MARKUS 3 - Tanou Moonsoi Timugon

Ulun ondo' minatoi satata' ra longon nano

¹ Tauli umpos poyo i Jisus ra baloi sambayangan. Giu' i mokoondo' sangulun ondo' minatoi satata' ra longon nano.

² Mangurio toojo ulun-ulun ri Jisus, insan ru mamabas Io ra ulun paat ra orou Sabat, maa' raginio mauwan nilo Io.

³ Indagu i Jisus ra ulun minatoi satata' ra longon no, “Ibok ragiti!”

⁴ Tauli pangkuot Io risilo, “Ati kia rondo' maaru' baalon takau ra orou Sabat, mambaal ra moonsoi kapoam malaat, mangampin ra painawo ru ulun, kapoam mamatoi ra ulun?” Kaa' ilo no nongkoror ayuk.

⁵ Mongoror Io risilo sabap ra maruol guang Nano, kaa' mangiluk Io ra mokotog ulu nilo. Indagu Io boo ra ulun no, “Patutuyo' noyo longon muno!” Patutuyo' ru ulun no longon nano, am kapali' boo.

⁶ Ingkual boo ulun ru Parisi am ongoi ilo simpung ra ulun ru Irodis mangatang koson mamatoi Riso.

Ulun masuang giu' ra kiing ru Tasik Galilia

⁷ I Jisus am maamaya'-maamaya' Nano mininggalur ongoi ra mamaar ra Tasik Galilia, am masuang ulun intor ra libung ru Galilia sumunu' Riso. Masuang niayuk intor ra Judia,

⁸ bandar Jirusalim, libung ru Idumia, tampilon sirangon ru Sungoi Jordan, am bandar Tirus am Sidon. Masuang timinuum Riso sabap ra nokorongog ilo ra ngaangai' binaal Nano.

⁹ Susubo' No maamaya'-maamaya' Nano mangalap ra rondo' parau sakayan Nano sabap ra masuang toojo ulun, maa' raginio kalo mapanjit Io.

¹⁰ Sabap ra masuang ulun binabas Nano, am masuang poyo marualan mampipisi' sabap ra masaga' kumambong Riso.

¹¹ Pakakito Riso ulun-ulun sinubol ru riwato no, pakakubu ilo ra saang Nano am golok ilo, “Okou ti noyo Anak ri Aki Kapuuno'.”

¹² Kaa' inggalari' No ilo ra kalo mambala' ra osoi Io.

Nampili' i Jisus ra mopor am ruo ngaulun maamaya' Nano

¹³ Tauli pagaloi i Jisus ra tampak ru bulur. Piawo' No ulun-ulun kasagaan Nali am ratong ilo Riso.

¹⁴ Pilio' No mopor am ruo ngaulun mamarangan Riso am susubon No ilo mampasaboi ra Tanou Moonsoi intor ri Aki Kapuuno',

¹⁵ am aniin No ilo ra kuasa' mampagiru' ra riwato.

¹⁶ Koopor am ruo ngaulun pinili' Nano ilo ginio: i Simon (ondo' ininggalanan ri Jisus i Pitrus),

¹⁷ i Jakubus ilo magaka' ri Juanis anak ri Jibidius (ilo ruo no ininggalanan No ra i Boanirgis, ondo' arati' nano “Anak Tingkalur”),

¹⁸ am bokon no i Andrias, Pilipus, Bartolomius, Matius, Tomas, Jakubus anak ri Alpius, Tadius, i Simon ulun ru Patriot,

¹⁹ am i Judas Iskariot ondo' nampataak ri Jisus ra pantula' Nano.

I Jisus am i Biiljibul

²⁰ Uli' i Jisus ra baloi. Ratong boo ulun masuang liminimpu Riso, saboi kalo makapangakan Io am maamaya'-maamaya' Nano.

²¹ Intor raginio mokoondo' niayuk ulun mindagu ra kalo boo matanda' Io. Paat ra pabukat-pabukat ri Jisus nokorongog raginio, matong ilo magibit Riso.

²² Kukula' ngaulun mangingila' ra Ukum ri Musa ondo' minatong intor Jirusalim minindagu, “Sinubol i Jisus ru Biiljibul, Tingganai ru riwato no mangani' Riso ra kuasa' mampagiru' ra riwato.”

²³ Piawo' ilo ri Jisus am indagu Io boo risilo ra abig, “Tingganai ru riwato kalo mampagiru' ra Tingganai ru riwato!

²⁴ Amon ru rondo' pamagunan mantutuliar am manggal, maaru' pamagunan raginio mapuso.

²⁵ Amon ru sambaloi mantutuliar am mantutula', sambaloi raginio maaru' mabintas ilo.

²⁶ Koson niayuk ra pamarintaan ru Tingganai ru riwato, amon ru mantutuliar am manggal, maaru' kalo makatanggang am mapuso.

²⁷ Kolondo' sangulun pana makasubol ra baloi ru sangulun maikang koson mantakou ra baloi raginio, amon ru kalo bangkilon no galing ulun maikang no, am bagu no makapantakou io ra kuliamos no.

²⁸ Balain takamin, sotopot no ngaangai' tula am asab rinagu ru ulun ampunon.

²⁹ Kaa' osoi ayuk magasab ra Ambiluo ri Aki Kapuuno', kalo ampunon io ra sabuoi-buoi no, sabap ra nambaal io ra tula mantilayun.” (

³⁰ Mindagu i Jisus koson raginio sabap ra minindagu ilo, “Sinubol Io ru riwato.”)

Ina' am pongkotob-pongkotob ri Jisus

³¹ Ratong boo ina' am pongkotob-pongkotob ri Jisus. Buoi nilo minigor ra liwar, susubo' nilo ulun mangkuot Riso.

³² Mokoondo' masuang ulun nantuturung liminimpu Riso, am indagu ilo Riso, “Ilai', ina' am pongkotob Muno soroi giu' ra liwar, am moogot tumuum Rirun.”

³³ Taam i Jisus risilo, “Mapaintutun Aku ramuyun osoi pakiinaan am pakipangkataban Kuno.”

³⁴ Monontong Io ra ulun-ulun ondo' nantuturung liminimpu Riso no am indagu, “Akau noyo ina' Kuno am pongkotob-pongkotob Kuno!

³⁵ Osoi ayuk mambaal ra kasagaan ri Aki Kapuuno', io no pongkotob Kuno ra ungkuyon, io no pongkotob Kuno ra ruandu', io no ina' Kuno.”