MARKUS 6 - Tanou Moonsoi Timugon

Kalo inapu i Jisus giu' ra Nasarit

¹ Tauli i siminaguli' i Jisus ra pamagunan galama' Nali, am maamaya' Nano minaya' Riso.

² Paat ra orou Sabat tumalimpuun Io mangila' giu' ra baloi sambayangan. Ulun masuang i nangimuag paat ra nokorongog Riso am indagu ilo, “Ati naalapan Nano ra ngaangai' ragitio? Kapintaran koson ra atan kia ondo' Riso ti? Ati kulaan No mapakito ra kaimuagan?

³ Sala' ka kia Io ti sangulun manambaloi, anak ri Maria, pabukat ri Jakubus, i Josis, i Judas am i Simon? Sala' ka kia pabukat-pabukat ruandu' Nano soroi ritakau?” Ginio ra kalo boo nangapu ilo Riso.

⁴ Indagu boo i Jisus risilo, “Sangulun nabi omporon ra ati ayuk intok kaa' kalo omporon io ru mamagun, pabukat am baloi nano galama'.”

⁵ Kalo makapambaal Io ra kaimuagan ra giu' i, kaa' namabas Io ayuk ra kukula' ngaulun marualan ra kinambong No ilo.

⁶ Mangimuag Io risilo ra ilo kalo mangintopot. Ongoi boo i Jisus ra kukula' pamagunan paginggaar am mangila' Io ra ulun.

Nanusub i Jisus ra mopor am ruo ngaulun maamaya' Nano

⁷ Piawo' No mopor am ruo ngaulun maamaya' Nano am susubo' No ilo tumaruruo. Inanian No ilo ra kuasa' mapagiru' ra riwato,

⁸ am bilini' No ilo, “Pai' kau pagibit ra atan-atan ayuk buoi akau mangkiralan, ondo' ak am susukur; ruti' pana pai', katia' pakitaakan kapoam ruit pana pai'.

⁹ Pangkasut kau kaa' pai' pagibit ra ralinan.”

¹⁰ Ragu Nano poyo risilo, “Amon ru paumposon kau ra rondo' baloi, ayan kano raginio suku' akau manding intor ra bandar no.

¹¹ Kaa' amon ru makasuku' kau ra rondo' bandar am mokoondo' kalo mapaumpos am kalo masaga' mangkirongog ramuyun, iruani' bandar raginio am kabuli' min noyo kaau ru kasut mino koson pangkaraan risilo.”

¹² Mopor am ruo ngaulun maamaya' no pana minugar boo am mampabala' ra ulun musiti' tumalikur intor ra tula nilai.

¹³ Mapagiru' ilo ra masuang riwato am masuang ulun marualan pipilin nilo ayuk ra umau jaitun am mamabas risilo no.

Pinatayan ri Juanis Mampariu'

¹⁴ Norongog noyo ru raja' Irodis ngaangai' ondo' nasauk, sabap ra inggalan ri Jisus nauligan ru ngaangai' ulun. Mokoondo' mindagu; “I Juanis Mampariu' naayag saguli'! Ginio sabap ra Io mokoondo' ra kuasa' mambaal ra kaimuagan.”

¹⁵ Ondo' bokon mindagu, “Io no nabi Ilia!” Ondo' bokon mindagu, “Io no sangulun nabi nogondo' ra nabi-nabi ra galing i.”

¹⁶ Paat norongog ru raja' Irodis sunur raginio, indagu io, “Io no i Juanis Mampariu' ondo' iningguluan kuli kaa' naayag io saguli'.”

¹⁷ Ragili nanusub raja' Irodis ra ulun namparakop ri Juanis am ganggangi' ra lamin pangaputan. Sabap no raja' Irodis sinawai ri Juanis ra io namundus am naguot ri Irodias, andu' ri Pilipus, pongkotob nano galama'.

¹⁸ Ragu ri Juanis ra io nansawai, “Kalo mabuli okou manangandu' ra andu' ru pinansukapu muno!”

^19-20 Ginio sabap ra malikokot i Irodias ri Juanis am mangatang io koson mamatoi ri Juanis, kaa' kalo maalap, sabap ra raja' Irodis malaa' ri Juanis ra i Juanis ti sangulun moonsoi ondo' sinusub ri Aki Kapuuno'. Ginio ra raja' Irodis mangampin riso. Maansayan io mangkirongog ra pangilaan ri Juanis, kabalu' pana ragu ri Juanis makaimamang toojo riso.

²¹ Pupus nali nakaalap niayuk i Irodias ra kaluagan. Paat ragili, piawo' ru raja' Irodis ngaangai' tingganai ru parinta, tingganai ru saujor am tingganai ru libung ru Galilia mongoi pangiantak ra orou naganakan nano.

²² Paat ragili anak ralaa ri Irodias nansayau, am sayau nali mampakaansuk ra guang ru raja' Irodis am tambului-tambului nali. Indagu raja' ti ra ralaa i, “Atan ayuk kitaakon muno intor raki' aniin tokou!”

²³ Pagigibot boo raja' Irodis, “Atan ayuk kitaakon muno, aniin tokou, iou pana sampiruo intor ra pinarinta kutu!”

²⁴ Ongoi ralaa no pangkuot ra ina' nano, “Atan nua' kitaakon kutu?” Taam i Irodias, “Ulu ri Juanis Mampariu'!”

²⁵ Nalingas ralaa no ongoi indagu ra raja', “Taaki' raki' raino niayuk ulu ri Juanis Mampariu' ra rondo' talam!”

²⁶ Intor raginio mangiluk boo kaga' guang ru raja' no, kaa' nakapagibot io noyo am ngaangai' tambului nano nokorongog am musiti' gagayaan no.

²⁷ Raja' Irodis nanusub sangulun saujor mongoi pangalap ra ulu ri Juanis. Ongoi ulun no am inggului' no i Juanis ralalom lamin pangaputan.

²⁸ Inibit no ulu i ra rondo' talam, am taaki' no ra ralaa i, am taaki' ru ralaa i ulu no ra ina' nali.

²⁹ Pokorongog maamaya'-maamaya' ri Juanis ra baal raginio, ongoyo' nilo alapo' baangkai i am lobongo'.

Nampaakan i Jisus ra limo ngaribu ngaulun

³⁰ Rasul-rasul no timinimung saguli' ri Jisus am nambala' Riso ondo' ngaangai' kinandoi am inila' nilo i.

³¹ Masuang ulun matong am mugar ra giu' i, saboi kalo boo makaakan i Jisus am maamaya' Nali. Indagu Io boo risilo, “Ibok! Ongoi takau ra intok masiluk, maa' raginio itakau ayuk galama' am makatangus kau boo sangkinolor.”

³² Pamparau ilo boo ongoi ra intok masiluk.

³³ Kaa' paat ra ilo mintor, masuang ulun makakito risilo am makapandai ra katingkuangan nilo. Ulun masuang intor ra ngaangai' bandar ru libung raginio nagisisimbul, saboi nakasigulu ilo po risilo.

³⁴ Paat ri Jisus masak, kakito No masuang kaga' ulun am makaasi' Io boo risilo, sabap ra ilo koson ra domba kolondo' magagalung. Io pana tumalimpuun boo mangila' risilo ra masuang baal.

³⁵ Paat ra iopalunggai', ratong maamaya' Nali Riso am indagu, “Masiluk intok ragitio am lumondom noyo.

³⁶ Susubo' ilo ti mugar maa' raginio makapambali ilo ra akanon giu' ra pamagunan am pekan ondo' mangamaar ti.”

³⁷ Kaa' taam Io, “Akau maaru' mapaakan risilo!” Indagu ilo Riso, “Kua, kalo nakapandai Kou kula' kinasuang ru ruit pirok pambabali ra akanon nilo ti?”

³⁸ Kaa' indagu Io risilo, “Kula' ngampila' ruti' soroi ramuyun? Kinami' ilai'!” Kopongo nagilong indagu ilo, “Limo ngampila' ruti' am ruo ngaunor papait.”

³⁹ Susubo' No ulun-ulun no mantutuliar ra rorondo' pantulibungan ra sakot no.

⁴⁰ Panturung ilo pantutulibung, mokoondo' maatus ngaulun, mokoondo' limo ngoopor ngaulun.

⁴¹ Kaalap No limo ngampila' ruti' am ruo ngaunor papait no, pantingaa' Io ra rasawat am paringkuanang Io ri Aki Kapuuno'. Pipilango' No boo ruti' no am pataaki' No ra maamaya' Nano koson posonongon nilo ra ulun masuang. Koson niayuk ra ruo ngaunor papait no taatayaro' No ra ngaangai' ulun i.

⁴² Ilo ngaangai' nakaakan saboi naasug.

⁴³ Luluro' boo ru maamaya' Nali suwo ru ruti' am papait no ondo' suang no mopor am ruo ngambakul napanu'.

⁴⁴ Suang ru ungkuyon ondo' minaya' pangakan i am limo ngaribu ngaulun.

Minugar i Jisus ra rasawat ru timug

⁴⁵ Kopongo ragili i Jisus nanusub ra maamaya' Nali, koson sumakoi ra parau magulu lumaup ra Bitsaida. Paat raginio niayuk nanusub Io ra ulun masuang muli'.

⁴⁶ Pakatuliar Io ayuk intor risilo, ongoi Io ra bulur koson makiasi'.

⁴⁷ Paat ra iomolondom galing, parau no nakalintanga' ra tasik, kaa' i Jisus lakat ayuk poyo misasangulun ra lantur.

⁴⁸ Maimpal No ilo mapagon kaga' mangkabil sabap ra mauma' nilo bagiu' mapuor. Olo'-olo' lolot jam katalu am koonom iosusuab, mininggaar Io risilo am minugar rasawat ru timug, koson mansail risilo.

⁴⁹ Paat ra ilo magilong Riso minugar rasawat ru timug guang nilo Io ti manambung am pompogolok ilo.

⁵⁰ Paat ra ilo nakakito Riso nangalaa' ilo. Kaa' nataki' i Jisus mindagu risilo, “Pongkoror kau! Pai' kau kalaa'! Aku i Jisus.”

⁵¹ Sakoi Io boo ra parau no am bagiu' mapuor pana limininos. Nangimuag ilo kaga',

⁵² sabap ra kalo nakarati' ilo ra kaimuagan ra limo ngampila' ruti' i, am mailo ilo toojo makarati'.

Namabas i Jisus ra ulun-ulun marualan giu' ra libung ru Ginisarit

⁵³ Pakalaup i Jisus am maamaya' Nano ra tasik, rukugi' nilo parau no am asak ilo ra libung ru Ginisarit.

⁵⁴ Paat ra ilo masak ra parau mataki' ulun nakaulig ri Jisus.

⁵⁵ Pasisimbul ilo ra ngaangai' intok am ati ayuk karangagan nilo ra Io soroi, tumalimpuun ilo mamandas ra ulun-ulun marualan ra rasawat ru tilam nilono mongoi ri Jisus.

⁵⁶ Ati ayuk angayan Nano, pamagunan, pekan kapoam bandar, ulun mapabanta' ra ulun-ulun marualan giu' ra tamu, am makitaak ilo Riso koson pokombongon ilo ayuk ra pompor ru sukub Nano. Ngaangai' ulun pana ondo' nakakambong i, nababas.