MATIUS 14 - Tanou Moonsoi Timugon

Pinatayan ri Juanis Mampariu'

¹ Paat ragili niayuk raja' Irodis, gabenor ru libung Galilia, nokorongog ra tanou ri Jisus.

² Indagu raja' Irodis ra tingganai-tingganai nano, “Maaru' gitio i Juanis Mampariu' i! Naayag io saguli'! Ginio ra Io mokoondo' ra kuasa' mambaal ra kaimuagan.”

³ Kukula' buoi ra nakasail i, maya' ra susuban ru raja' Irodis, i Juanis Mampariu' ti rinakop. Bangkilo' io am pasubolo' ra pangaputan. Binaal ru raja' Irodis koson raginio maya' ra kasagaan ri Irodias, andu' ri Pilipus, pongkotob ru raja' Irodis.

⁴ Sabap ra masalok i Juanis mansawai ri raja' Irodis, kono, “Kalo iowon okou manangandu' ri Irodias!”

⁵ Potoyon raan ri raja' Irodis i Juanis no kaa' malaa' io ra ulun ru Jaudi sabap ra ilo ti mangkara' ri Juanis no sangulun nabi.

⁶ Paat ra pangiantakan orou naganakan ri Irodis, anak ruandu' ri Irodias nansayau ra saang ru tambului-tambului no. Tinuyang-tuyang ri raja' Irodis lumaai riso,

⁷ saboi io minindagu, “Magibot aku rirun ra atan ayuk kitaakon muno, aniin tokou!”

⁸ Sabap ra sinusuk io ru ina' nano, indagu boo ralaa no, “Pataaki' raki' raino niayuk ulu ri Juanis Mampariu' ra rondo' talam!”

⁹ Mumpara' boo ngiluk ru guang ru raja' Irodis no, kaa' nakapagibot io no ra saang ru tambului-tambului no. Ginio ra panusub i Irodis maa' raginio bayaan kitaakon ru ralaa no.

¹⁰ Ginio ra i Juanis iningguluan ra pangaputan.

¹¹ Ibito' boo ulu no am pataaki' ra ralaa no ra rondo' talam. Ibito' poyo ru ralaa no ra ina' nano.

¹² Kopongo ragili ongoyo' boo alapo' baangkai ri Juanis no ru maamaya'-maamaya' nano am lobongo' nilo. Ilo pana ugar boo am balai' nilo i Jisus ra baal raginio.

Nampaakan i Jisus ra limo ngaribu ngaulun

¹³ Paat ri Jisus nokorongog ra tanou ri Juanis no, iruani' No intok raginio, sakoi ra parau am ongoi boo ra rondo' intok masiluk sabap ra masaga' Io misasangulun. Kaa' ulun masuang no nakapandai ra angayan Nano. Iruani' nilo pekan nilono am baya' ilo ra ralan nantana' sumunu' ri Jisus.

¹⁴ Paat i Jisus masak intor ra parau no am ilai' no masuang ulun, makaasi' Io risilo am babaso' no ulun-ulun ondo' marualan.

¹⁵ Paat ra iomamai', maamaya' ri Jisus minatong am indagu Riso, “Mangingila', mamai' noyo, am intok ragitio masiluk. Susubo' noyo ulun masuang no mugar, mongoi ra ati ayuk pamagunan am makapambali ilo ra akanon nilo galama'.”

¹⁶ Kaa' taam i Jisus, “Kalo pana paugaron ilo, akau galama' mangani' risilo ra akanon.”

¹⁷ Indagu maamaya'-maamaya' Nano, “Mokoondo' akai limo ngampila' ruti' am ruo ngaunor papait ayuk!”

¹⁸ Indagu i Jisus, “Ibito' ragiti.”

¹⁹ Io pana nanusub boo ra ulun masuang no mantuturung ra sakot no. Alapo' ri Jisus limo ngampila' ruti' am ruo ngaunor papait no. Pantingaa' Io ra limbowon am paringkuanang Io ri Aki Kapuuno'. Io pana namimilang boo ra ruti' no am pataaki' No ra maamaya'-maamaya' Nano am tatayaro' nilo ra ulun masuang no.

²⁰ Moonong ulun nakaakan am naasug. Luluro' boo ru maamaya'-maamaya' Nano suwo ru akanon i am suang no mopor am ruo ngambakul.

²¹ Suang ru ungkuyon ondo' nangakan i olo'-olo' limo ngaribu ngaulun, kalo poyo nakaaya' kauntob ruandu' am lalaing.

Minugar i Jisus ra rasawat ru timug

²² Kopongo raginio panusub i Jisus ra maamaya'-maamaya' Nano sumakoi ra parau lumaup pagulu ra tasik no. Paat raginio niayuk nanusub Io ra ulun masuang no muli'.

²³ Pakaugar boo ulun masuang no, pagaloi boo i Jisus ra rondo' bulur am pakiasi' Io. Iomamai' noyo misasangulun ayuk i Jisus ra giu' no.

²⁴ Paat ragili niayuk parau i nakalintanga' noyo ra tasik no, milimpatui boo parau no nalapos ru kinulun sabap ra magangin intor ra tampilon ra taluma'.

²⁵ Olo'-olo' lolot jam katalu am koonom iosusuab, minatong i Jisus risilo minugar ra rasawat ru timug.

²⁶ Paat ra maamaya'-maamaya' Nano nakakito ra Io minugar ra rasawat ru timug no, nalaa' ilo kaga'. “Manambung!” konilo, saboi nompogolok ra nalaa'.

²⁷ Kaa' parayus taam i Jisus, “Kaikango' noyo guang mino! Aku gitio. Pai' kalaa'!”

²⁸ I Pitrus pana indagu boo, “Tuhan, amon ru Okou ginio, susubo' aku no matong Rirun mugar ra rasawat ru timug.”

²⁹ “Ibok no,” kon ri Jisus. Tuun i Pitrus ra parau no am tumalimpuun ugar ra rasawat ru timug mongoi ri Jisus.

³⁰ Kaa' kalimani' no bagiu' mapuor no, nalaa' i Pitrus am tumalimpuun io malinjob ru timug. Pompogolok io, “Tuhan, indangano' aku!”

³¹ Paat niayuk ragili patutuyo' ri Jisus kalindu' Nano am guuto' No i Pitrus. Indagu Io, “Mumpara' boo borok ru pangintapatan muno! Kua kaimamang kou?”

³² Sakoi ilo karuo ra parau no, am angin i pana limininos.

³³ Maamaya'-maamaya' Nano ondo' soroi ra parau no siminamba ri Jisus, konilo, “Topot-topot Okou no Anak ri Aki Kapuuno'!”

Namabas i Jisus ra ulun-ulun marualan giu' ra Ginisarit

³⁴ Laup ilo ra tasik no am pakasuku' giu' ra Ginisarit.

³⁵ Ulun ra giu' no nakaulig ri Jisus. Piawo' nilo ngaangai' ulun marualan ra libung raginio am ibito' nilo ri Jisus.

³⁶ Makitaak ilo ri Jisus pokombongon ayuk ulun-ulun marualan no ra pompor ru sukub Nano. Ngaangai' boo ru ulun ondo' nakakambong ra pompor ru sukub Nano nababas.