ralalom inggalan ru Tuhan. Omporo' noyo i Aki Kapuuno' Ondo' Masawat Kaga'!”

¹⁰ Paat ri Jisus sumubol ra bandar Jirusalim, ngaangai' minayan ra bandar ni nakatigog am sauta'-uta' ayuk. “Osoi kia Io ti?” ragu nilo.

¹¹ Taam ulun-ulun siminunu' ri Jisus no, “Gitio noyo nabi Jisus, intor ra pekan Nasarit, libung ru Galilia.”

Sumubol i Jisus ra Baloi Tuhan

¹² Subol i Jisus ra Baloi Tuhan am pagiruo' no ngaangai' mantalan am mambali ondo' soroi ra giu'. Tuntuaro' no mija' ru magagalig ra ruit am niayuk pantuturungan ru mantatalan ra susuit asang.

¹³ Indagu i Jisus risilo, “Mokoondo' tinulisan ra Buuk Kitab ra i Aki Kapuuno' minindagu, ‘Baloi Kuno inggalanin ra intok pakiasian.’ Kaa' raino baalon min ra pansibunian ru mantatakou!”

¹⁴ Kukula' ngaulun bolou am pakira' riminatong ri Jisus giu' ra Baloi Tuhan am binabas ilo ri Jisus.

¹⁵ Tingganai imam Jaudi am mangingila' ra Ukum ri Musa siminangit paat ra ilo nakakito ra kaimuagan-kaimuagan ondo' binaal ri Jisus. Ilo niayuk siminangit nokorongog ra lalaing-lalaing nompogolok ra Baloi Tuhan, “Koompor noyo Anak ru raja' Daut!”

¹⁶ Konilo ri Jisus, “Makaining kou ra atan sinabit nilono?” “Iou, makaining Aku,” taam i Jisus. “Kalo kia igondo' kau pambasa' tayar ru Buuk Kitab ragitio? ‘Lalaing am lalagang inila' Mu noyo mongompor ra matanda'.’ ”

¹⁷ Iruani' ri Jisus ilo am ingkual ra bandar am ongoi ra Bitania am nombolong ra giu'.

Nagibot i Jisus ra sampuun ara

¹⁸ Paat ra tumawang ra susuab, sumaguli' i Jisus am maamaya' Nano ra bandar. Tatanga' ilo nangkiralan nalimanan ri Jisus naitilan.

¹⁹ Kiing ru ralan binayaan nilo mokoondo' sampuun ara timinuu'. Ongoi Io ra puun ru ara i, kaa' rondo' kawa' pana kolondo' nakito nano, raun ru ara ayuk soroi. Pagibot i Jisus ra puun ru ara ni, “Kalo boo mangkawa' kou ra sabuoi-buoi no!” Lonot pamulali' puun ara ni.

²⁰ Paat ra maamaya'-maamaya' Nano nakakito ra atan binaal ri Jisus ni, nakatigog ilo. “Ati koson puun ara ni namulali' minatoi?” kuot nilo.

²¹ “Karaa' min,” taam ri Jisus, “Amon ru mangintopot kau am kalo pagantangan guang, makabaal kau ra atan ondo' binaal Kuno ra puun ru ara ni. Sala' ka ginio ayuk, kaa' maindaguan min bulur ti, ‘Kakat no am patir no giu' ra raat!’ Baal raginio pana masauk.

²² Amon ru mangintopot kau Raki', atan ayuk kitaakon min ra akau makiasi', makaalap kau.”

Pangkuatan ra kuasa' ri Jisus

²³ I Jisus siminaguli' boo ra Baloi Tuhan. Paat ra Io nangila', tingganai imam Jaudi am tingganai ru ulun ru Jaudi ratong Riso am pangkuot, “Atan kia ra kuasa' Muno mambaal ra ngaangai' ragitio? Osoi nangani' Rirun ra kuasa' ragitio?”

²⁴ Taam i Jisus, “Mangkuot Aku niayuk ramuyun. Amon ru mataam min, bagu no mambala' Aku kuasa' ra atan Aku makapambaal raginio.

²⁵ I Juanis Mampariu' kuasa' ru osoi? I Aki Kapuuno' kia kapoam ulun?” Tingganai imam Jaudi am tingganai ru ulun ru Jaudi tumalimpuun mindagu ra ilo ayuk ngaangai', “Amon ru balain takau, ‘Kuasa' ri Aki Kapuuno',’ maaru' tumaam Io, ‘Amon ru i Aki Kapuuno', kua pai' kau pangintopot riso?’

²⁶ Kaa' amon ru balain takau, ‘Kuasa' ru ulun,’ malaa' takau ra ulun masuang ti, sabap ra ilo ngaangai' ti mangkara' ra i Juanis i sangulun nabi.”

²⁷ Ginio ra taam ilo, “Kalo makapandai akai.” Indagu i Jisus risilo, “Amon ru koson raginio, Aku pana kalo mambala' ramuyun ra kuasa' ru atan Aku makapambaal raginio.”

Abig ra ruo ngaulun anak

²⁸ “Raino ti ati kulaan pamaguangan min ra baal ragitio?” ragu ri Jisus poyo. “Mokoondo' sangulun ama' ondo' mokoondo' ruo anak ungkuyon. Ama' ti panusub ra katuaan ti, ‘Ongoi no pangandoi ra umo ru anggur ra orou raiti'.’

²⁹ ‘Marara' aku,’ taam ru anak ni. Kaa' kabuoi raginio pampaguang io saguli' am ongoi pangandoi ra umo i.

³⁰ Ama' ti pana ongoi boo ra anak pupusan am indagu, ‘Ongoi no pangandoi ra umo ru anggur ra orou raiti'.’ Taam anak pupusan ni, ‘Iou, ama',’ kaa' kalo minongoi io pangandoi.

³¹ Ilai', intor ra karuo anak ti, ati kia nangimaya' ra panusuban ru ama' ni?” “Katuaan ni,” taam ru tingganai imam Jaudi am tingganai ru ulun ru Jaudi no. Indagu i Jisus risilo, “Pangintopot no! Mampalulur ra cukai am ruandu' mantalan ra inan makasigulu masauk ra ulun ri Aki Kapuuno' intor ramuyun.

³² Sabap ra i Juanis Mampariu' minatong manulu' ramuyun ra kaayagan motopot ondo' kasagaan ri Aki Kapuuno'. Akau kalo nangintopot ra pangilaan nali; kaa' mampalulur ra cukai am ilo ruandu' mantalan ra inan mangintopot riso. Kabalu' pana nakito min ngaangai' ti, kaa' kalo niayuk timinalikur kau am mangintopot ri Aki Kapuuno'.”

Abig ra ulun-ulun ondo' naniwa' ra umo ru anggur

³³ “Rongogo' poyo rondo' abig ragitio,” ragu ri Jisus. “Mokoondo' sangulun langkaya' ondo' nantanom ra umo ru anggur. Liputo' no ra insor am pangkali io ra rondo' luang ra batu maayo, pamagaan ra anggur am niayuk nambaal io ra manara masawat pagimpalan. Pasiwai' no boo umo ru anggur i ra kukula' ngaulun, am ongoi io ra pagun ru bokon.

³⁴ Kasuku' orou ra mangkumos, tatangan ra umo i nanusub ra kukula' ngaulun ulipon nano mongoi ra ulun-ulun naniwa' i, koson mongoi pangapu ra tayar nali intor ra ulun-ulun naniwa' i.

³⁵ Kaa' rokopo' nilo ulipon ru tatangan ra umo i. Sangulun i linamba' nilo, ondo' bokon i pinatoi nilo am bokon binobol nilo ra batu.

³⁶ Tatangan ra umo i nanusub poyo ra ulipon nali, masuang poyo intor ra ondo' minongoi ra kasaa' ni. Kaa' ilo ngaangai' jinamaran niayuk nogondo' ra kasaa' ni.

³⁷ Pupus no tatangan ra umo ni, nanusub io ra anak nano galama' minongoi. ‘Maaru' anak kutu urumaton nilo,’ ra pamaguangan nano.

³⁸ Kaa' paat ra ulun-ulun naniwa' i nakakito ra anak ru tatangan ra umo ti, pagindagu ilo ngaangai', ‘Io gitio anak ru tatangan ra umo ti. Ibok, potoyo' takau io, maa' raginio makaalap takau ra tungkuson nano!’

³⁹ Ginio ra rokopo' nilo io am ralaato' paingkualo' intor ra umo i, am potoyo'.”

⁴⁰ Pangkuot i Jisus, “Amon ru tatangan ra umo ru anggur ti matong, atan alapon no ra ulun-ulun naniwa' i?”

⁴¹ Taam ilo, “Maaru' potoyon no ngaangai' ulun malaat i, am pasiwain no boo umo ru anggur nano ra ulun bokon ondo' masaga' mantayar ra nakumos i paat masuku' orou pantayaran.”

⁴² Indagu i Jisus risilo, “Kalo poyo kia igondo' kau nakabasa' ra atan tinulisan ra Buuk Kitab? ‘Batu ondo' kinara' ru ulun-ulun manambaloi ra kolondo' onong nasauk ra batu maatang kaga'. Gitio noyo binaal ru Tuhan; mumpara' boo bonsoi no!’ ”

⁴³ “Karaa' min,” ragu ri Jisus, “Barakat ru Pamarintaan ri Aki Kapuuno' alapon intor ramuyun am pataakin ra bansa' ondo' gumagaya' ra panusuban ri Aki Kapuuno'.” [

⁴⁴ Osoi ayuk maratu' am makaingku' ra batu raginio matutuk; am amon ru batu ti makatiu' ra sasangulun, io no ligison ru batu no saboi saukon ra kaau.]

⁴⁵ Paat ra tingganai imam Jaudi am ulun-ulun ru Parisi nokorongog ra abig ri Jisus ni, mapandayan nilo ra ilo kon ri Jisus ni.

⁴⁶ Ginio ra ilo ti mirot toojo mamparakop ri Jisus, kaa' malaa' ilo ra ulun masuang i sabap ra ilo mangkara' i Jisus ti sangulun nabi.