MATIUS 19 - Tanou Moonsoi Timugon

Pangilaan ri Jisus ra pangalian

¹ Karagu ayuk ri Jisus baal raginio, iruani' No Galilia ti am ongoi ra libung ru Judia giu' ra sandaup ru Sungoi Jordan.

² Masuang ulun minaya' Riso am babaso' No ulun-ulun mangarualan ra giu' i.

³ Kukula' ngaulun ru Parisi minatong koson mangkinam ri Jisus ralalom pangkuatan. Konilo, “Sumugut ra Ukum ri Musa, iowon kia sangulun mangali ra andu' nano maya' ra kasagaan nano galama'?”

⁴ Taam i Jisus, “Kalo kia nakabasa' kau ra Buuk Kitab ra Io ondo' nambaal ra ngaangai' ulun ti, intor poyo ra talimpuun ru tana' ti, nampasauk risilo ra ungkuyon am ruandu'?

⁵ I Aki Kapuuno' pana mindagu, ‘Anak ungkuyon mangiruan ra ama' am ina' nano mongoi simpung ra andu' nano am ilo ti masauk rondo'.’

⁶ Ilo ti sala' ka ruo kaa' rondo', am ilo ondo' kinorondo' ri Aki Kapuuno', pai' ilo no patuliaron ru ulun.”

⁷ Pangkuot poyo ulun-ulun ru Parisi Riso, “Amon ru koson raginio, kua ra Ukum ri Musa mangiou ra sangulun mangali ra andu' nano amon ru nanulis io galing ra surat pangalian.”

⁸ Taam i Jisus, “Nabi Musa nambaal koson raginio sabap ra akau ti mokotog ulu, kaa' sotopot no sala' ka koson raginio paat ra talimpuun ru tana' ti.

⁹ Balain takamin: Osoi ayuk mangali ra andu' nano kabalu' pana andu' nano kalo igondo' lapau, am manangandu' ungkuyon ti ra bokon, ungkuyon no niayuk lumapau.”

¹⁰ Maamaya'-maamaya' ri Jisus pana indagu boo Riso, “Amon ru koson raginio baal nano, moonsoi poyo kalo manangandu'.”

¹¹ Taam poyo i Jisus, “Ragu raginio sala' ka patuluon ra ngaangai' ulun kaa' ulun ondo' inaru' ri Aki Kapuuno' ayuk.

¹² Mokoondo' niayuk ulun ra kalo makapaguot ra io inanak koson raginio. Mokoondo' ulun kalo makapaguot ra io ti naintalian, am mokoondo' niayuk kalo maguot sabap ra io ti mangandoi ayuk ri Aki Kapuuno'. Osoi makaapu ra pangilaan ragitio moonsoi sumugut io.”

Nambarakat i Jisus ra kukula' ngaulun lalaing

¹³ Mokoondo' kukula' ngaulun nagibit ra lalaing paumaan ri Jisus. Makitaak ilo ra papuyayon No kalindu' Nano ra ulu ru lalaing ti am makiasi'. Kaa' maamaya' ri Jisus ti siminangit risilo.

¹⁴ Indagu i Jisus ra maamaya'-maamaya' Nano, “Polosoo' min lalaing-lalaing no muma' Raki'! Pai' min ingai' ilo sabap ra ulun koson ragitio noyo masauk ra ulun ri Aki Kapuuno'.”

¹⁵ Pabantaa' ri Jisus kalindu' Nano ra ulu ru lalaing-lalaing i am barakato' No ilo, am ugar Io boo.

Ulun mamulok ondo' langkaya'

¹⁶ Paat ra sangarawan mokoondo' sangulun ungkuyon minuma' ri Jisus, am pangkuot, “Mangingila', baal moonsoi ra atan kia maaru' baalon koson mokoowot ra kaayagan mantilayun?”

¹⁷ Taam i Jisus, “Kua pangkuot kou Raki' ra atan moonsoi? I Aki Kapuuno' ayuk moonsoi. Amon ru masaga' kou maayag mantilayun, gagaya' no ra ukum ri Aki Kapuuno'.”

¹⁸ “Ukum ra atan?” kuot ru ulun i. Taam i Jisus, “Pai' pampatoi, pai' lapau, pai' pantakou, pai' pagabau;

¹⁹ Urumato' matuo muno; tagami' noyo ngaangai' ulun koson ra kaayagan muno galama'.”

²⁰ “Ngaangai' ukum ti ginagaya' ku noyo,” taam ru ulun mamulok i, “Atan poyo baalon kutu?”

²¹ Indagu i Jisus riso, “Amon ru masaga' kou matanda', ongoyo' talano' ngaangai' kuliamos muno am ruit no pataaki' ra ulun musikin, am okou pana makarapu' giu' ra suruga'. Mopongo raginio ibok, baya' no Raki'.”

²² Korongog no ayuk ragu raginio, ugar io am mangiluk toojo guang nano sabap ra rapu' nano masuang.

²³ I Jisus pana indagu boo ra maamaya'-maamaya' Nano, “Balain takamin: Mapagon toojo sangulun langkaya' masauk ra ulun ri Aki Kapuuno'.”

²⁴ Indagu poyo i Jisus, “Matasu' poyo sanginan unta sumubol ra luang ru jarum intor sangulun langkaya' makaumpos ra Tana' Bagu ri Aki Kapuuno'.”

²⁵ Paat ra maamaya'-maamaya' Nano nokorongog raginio, nangimuag ilo am indagu, “Amon ru koson raginio, osoi kia maalap kabayag?”

²⁶ Ponontong i Jisus risilo am indagu, “Kaayagan mantilayun ti kalo maalap ru ulun, i Aki Kapuuno' ayuk makapangani' ra kolondo' atan kon kalo mabaal Nano.”

²⁷ Taam boo i Pitrus, “Ilai',” kono, “Tinatang mai ngaangai' kasagaan mai am baya' Rirun. Atan kia balos Muno ramon?”

²⁸ Indagu i Jisus risilo, “Pangintopot ayuk. Giu' ra Tana' Bagu, Anak ru Ulun mamarinta am manturung ra takhta Nano. Paat raginio akau mopor am ruo maamaya' niayuk manturung ra takhta am mangakim ra mopor am ruo bansa' ru Israil!

²⁹ Osoi ayuk mangiruan ra baloi, kapoam pabukat no ra ungkuyon, kapoam pabukat no ra ruandu', kapoam ina' am ama', kapoam anak nano, kapoam lanau am umo nano; ulun ragitio makaalap maatus ruli' ra raino ti am niayuk aniin io ra kaayagan mantilayun.

³⁰ Kaa' masuang ulun ra maatang raino ti masauk ra kalo maatang am ondo' raino ti kalo maatang masauk ra maatang.”