MATIUS 11 - Tanou Moonsoi Timugon

Ulun sinusub intor ri Juanis Mampariu'

¹ Kopongo i Jisus nangila' ra mopor am ruo maamaya' Nano, iruani' No boo intok raginio am ongoi pangila' am poyo pampatanou ra tanou intor ri Aki Kapuuno' giu' ra bandar-bandar ondo' nakapaginggaar no.

² Paat ri Juanis Mampariu' ondo' soroi ralalom pangaputan no nokorongog ra kandoi ri Kristus, panusub io ra kukula' ngaulun maamaya' nano mongoi ri Jisus.

³ Konilo, “Tuan, balai' akai no, Okou kia kon ri Juanis, Io ondo' matong no, kapoam maginaa kia poyo ra ulun ra bokon?”

⁴ Taam i Jisus, “Saguli' no am balai' i Juanis ra atan ondo' morongog am makito min:

⁵ Ulun nobolou makakito, ulun kalo makalulu' makaugar, ulun makamaruol ra kungkung ondo' maaja' mababas; ulun barat mokorongog, ulun minatoi maayag saguli', am Tanou Moonsoi no pinatanou ra ulun musikin.

⁶ Pakaansuk no ulun ondo' mangintopot ra Aku no kon ri Juanis.”

⁷ Tatanga' ru maamaya' ri Juanis no minuli', indagu i Jisus intor ri Juanis ra ulun masuang no, “Paat ra akau minongoi ri Juanis giu' ra tana' kaagisan, atan inongoi min ilai'? Magilong ra ulun ondo' magalig-alig pangilaan nano koson ra sakot nasiob ru angin?

⁸ Akau miningkual magilong ra atan? Sangulun ondo' nambayang ra moonsoi kia? Ulun ondo' nambayang koson raginio mayan ra istana!

⁹ Balai' Aku, akau miningkual magilong ra atan? Sangulun nabi kia? Iou, mindagu Aku ramuyun ra i Juanis maatang poyo intor ra sangulun nabi!

¹⁰ Sabap ra io noyo ondo' rinagu ralalom ru Buuk Kitab: ‘Indagu i Aki Kapuuno': Io noyo sinusub Kuno. Susubon Ku io magulu intor Rirun koson momongo ra ralan Muno.’

¹¹ Karaa' min! I Juanis Mampariu' no maatang toojo intor ra ngaangai' ulun giti ra tana' ti. Kaa' ulun ondo' kalo maatang ra gino ngai' ru ulun ri Aki Kapuuno', maatang poyo intor ri Juanis.

¹² Intor ri Juanis Mampariu' nampatanou ra tanou no suku' raino ti, Pamarintaan ri Aki Kapuuno' inanggal ru ulun malaat ondo' mangkinam manguasa' no pabayaan ra kalaatan.

¹³ Ngaangai' ru nabi am i Musa ralalom ru Ukum nali suku' rinatangan ri Juanis, nambala' pagulu ra sauk raginio.

¹⁴ Amon ru masaga' kau ayuk mangintopot ra tanou nilai no, i Juanis ti noyo i nabi Ilia, ondo' ratangan no pinabala' noyo pagulu.

¹⁵ Rongogo' am karaa' min!

¹⁶ “Atan papagandaan Ku ra ulun ra raino ti? Ilo ti koson ra lalaing-lalaing ondo' mantuturung giu' ra pasar. Sampulupuk no mampiau ra bokon no:

¹⁷ ‘Marimbai akai ra rimbai kaansayan ramuyun, kaa' kalo masaga' kau magililigo'! Marimbai akai ra rimbai makalulumpus ra guang, kaa' kalo masaga' kau mantangi'!’

¹⁸ Mogondo' niayuk paat ri Juanis riminatong, nampali io am kalo nanginum ra anggur, am kon boo ru ulun, ‘Sinubol io ru riwato!’

¹⁹ Paat ra Anak ru Ulun no matong mangakan am manginum; kon boo ru ulun, ‘Ilai' min ulun no! Moroot, gagaukon, am rangan ru mampalulur ra cukai am ulun ondo' karaan ra malaat!’ Kaa' kapintaran ri Aki Kapuuno' makito intor ra kaayagan ru ulun ondo' nangapu ra kapintaran raginio.”

Ulun ru pekan-pekan ondo' kalo mangintopot

²⁰ I Jisus pana tumalimpuun mansawai ra ulun ru pekan-pekan ondo' intok raginio nambaalan no ra masuang kaimuagan, sabap ra ulun ondo' minayan ra pekan-pekan raginio kalo tumalikur intor ra tula nilono.

²¹ “Aibui boo ra ulun ru Korajin! Aibui boo ra ulun ru Bitsaida! Amon ru kaimuagan ondo' binaal ra tatanga' min nabaal noyo giu' ra Tirus am Sidon, lair noyo ulun ru giu' no mangulir am manauk ra ulu nilai ra kaau, koson tatandu' ra ilo ti timinalikur noyo intor ra tula nilono!

²² Karaa' min, paat ra Orou Pupus no, maayo guang ri Aki Kapuuno' makaasi' ra ulun ru Tirus am Sidon ka akau!

²³ Am akau, ulun ru Kapirnaum! Guang min, painsawaton kau saboi ra suruga'? Patirin kau giu' ra naraka! Amon ru kaimuagan ondo' binaal ra tatanga' ramuyun i binaal ra giu' Sodom, maaru' Sodom i lakat ayuk poyo soroi ra raino ti!

²⁴ Karaa' min! paat ra Orou Pupus no, maayo guang ri Aki Kapuuno' makaasi' ra ulun ru Sodom ka akau!”

Ratong kau Raki' am tangus kau

²⁵ Paat ragili indagu i Jisus; “Ama', Tuhan ru limbowon am tana'! Paringkuanangan Ku Rirun sabap ra pinakito Mu ngaangai' raginio ra ulun kolondo' kapandayan, am pinasibuni Mu intor ra ulun mapintar am nakaigigila'.

²⁶ Iou Ama', gitio pinili' am kasagaan Muno galama'.

²⁷ “Pinataakan ri Ama' ngaangai' Raki'. I Ama' ayuk sangulun nakaulig ra Anak, am Anak ayuk sangulun makaulig ra Ama' am poyo ulun ondo' kasagaan ru Anak ayuk makaulig ri Ama'.

²⁸ “Ratong kano Raki' akau ngaangai' ondo' naagui sabap ra naagatan; patanguson takamin.

²⁹ Gagayaa' noyo susuban Kuno am igigila' kano Raki', sabap ra Aku ti mataau am minggana' guang am akau pana makaalap ra kaansayan.

³⁰ Gagayaa' noyo susuban Kuno sabap ra matasu' am mamaan pasaanin Kuno ramuyun.”