MARKUS 8 - Tanou Moonsoi Timugon

Nampaakan i Jisus ra apat ngaribu ngaulun

¹ Paat ragili masuang toojo ulun timinimung am kolondo' akanon nilo. Piawo' ri Jisus maamaya' Nano am indagu Io,

² “Makaasi' Aku toojo ra ulun-ulun ti. Nataluan ilo noyo minaya' ritakau am raino ti nakayaan ilo no ra akanon.

³ Amon ru susubon Ku ilo muli' ra ilo naitilan, maaru' malausan ilo ra tanga' ru ralan, sabap ra mokoondo' risilo minatong intor ra maalur.”

⁴ Taam maamaya' Nano, “Ati koson maguyum risilo ra akanon ra intok masiluk ti?”

⁵ Pangkuot i Jisus risilo, “Kula' ngampila' ruti' soroi ramuyun?” Taam ilo, “Tulu' ngampila'.”

⁶ Susubo' No ulun masuang no mantuturung ra tana'. Alapo' No boo ruti' tulu' ngampila' no paringkuanang Io ri Aki Kapuuno', pipilango' No am patayari' ra maamaya' Nano ra ulun masuang no. Binaal ru maamaya'-maamaya' Nano kon raginio.

⁷ Mokoondo' ilo niayuk kukula' ngaunor papait malumot. Kopongo i Jisus nongompor ri Aki Kapuuno', susubo' No maamaya' Nali mantayar niayuk ra ruti' i.

⁸ Ngaangai' nilo nangakan suku' naasug. Tauli, luluro' ru maamaya' Nano suwo ru akanon no, tulu' poyo ngambakul napanu'.

⁹ Suang ru ulun nangakan no am olo'-olo' apat ngaribu ngaulun. Ilo pana sinusub boo ri Jisus mugar.

¹⁰ Parayus Io am maamaya' Nano sakoi ra parau am mongoi ra libung ru Dalmanuta.

Ulun ru Parisi makitaak ri Jisus mambaal ra kaimuagan

¹¹ Ratong ulun-ulun ru Parisi am makimantaam ilo ri Jisus. Koson mangkinam Riso, kitaakon nilo i Jisus mambaal rondo' kaimuagan koson mapainono' ra Io sinusub ri Aki Kapuuno'.

¹² Pampalaa i Jisus am indagu, “Kua pakitaak kau ra kaimuagan? Mindagu Aku ramuyun, sotopot no akau ti kalo pakitonon Ku ra kaimuagan.”

¹³ Iruani' ilo ri Jisus am sakoi saguli' ra parau am laup ra sandaup ru tasik.

Ragi ru ulun ru Parisi am ragi ru Irodis

¹⁴ Kabuoi ragili, napandayan ru maamaya' ri Jisus ra ilo nakalilian nagibit masuang ruti'. Mokoondo' sampila' ayuk ruti' soroi risilo ralalom ru parau nilono.

¹⁵ Nampakara' i Jisus risilo, ragu Nano, “Ilalai' min ragi ru ulun-ulun ru Parisi am ragi ru Irodis.”

¹⁶ Nangkakara' am minindagu ilo ra rondo' am bokon, “Mindagu Io koson raginio sabap ra itakau ti kolondo' ruti'!”

¹⁷ Nakapandai i Jisus ra atan ondo' rinagu nilo, am ginio ra Io minindagu risilo, “Kua sunuro' min ra akau kolondo' ruti'? Kalo poyo kia nakapandai am nakarati' kau? Talingo kau kia ru kingkilat?

¹⁸ Makamato kau! Kalo kia makakito kau? Makatalingo kau! Kalo kia mangkirongog kau? Kalo boo kia makara' min,

¹⁹ paat ra Aku namimilang ra limo ngampila' ruti' i, paakanin ra limo ngaribu ngaulun? Kula' ngambakul suwo ru akanon linulur mini?” Taam ilo, “Mopor am ruo ngambakul.”

²⁰ “Am poyo paat ra Aku namimilang ra tulu' ngampila' ruti' paakanin ra apat ngaribu ngaulun i, kula' ngambakul suwo ru akanon linulur mini?” Taam ilo, “Tulu' ngambakul.”

²¹ Pangkuot poyo i Jisus risilo, “Lakat ayuk poyo kia akau kalo makarati'?”

Namabas i Jisus ra ulun bolou giu' ra Bitsaida

²² Kabuoi ragili pakasuku' noyo i Jisus am maamaya' Nano ra Bitsaida. Ulun-ulun nangaak ra sangulun bolou paumaan ri Jisus am kitaakon nilo i Jisus maa' raginio kumambong ra ulun bolou no.

²³ Aako' ri Jisus kalindu' ru bolou no am ibito' mingkual ra pekan no. Katiwagi' ri Jisus mato ru bolou no am pabantaa' kalindu' Nano ra mato ru ulun no, am pangkuot, “Makakito kono kia ra atan-atan?”

²⁴ Pagilong ulun no am indagu, “Iou, makakito aku ra ulun mugar-ugar, kaa' koson ayuk ra puun tataun.”

²⁵ Pabantaa' poyo ri Jisus kalindu' Nano ra mato ru ulun no. Ponontong ulun no am makakito boo am makaulig io toojo.

²⁶ Kopongo raginio susubo' io ri Jisus muli' ra baloi nali am bilini' No, “Pai' no saguli' ra pekan raginio.”

Pangiawan ri Pitrus ri Jisus

²⁷ Kopongo raginio i Jisus am maamaya' Nano minongoi ra kukula' pamagunan ra libung ru Kaisaria Pilipi. Tanga' ru ralan pangkuot i Jisus ra maamaya' Nano, “Osoi Aku ti, rokoon ru ulun?”

²⁸ Taam ilo, “Mokoondo' ulun mindagu, Okou i Juanis Mampariu'. Mokoondo' poyo bokon mindagu, nabi Ilia am niayuk bokon mindagu, sangulun nabi.”

²⁹ Pangkuot i Jisus, “Kaa' akau galama', osoi Aku ti?” Taam i Pitrus, “Okou noyo Kristus, Mamamayag ondo' sinusub ri Aki Kapuuno'!”

³⁰ Pangampol boo i Jisus risilo koson kalo mantunung ra osoi-osoi ayuk ra osoi Io sotopot no.

Nambala' i Jisus ra kaimbalaan am patayan Nano

³¹ I Jisus pana tumalimpuun mangila' ra maamaya' Nano, “Anak ru Ulun maaru' masuang imbolo', anggalon Io ru tingganai ru ulun ru Jaudi, tingganai imam Jaudi am mangingila' ra Ukum ri Musa. Potoyon Io, kaa' malupus kataluan, bayagon Io saguli'.”

³² Rinansak toojo ri Jisus ra Io nambala' ra maamaya' Nano. Kulayuso' ri Pitrus i Jisus ra sangkiingan am pansawai Riso.

³³ Kaa' kailio' ri Jisus maamaya' Nano am sangiti' No i Pitrus. Indagu Io, “Pagiru' intor raki', okou Tingganai ru riwato! Pamaguangan muno pamaguangan ru ulun, sala' ka pamaguangan ri Aki Kapuuno'.”

³⁴ Piawo' boo ri Jisus ulun masuang no am maamaya' Nano. Indagu Io risilo, “Moonong ulun masaga' maya' Raki', lilianin no kasagaan nano galama' am mansaan io ra salip nano am maya' Raki'.

³⁵ Sabap ra osoi ayuk kalo masaga' mampataak ra kaayagan nano, io no matatakan ra kaayagan ondo' motopot. Kaa' osoi ayuk mampataak ra kaayagan sabap ra aku am Tanou Moonsoi intor ri Aki Kapuuno', makaalap ra kaayagan ondo' motopot.

³⁶ Atan onong ru ulun makaalap ra ngaangai' kuliamos ru tana' ti, kaa' matatakan io ra kaayagan nano?

³⁷ Maaligan kia kaayagan no ra rondo' ra bokon? Maaru' kalo.

³⁸ Sabap ra osoi ayuk mauyu' mangiou Raki' am pangilaan Kuno ra tatanga' ru ulun ondo' kalo boo mangintopot am makatula ti, Anak ru Ulun pana mauyu' mangiou ra ulun raginio paat ra Io matong ralalom katulayan ru Ama' Nano, sumbayaan ru malaikat-malaikat ondo' matulai.”