MATIUS 15 - Tanou Moonsoi Timugon

Pangilaan ru kinamatuaan

¹ Kukula' ngaulun Parisi am mangingila' ra Ukum ri Musa intor ra bandar Jirusalim timinuum ri Jisus am pangkuot Riso,

² “Kua ra maamaya'-maamaya' Muno kalo gumagaya' ra pangilaan ondo' pinasaboi ru kinamatuaan takali? Paat ra mangakan kalo mambagu' ilo galing ra kalindu' maya' ra kaulayan ru ugama takau.”

³ Taam i Jisus, “Am kua pai' kau niayuk sugut ra panusuban ri Aki Kapuuno', kaa' sumugut kau ra pangilaan min galama'?

⁴ Sabap ra mokoondo' bala' ri Aki Kapuuno', ‘Urumato' noyo ama' am ina' muno, osoi ayuk mampaluta' ra ama' am ina' nano, maaru' ulun no potoyon.’

⁵ Kaa' mangila' kau ra amon ru sasangulun no mokoondo' ra kuliamos ondo' sotopot no makapangindangan ra ama' am ina' nano, kaa' mindagu boo ulun no, ‘Pinataakan ku noyo gitio ri Aki Kapuuno',’

⁶ kalo boo pana mangurumat ulun no ra ama' nano. Koson raginio noyo inimpayan min ragu ri Aki Kapuuno' am gumagaya' ra pangilaan min galama'.

⁷ Akau ulun maabau-abau! Mumpara' boo topot ru nabi Jisaya paat ra io mindagu koson ramuyun!

⁸ Ragu ri Aki Kapuuno', ‘Ulun koson raginio mongompor Raki' ra ragu nilono ayuk, kaa' sotopot no guang nilono maalur intor Raki'.

⁹ Kolondo' onong sumamba ilo Raki', sabap ra ilo mangila' ra susuban ru ulun ayuk, sala' ka pangilaan ri Aki Kapuuno'.’ ”

Baal ondo' mampajamol ra ulun

¹⁰ I Jisus pana nampiau boo ra ulun masuang am indagu risilo, “Rongogo' am aratio' noyo!

¹¹ Sala' ka atan ondo' sumubol ra ralalom kabang ru sasangulun no mampajamol riso, kaa' atan ondo' mingkual intor ra kabang, ginio noyo mampajamol riso.”

¹² Maamaya'-maamaya' ri Jisus pana minatong boo am indagu Riso, “Mangingila', makapandai Kou kia ra guang ru ulun-ulun ru Parisi no nasindualan ra ragu Muni?”

¹³ Taam i Jisus, “Moonong tatanom ondo' kalo tinanom ru Ama' Kuno giu' ra suruga' maaru' bubulon.

¹⁴ Pai' no kaimamang risilo. Ilo no tingganai ondo' noolou; am paat ra ulun bolou no mangitang ra ulun bolou, ilo karuo-ruo makasubol ra parit.”

¹⁵ Indagu i Pitrus, “Balai' akai no atan arati' ru abig raginio.”

¹⁶ Taam i Jisus, “Akau niayuk koson ra ulun ra bokon.

¹⁷ Kalo kia nakarati' kau? Atan ondo' sumubol ra kabang ru sasangulun, sumuang ra tinai' am mingkual poyo saguli' intor ra inan nano.

¹⁸ Kaa' atan ondo' mingkual intor ra kabang ru ulun no mingkual intor ra guang nano, am baal ragitio noyo mampajamol ra ulun.

¹⁹ Sabap ra intor ra guang no matong pangkaraan malaat, ondo' mangayat ra sasangulun no mamatoi, lumapau, mambaal ra makauyuyu', mantakou, magabau, am mampaluta'.

²⁰ Baal raginio noyo mampajamol ra ulun. Mangakan ra kalo mabaguan kalindu' maya' ra aturan ru ugama, kalo mangkinibit ra sasangulun no majamol!”

Pangintapatan ru sangulun ruandu'

²¹ Iruani' ri Jisus intok raginio am ongoi boo ra libung ondo' mamaar ra bandar Tirus am Sidon.

²² Mokoondo' sangulun ruandu' intor ra bansa' ru Kanaan minayan ra intok raginio. Minatong ruandu' no ri Jisus am indagu, “Tuan, Anak ru raja' Daut, pakaasi' no raki'! Anak ruandu' kuno sinubol ru riwato am makalalaa' baal nano.”

²³ Kalo tinaam io ri Jisus. Maamaya'-maamaya' Nano minatong am nakitaak Riso, “Susubo' ruandu' no muli'. Ilai' baal nano maya' ritakau. Mauta' kaga'!”

²⁴ Taam i Jisus ra ruandu' no, “Sinusub Aku mongoi ra ulun ru Israil ayuk, domba ra timinanggau.”

²⁵ Pokorongog ra ragu ri Jisus ni, ongoi ruandu' no igulatur ra saang Nano. Kono, “Indangano' aku no.”

²⁶ Kaa' taam i Jisus, “Kalo moonsoi akanon ru lalaing papatiron ra uku'!”

²⁷ “Topot tuan,” kon ru ruandu' no, “Kaa' uku' no pana mangakan niayuk ra tipopol ondo' naratu' intor ra mija' ru tuan nano.”

²⁸ Ginio ra indagu i Jisus ra ruandu' no, “Maayo toojo pangintapatan muno. Kasauk noyo rirun maya' ra kasaga' muno!” Paat ragili niayuk anak ruandu' nano nababas.

Namabas i Jisus ra ulun masuang

²⁹ Iruani' ri Jisus intok raginio am pangkiralan ra kiing ru Tasik Galilia. Pagaloi Io ra rondo' bulur am panturung.

³⁰ Masuang ulun minatong Riso nagibit ra ulun ondo' pakira', bolou, kalo makalulu', bobou, am masuang poyo ulun narualan. Ibito' nilo ulun-ulun ragitio ra saang ri Jisus am ilo ngaangai' ti binabas ri Jisus.

³¹ Ulun masuang no nangimuag paat ra ilo nakakito ra ulun bobou makaindagu, ulun ondo' kalo makalulu' nababas, ondo' pakira' makaugar toojo am ondo' bolou makakito saguli'. Omporo' nilo boo i Aki Kapuuno', Tuhan ru ulun ru Israil.

Nampaakan i Jisus ra apat ngaribu ngaulun

³² Piawo' ri Jisus maamaya'-maamaya' Nano am indagu, “Makaasi' Aku toojo ra ulun masuang ti, sabap ra kataluan noyo buoi ilo minaya' Raki', am raino ti nakayaan ilo no ra akanon. Kalo masaga' Aku mompoloso risilo muli' ra maitilan ilo, sabap ra ati lair ru mangalausan ilo tatanga' ilo mangkiralan.”

³³ Maamaya' ri Jisus no nangkuot Riso, “Ati kaalapan mai ra akanon giti ra intok masiluk ti?”

³⁴ Pangkuot i Jisus risilo, “Kula' suang ru ruti' soroi ramuyun?” “Tulu' ngampila' am kukula' ngaunor papait malumot,” konilo.

³⁵ Susubo' ri Jisus ulun masuang no mantuturung ra tana' no.

³⁶ Alapo' No tulu' ngampila' ruti' am papait no, am indagu ra paringkuanangan ri Aki Kapuuno', am tatayaro' boo akanon no am pataako' No ra maamaya'-maamaya' Nano, am tatayaro' ru maamaya' Nano ra ulun masuang no.

³⁷ Sigagama' ilo mangakan suku' naasug. Maamaya'-maamaya' Nano pana nanimung ra suwo ru ruti' am papait no am tulu' poyo ngambakul.

³⁸ Suang ru ungkuyon ondo' nangakan no apat ngaribu ngaulun, kalo poyo nakaaya' kauntob ruandu' am lalaing.

³⁹ Kopongo raginio susubo' ri Jisus ulun masuang no minuli'. Io galama' siminakoi ra parau am ongoi ra libung ru Magadan.