MARKUS 5 - Tanou Moonsoi Timugon

Namabas i Jisus ra sangulun ondo' sinubol ru riwato

¹ Pakasuku' boo i Jisus am maamaya' Nano ra sandaup ru Tasik Galilia, libung ru Girasa.

² Kakaasak ayuk i Jisus intor ra parau, uma' noyo sangulun ungkuyon ondo' miningkual intor ra kalabangan, ioginio luang ru bulur batu. Sinubol io ru riwato,

³ am minayan io ra kalabangan. Kolondo' sangulun pana makaalap mopogonggong riso ra rantai pana.

⁴ Masalok noyo kalindu' am kalayam nano gonggongon ra rantai, kaa' ukaton no rantai no am lunsayon no ondo' pinomogonggong ra kalayam nano. Mapanggol io kaga' saboi kolondo' makagula' riso.

⁵ Orou-rondom mangkayat io ra kalabangan no am golok-golok ra kabuluran liliwa' io mamilat ra inan nano ra pilang ru batu.

⁶ Pakakito io ri Jisus intor ra maalur, pasimbul io rapog am igulatur ra talupak ri Jisus no,

⁷ am golok io, “Atan raguon Mu raki' inda' Jisus, Anak ri Aki Kapuuno' Ondo' Masawat Kaga'? Ralalom inggalan ri Aki Kapuuno', pai' aku imboloo'!” (

⁸ Ulun ti minindagu koson raginio sabap ra i Jisus nambala' riso, “Ingkual riwato! Ingkual intor ra ulun ti!”)

⁹ Pangkuot boo i Jisus riso, “Osoi inggalan mutu?” Taam ulun no, “Inggalan kutu ‘i Ligion’, sabap ra akai ti masuang.”

¹⁰ Nakitaak io toojo ri Jisus kalo pagiruon riwato-riwato no intor ra pamagunan no.

¹¹ Giu' ra pipilon ru bulur no masuang bauwi maguyum ra akanon.

¹² Mompogogot riwato-riwato no intor ri Jisus, konilo, “Susubo' akai no manding am polosoo' akai no sumubol ra bauwi-bauwi no!”

¹³ Ginagaya' ri Jisus kitaak nilono. Ingkual boo riwato-riwato no intor ra ulun raginio am subol ilo ra ralalom ru bauwi-bauwi no. Ngaangai' bauwi no – olo'-olo' ruo ngaribu ngainan – saguguluyur am riminatu' intor ra lagam ru tasik no am nolosor ilo ngai'.

¹⁴ Pasisimbul magagalung ra bauwi no, ongoi ra bandar am pamagunan ra libung no am pantunung ra atan nakito nilai. Ingkual boo ulun-ulun koson magilong atan ondo' nasauk.

¹⁵ Uma' ilo ri Jisus am nakito nilo ulun sinubol ru riwato i. Ulun no nanturung, nakapambayang am matanda' boo, am mangalaa' boo ngaangai' ulun.

¹⁶ Ulun ondo' nakakito galama' ra atan nasauk ra ulun i am bauwi-bauwi no, pinatunung nilo ra ulun masuang.

¹⁷ Kitaako' boo ru ulun-ulun no i Jisus mangiruan ra intok nilo.

¹⁸ Paat ri Jisus sumakoi poyo ra parau, ulun sinubol ru riwato ra raitii' i, moogot maya' Riso.

¹⁹ Kaa' i Jisus kalo mapaaya' riso, indagu Io, “Uli' no ra baloi muli am pabukat-pabukat muno. Tunungi' ilo ra ngaangai' binaal ru Tuhan rirun am ati kulaan Io nakaasi' rirun!”

²⁰ Ugar boo ulun ra binabas i, am tumalimpuun mantunung ra titikop libung Mopor Pekan ra ngaangai' binaal ri Jisus ra bayag nano, am mangimuag boo ulun ra tinunungan nano.

Anak ruandu' ri Jairus am ruandu' ondo' nangambong ra sukub ri Jisus

²¹ Pakalaup saguli' i Jisus ra sandaup i, Io lakat ayuk poyo ra kiing ru Tasik Galilia, saguguluyur ulun matong lumimpu Riso.

²² Ratong boo sangulun tingganai ru baloi sambayangan, ininggalanan ri Jairus. Pakakito io ri Jisus, igulatur io ra saang ri Jisus

²³ am makitaak io toojo Riso, “Anak ruandu' kuno marualan malanjag, mamaar matoi, ratong am pabantaa' kalindu' Muno ra inan nano am maaru' mababas am maayag io.”

²⁴ Ugar boo i Jisus am ulun no. Ulun masuang ondo' minaya' saguguluyur liminimpu am nampajuul Riso.

²⁵ Mokoondo' sangulun ruandu' ondo' mopor am ruo ngambilor noyo naimbolo' ra liniuran, ioginio maruol ru ruandu'.

²⁶ Ruli'-ruli' io babason ru nansalinut duktur, suku' kinai' no ngaangai' ruit nano kaa' kolondo' sonor am nyumanya' poyo boo.

²⁷ Nakaining io no ra tanou ru kandoi ri Jisus, nakaunor io no ra ulun masuang am inggaar io ri Jisus intor ra bakulung am kambong ra sukub Nano.

²⁸ Nampaguang io, “Makakambong aku ayuk ra sukub Nano, maaru' mataru' aku.”

²⁹ Kombongo' no am sangkinolor ragili niayuk taru' boo raraa' nano, am malimanan no ra napali' io noyo intor ra maruol nali.

³⁰ Paat ragili niayuk nalimanan ri Jisus ra mokoondo' binuor mingkual intor Riso. Am pangkaili boo Io ra tatanga' ru ulun masuang am pangkuot, “Osoi kiminambong ra sukub Kutu?”

³¹ Taam maamaya' Nano, “Okou galama' nakapandai ra ulun masuang ti liminimpu am nampajuul Rirun, kaa' kua pangkuot Kou poyo ra osoi kiminambong Rirun?”

³² Pagilong Io boo ra libung Nano koson magulig ra osoi ondo' kiminambong Riso.

³³ Ruandu' i nalaa' saboi nonontol am ongoi io igulatur ra saang ri Jisus am pambala' io ra ngaangai' binaal nali.

³⁴ Indagu i Jisus ra ruandu' no, “Anak Kuno, pangintapatan muno Raki' namabas noyo rirun. Tumoojo kou, sabap ra napali' kou noyo.”

³⁵ Paat ri Jisus lakat ayuk poyo makimansunur, ratong ulun sinusub intor ra baloi ri Jairus, indagu ulun no, “Anak muno minatoi noyo. Atan poyo pakuan muno mantipagon ra Mangingila' no?”

³⁶ Kaa' i Jisus kalo mampagagaya' ra ragu nilono am indagu Io ri Jairus, “Pai' kalaa', pangintopot ayuk.”

³⁷ Ugar boo i Jisus am kalo mapaaya' ra sangulun pana, kaa' ondo' ayuk pinaaya' no am i Pitrus, i Jakubus, am pongkotob nano i Juanis.

³⁸ Pakasuku' ilo ra baloi ri Jairus, am ilai' No ulun posongonsol am noloos ayuk tinangian am sulaboi.

³⁹ Pakaumpos ayuk i Jisus, indagu Io ra ulun-ulun no, “Kua kumulisasayan kau am pasatangi'? Lalaing ti kalo minatoi kaa' nokororot ayuk.”

⁴⁰ Kaa' kuritin Io boo. Inggalari' No boo ilo am ibito' No matuo ru anak no am talu ngaulun maamaya' Nano minumpos ra lamin ru anak no.

⁴¹ Guuto' No boo longon ru anak no, indagu Io, “Talita Kum!” Ondo' arati' nano, “Anak, mindagu Aku rirun, sukal no!”

⁴² Sangkinolor ragili niayuk anak no siminukal am ugar-ugar. (Sukor nano mopor am ruo ngambilor noyo.) Ngaangai' ru ulun no nangimuag kaga' raginio.

⁴³ Mapiot kaga' bilin Nano risilo, indagu Io, “Pai' kau pantunung ra osoi-osoi ayuk ondo' nasauk ragiti.” Susubo' No boo ilo mangani' ra anak no ra akanon.