MATIUS 12 - Tanou Moonsoi Timugon

Pangkuatan intor ra orou Sabat

¹ Kalo boo nabuoi ragili, paat rondo' orou Sabat, pansail i Jisus ra umo ru gandum. Maamaya'-maamaya' Nano naitilan, am tumalimpuun ilo mangupu' ra gandum no am akano'.

² Paat ra ulun-ulun ru Parisi nakakito raginio, konilo ri Jisus: “Ilai' noyo, maamaya'-maamaya' Muno minanggal ra Ukum ri Musa mambaal koson raginio paat ra orou Sabat!”

³ Taam i Jisus: “Kalo kia igondo' kau pambasa' atan ondo' binaal ru raja' Daut paat ra io am ulun-ulun nali naitilan?

⁴ Subol io ralalom Baloi Tuhan. Io am ulun-ulun nali pana nangakan ra ruti' ondo' pinataak noyo ri Aki Kapuuno', kabalu' pana baal raginio manggal ra Ukum ri Musa. Imam-imam ayuk ondo' makapangakan ra ruti' no.

⁵ Kapoam kalo poyo kia igondo' kau pambasa' ralalom ru Ukum ri Musa ra moonong orou Sabat, imam mangandoi ralalom Baloi Tuhan am sotopot no manggal ilo ra ukum ru orou Sabat, kaa' ilo ti kolondo' sala!

⁶ Balain takamin: Ragiti mokoondo' ondo' maatang poyo intor ra Baloi Tuhan.

⁷ Mokoondo' tinulisan ra Buuk Kitab, ‘Marara' Aku ra taak ondo' sinimbalui min kaa' masaga' Aku ra makaasi' kau ra ulun bokon.’ Amon ru nakarati' kau ra atan koson ru raguon no, maaru' kalo manguu' kau ra ulun ondo' kolondo' sala.

⁸ Sabap ra Anak ru Ulun no Tuhan ra orou Sabat.”

Ulun ondo' minatoi satata' ra longon nano

⁹ Iruani' ri Jisus intok raginio, am ongoi boo ra rondo' baloi sambayangan.

¹⁰ Giu' no mokoondo' sangulun ondo' longon ra satata' nano minatoi. Kaa' mokoondo' niayuk kukula' ngaulun masaga' manguu' ri Jisus ra baal masala. Pangkuot ilo ri Jisus, “Mamabas ra ulun paat ra orou Sabat ti manggal kia ra Ukum ri Musa no?”

¹¹ Taam i Jisus, “Ati kulaan no amon ru sangulun intor ramuyun mokoondo' sanginan domba ondo' naratu' ralalom ru luang paat ra orou Sabat? Sala' ka kia guuton am paingkualon min io intor ra luang no?

¹² Ulun mologo kaga' intor ra domba! Ginio ra Ukum ri Musa no makataak ritakau mangindangan ra sasangulun paat ra orou Sabat.”

¹³ Indagu boo i Jisus ra ulun no, “Patutuyo' longon muno.” Patutuyo' no boo longon nano, am kapali' boo koson ra longon no ra sapapa' no.

¹⁴ Kaa' ulun ru Parisi i nangiruan ra intok raginio, am maguyum ra panguyatan koson mamatoi ri Jisus.

Ulun sinusub ondo' pinili' ri Aki Kapuuno'

¹⁵ Paat ri Jisus nakatutun ra panguyatan mamatoi Riso, ugar Io intor ra intok raginio; am masuang ulun ondo' minaya' Riso. Namabas Io ra ngaangai' ulun ondo' marualan,

¹⁶ am nanusub risilo kalo mambala' ra tanou no ra ulun bokon.

¹⁷ Binaal No koson raginio maa' raginio masauk boo ragu ri Aki Kapuuno' ondo' pinasaboi ri nabi Jisaya:

¹⁸ “Gitio noyo ulipon Kutu ondo' pinili' Kutu, sangulun ondo' tagamin Kuno am mapakatasu' ra guang Kuno. Pataakin Ku Ambiluo Kuno Riso, am mampatanou Io ra ngaangai' bansa' ra Aku ti motopot.

¹⁹ Kalo maansang-ansang kapoam gumolok Io, kapoam ngunguak Io ra ralan pansailan ru ulun.

²⁰ Kalo mangangambai Io kalamio' ulun kolondo' lulu'. Mangandoi Io saboi katimpakan no manguasa' ra ati ayuk

²¹ am ngaangai' bansa' malansan Riso.”

I Jisus am i Biiljibul

²² Kukula' ngaulun nagibit boo ra sangulun bolou am bobou sabap ra sinubol ru riwato no ri Jisus. Binabas ri Jisus ulun no suku' io makaindagu am makakito.

²³ Ngaangai' ulun nangimuag. Pangkuot ilo, “Maaru' lair Io ti Anak ru raja' Daut ondo' pinili' i?”

²⁴ Paat ra ulun-ulun ru Parisi nokorongog ragitio, taam ilo, “Mampagiru' Io ra riwato sabap ra inanian Io ra kuasa' ri Biiljibul, Tingganai ru riwato no.”

²⁵ Napandayan ri Jisus ra atan pamaguangan nilo Riso, indagu Io boo risilo, “Moonong pagun ondo' natayar-tayar am mantutula' ra ilo galama', maaru' mapuso. Moonong pekan kapoam sambaloi ondo' natayar-tayar am mantutula' ra ilo galama', mantutuliar ilo.

²⁶ Amon ru sampulupuk riwato mansasangor ra riwato ra bokon natayar-tayar ilo am kuasa' ru Tingganai ru riwato risilo mairuruan.

²⁷ Mindagu kau ra Aku mampagiru' ra riwato sabap ra inanian Aku ru Biiljibul no ra kuasa'. Amon ru koson raginio, osoi kia nangani' ra maamaya'-maamaya' mino ra kuasa' koson mampagiru' ra riwato? Maamaya' mino galama' mampainono' ra pamaguangan mino nasala!

²⁸ Ambiluo ri Aki Kapuuno' nangani' Raki' ra kuasa' mampagiru' ra riwato, am gitio mampainono' ra i Aki Kapuuno' nakatalimpuun noyo mamarinta ra gino ngai' min.

²⁹ Kolondo' sangulun pana makasubol ra baloi ru ulun maikang am mantakou ra kuliamos nano ondo' ak am bangkilon no pagulu ulun maikang no, bagu magaau no ngaangai' kuliamos no.

³⁰ Osoi ayuk sala' ka bala Kuno sotopot no manggal Raki', am osoi ayuk kalo sumambaya' Raki' manimung, sotopot no mampatuliar!

³¹ Ginio ra balain takamin: Tula ra atan ayuk pana binaal ru ulun, kapoam mindagu ra ragu-ragu malaat, maalap ra ampun. Kaa' osoi ayuk magasab ra Ambiluo ri Aki Kapuuno', kalo maalap ra ampun!

³² Osoi ayuk magasab ra Anak ru Ulun, maalap ra ampun. Kaa' osoi ayuk magasab ra Ambiluo ri Aki Kapuuno' kalo maalap ra ampun, paat ra raino kapoam Orou Pupus no!”

Puun tataun am kawa' nano

³³ “Amon ru masaga' makaalap ra kawa' moonsoi, akau musiti' mokoondo' ra puun moonsoi. Amon ru kalo moonsoi puun no, kawa' nano pana kalo niayuk moonsoi. Kinoonsoi ru rondo' puun tataun no mapandayan intor ra kawa' no.

³⁴ Akau ulun malaat. Ginio poyo, ati kulaan kau makaindagu ra baal ondo' moonsoi? Sabap ra atan ondo' soroi ralalom ru guang, ginio noyo raguon ru kabang.

³⁵ Ulun moonsoi mampasalula' ra paliso moonsoi intor ra ralalom no, sabap ra io ti moonsoi. Ulun malaat mampasalula' ra paliso malaat intor ra ralalom no, sabap ra io ti malaat.

³⁶ “Mampakara' Aku ramuyun: Paat ra Orou Pupus moonong ulun musiti' mangiou ra ngaangai' ragu jajajou ondo' sinabit no.

³⁷ Sabap ra ragu muno galama' ondo' mamisara' rirun, ra makasala kou kia kapoam kalo.”

Mompogogot milong ra kaimuagan

³⁸ Kukula' ngaulun mangingila' ra Ukum ri Musa am ulun ru Parisi pana mindagu, “Mangingila', masaga' akai milong Rirun mambaal ra kaimuagan.”

³⁹ Kaa' taam i Jisus, “Mumpara' boo laat am puka' ru ulun ra orou raiti'! Makitaak kau Raki' mambaal ra kaimuagan? Kolondo' kaimuagan patutunon Kuno ramuyun, kaa' rondo' ayuk, ioginio kaimuagan ri nabi Junus.

⁴⁰ Koson ri Junus minayan talu ngoorou am talu ngorondom ralalom tinai' ru papait maayo, mogondo' niayuk ra Anak ru Ulun mayan talu ngoorou am talu ngorondom ralalom tana'.

⁴¹ Paat ra Orou Pupus no, ulun-ulun ru Niniwi migor am manguu' ramuyun sabap ra ilo timinalikur intor ra tula nilono paat ra ilo nangkirongog ra ragu ri Junus. Kaa' pakapandai no, ragiti mokoondo' maayo poyo intor ri Junus!

⁴² Paat ra Orou Pupus no, ratu Syiba migor am manguu' ramuyun, sabap ra minugar io saboi ra sampiruo ru tana' ti mongoi pangkirongog ra pangilaan matanda' toojo intor ri Raja' Salomo. Balain takamin: Giti raino mokoondo' maatang toojo intor ri Raja' Salomo!”

Riwato siminaguli'

⁴³ “Sanggilan riwato no mangiruan ra inan ru sasangulun, mangkayat riwato ra giu' ra intok masiluk maguyum ra intok tangusan. Kaa' kolondo' matuum no.

⁴⁴ Mindagu io boo, ‘Sumaguli' aku ra inayanan ondo' tinatang kuli!’ Saguli' io am ilai' no inayanan no kolondo' minayan, mapasau am matampos.

⁴⁵ Riwato no pana ingkual boo am pampiau poyo ra tulu' riwato ondo' malaat kaga' intor riso, am ayan ilo boo ra inan ru ulun no. Am pupus no baal ru ulun no mulu' poyo malaat intor ra talimpuun i. Gitio noyo kasaukan ru ulun malaat orou raiti'.”

Ina' am pabukat ri Jisus

⁴⁶ Tatanga' ri Jisus mindagu ra ulun masuang no ratong ina' am pabukat Nano. Naginaa ilo ra liwar am masaga' ilo tumuum ri Jisus.

⁴⁷ Sangulun intor ra ulun masuang i mindagu ri Jisus: “Ilai', ina' am pabukat Muno soroi giu' ra liwar no am masaga' makimansunur Rirun.”

⁴⁸ Indagu i Jisus: “Osoi ina' Kuno? Osoi pabukat Kuno?”

⁴⁹ Io pana nanulu' boo ra maamaya'-maamaya' Nano am indagu, “Ilai' gitio noyo ina' Kuno am pabukat-pabukat Kuno.

⁵⁰ Osoi ayuk mampagagaya' ra kasagaan ri Ama' Kuno giu' ra suruga', ulun ragitio noyo pabukat Kuno ra ungkuyon, pabukat Kuno ra ruandu' am ina' Kuno.”