MARKUS 9 - Tanou Moonsoi Timugon

¹ Indagu poyo Io risilo, “Balain takamin, sotopot no mokoondo' poyo ulun ragiti kalo matoi saboi ra makakito ilo ri Aki Kapuuno' mamarinta am makakuasa'.”

Natulayan ri Jisus

² Kopongo onom ngoorou ibito' ri Jisus i Pitrus, Jakubus am i Juanis am pabaya' ilo pagaloi ra rondo' gunung masawat. Ilo ayuk apat ngaulun ra giu' i. Balui boo baal ri Jisus ra talupak ru mato nilo.

³ Binayang Nali mapulak kaga' am kukuliat ayuk. Kolondo' sangulun pana ra tana' ti makapampupu' ra kinapulak ru bayang koson raginio.

⁴ Kakito nilo boo i Ilia nabaya' ri Musa, ilo ruo ti nakimansunur ri Jisus.

⁵ Indagu i Pitrus ri Jisus, “Mangingila', mapara' piboo bansuk mai soroi ra intok ragitio. Moonsoi manirong akai talu kalukub: rondo' Rirun, rondo' ri Musa am rondo' ri Ilia.”

⁶ Minindagu io koson raginio sabap ra kalo nakapandai io atan sotopot raguon nano, sabap ra malaa' i Pitrus am karuo ngaulun rangan nano.

⁷ Ratong boo gaun nangulumput risilo am intor ra ralalom ru gaun no norongog nilo bolos: “Gitio noyo Anak Kutu ondo' tagamin Kutu, rongogo' min Io!”

⁸ Indibok ilo pampulolou ra libung no, kaa' kolondo' sangulun pana nakito nilo nababaya' risilo ondo' ayuk am i Jisus sangulun.

⁹ Paat ra ilo nambusul intor ra gunung no, nangampol i Jisus risilo, “Pai' min tunungo' ra osoi ayuk pana ondo' nakito mini, saboi Anak ru Ulun maayag saguli' ra kapatayan.”

¹⁰ Sinugut nilo bilin ni liliwa' nilo mansusunur atan nua' arati' ru ragu “maayag saguli' intor ra kapatayan”.

¹¹ Pangkuot ilo ri Jisus, “Kua mangingila' ra Ukum ri Musa minindagu ra maaru' i Ilia matong pagulu am bagu no Anak ru Ulun?”

¹² Taam i Jisus, “Topot, i Ilia matong pagulu koson momongo ra ngaangai' no, kaa' ati kulaan ra Anak ru Ulun? Nogondo' ra tinulisan ralalom ru Buuk Kitab ra Io imboloon am anggalon ru ulun.

¹³ Balain takamin, i Ilia nakaratong noyo am pamakuan ru ulun riso maya' ra atan ayuk kasagaan nilo riso, nogondo' ra tinulisan ralalom ru Buuk Kitab tutunungon intor ri Ilia.”

Namabas i Jisus ra sangulun lalaing sinubol ru riwato

¹⁴ Paat ri Jisus, i Pitrus, i Jakubus am i Juanis siminaguli' ra maamaya' Nano ra bokon, ilai' nilo masuang ulun liminimpu risilo. Kukula' ngaulun mangingila' ra Ukum ri Musa mantataam ra maamaya' Nano.

¹⁵ Kakito ru ulun masuang no i Jisus, nangimuag am nasimbul ilo minuma' Riso.

¹⁶ Pangkuot i Jisus ra maamaya' Nano, “Atan nantaaman min ra mangingila' ra Ukum ri Musa ni?”

¹⁷ Sangulun intor ra ulun masuang ni timinaam, “Mangingila', nagibit aku ra lalaing kuno Rirun, sabap ra sinubol io ru riwato am bobou boo.

¹⁸ Paat ra riwato no sumubol riso, inan nano migigiampas ra tana', manamputa' kabang nano, manguritot ripon nano am ngaangai' inan nano kumotog. Nakiindangan aku ra maamaya' Muti mampagiru' ra riwato no, kaa' kalo naalap nilo.”

¹⁹ Indagu boo i Jisus risilo, “Topot-topot noyo akau ti kolondo' pangintapatan! Nabuoi Aku noyo minayan ramuyun am kalo poyo mangintopot kau. Ati kulaan Aku tumaan ramuyun? Ibito' lalaing no ragiti!”

²⁰ Ibito' nilo boo lalaing ni ri Jisus. Pakakito ayuk riwato no ri Jisus, pokoroyo' no inan ru lalaing no saboi naratu' pagiluluir ra tana' am nanamputa' kabang nano.

²¹ Pangkuot i Jisus ra ama' ru lalaing no, “Kula' noyo buoi io koson raginio?” Taam ama' ru lalaing i, “Intor ayuk poyo ra io boborok!

²² Masalok riwato no mangkinam mamatoi riso am paratuon ralalom ru apui am timug. Pakaasi' no ramon. Indangano' akai amon ru maalap Mu ayuk!”

²³ Taam i Jisus, “Atan? Amon ru maalap Ku? Osoi ayuk mangintopot ri Aki Kapuuno', ngaangai' maalap no kabaal.”

²⁴ Golok boo ama' ru lalaing no, “Tuhan, mangintopot aku kaa' indangano' aku koson mangintopot aku poyo toojo!”

²⁵ Paat ri Jisus nakakito ra ulun masuang mongoi limpu, susubo' No riwato no, “Riwato mampakabarat am mompokobobou, susubon tokou mingkual intor ra lalaing ti am pai' no subol saguli'!”

²⁶ Riwato no nompogolok am pagiampaso' inan ru lalaing no, am miningkual. Lalaing no kolondo' pongkotoi saboi ngaangai' ulun minindagu, “Minatoi io no!”

²⁷ Kaa' guuto' ri Jisus longon ru lalaing no am indangano' no migor. Lalaing i pana bigor boo.

²⁸ Subol i Jisus am maamaya' Nano ra baloi. Paat ra ilo-ilo ayuk kuati' ru maamaya' Nano i Jisus, “Kua kalo naalap mai ra unjau riwato i?”

²⁹ Taam i Jisus, “Riwato koson raginio kalo maalap ra unjau ru kalo makiasi' kau ri Aki Kapuuno'.”

Nambala' poyo i Jisus ra patayan Nano

³⁰ Iruani' ri Jisus am maamaya' Nali intok raginio, am ugar ilo pansail ra libung ru Galilia. Marara' i Jisus ra ulun makapandai ra ati Io,

³¹ sabap ra mangila' Io ra maamaya' Nano. Indagu Io, “Anak ru Ulun pataakon ra ulun, rokopon am potoyon nilo Io. Kaa' malupus kataluan no Io maayag saguli'!”

³² Maamaya' ri Jisus no kalo nakarati' ra pangilaan ragitio am malaa' ilo mangkuot.

Osoi sotopot no maatang?

³³ Pakasuku' ilo ra pekan Kapirnaum am umpos ilo ra baloi. Pangkuot i Jisus ra maamaya' Nali, “Atan kia sinunur min ra tanga' ru ralan ra raitii' ni?”

³⁴ Nongkoror ilo ayuk sabap ra nagagansang ilo ra tanga' ru ralan ra osoi maatang toojo risilo.

³⁵ Panturung i Jisus, piawo' No boo koopor am ruo ngaulun maamaya' Nano. Indagu Io risilo, “Ulun ondo' masaga' ra maatang toojo, maaru' io tumauli am masauk ra ulipon ra ngaangai' ulun.”

³⁶ Kopongo ragili pangalap i Jisus sangulun lalaing am pabigoro' ra tatanga' nilono. Ganggali' No lalaing no am indagu risilo,

³⁷ “Osoi ayuk mangapu ra lalaing koson ragitio sabap ra mangintopot Raki', arati' no mangapu io Raki'. Osoi ayuk mangapu Raki', sala' ka Aku ayuk, kaa' i Aki Kapuuno' poyo ondo' nanusub Raki' apuon nano.”

Osoi kalo manggal ritakau, io no bala takau

³⁸ Indagu i Juanis ri Jisus, “Mangingila', nakakito akai ra sangulun nampagiru' ra riwato ralalom ru inggalan Muno. Inggalari' mai io sabap ra io sala' ka bala takau.”

³⁹ Kaa' indagu i Jisus, “Pai' min inggalari' io, sabap ra kolondo' sangulun pana mambaal ra kaimuagan ralalom ru inggalan Kuno am sangkinolor raginio magugulas io Raki'.

⁴⁰ Sabap ra osoi kalo manggal ritakau, io no bala takau.

⁴¹ Balain takamin! Osoi ayuk mapainum ramuyun ra akau maamaya' Raki', ulun no maaru' makaalap ra ampos nano.”

Baal mangkinibit ra tula

⁴² “Osoi ayuk mangkinibit ra sangulun intor lalaing-lalaing ti kalo boo mangintopot Raki', moonsoi batu maayo pobongkoson ra liog ru ulun no am patapungon ra raat no.

⁴³ Amon ru kalindu' muno mangkinibit rirun makatula, pungguo' noyo kalindu' no! Moonsoi poyo okou maayag ra sakalinduan, kaa' okou ruo kalindu' am paumposon ra naraka, ralalom ru apui mantilayun. [

⁴⁴ Giu' no ulor kalo matoi-atoi am apui kalo malaalasa'.]

⁴⁵ Amon ru kalayam muno mangkinibit rirun makatula, pungguo' io no! Moonsoi poyo okou maayag ra sangkalayaman ayuk, kaa' okou ruo kalayam paumposon ra naraka. [

⁴⁶ Giu' no ulor kalo matoi-atoi am apui kalo malaalasa'.]

⁴⁷ Amon ru mato muno mangkinibit rirun makatula kuolo' noyo mato no! Moonsoi poyo mumpos ra Tana' Bagu ri Aki Kapuuno' ra samataan ayuk, kaa' okou ruo mato paumposon ra naraka.

⁴⁸ Giu' no ulor kalo matoi-atoi am apui kalo malaalasa'.

⁴⁹ Koson ra taak impasawin ra usi', moonong ulun impasawin ra apui.

⁵⁰ Usi' moonsoi, kaa' amon ru mapalo usi' no, ati koson kaasinon saguli'? Tilu kano ra usi', ioginio mobobonsoi kau ra rondo' am bokon.”