MARKUS 2 - Tanou Moonsoi Timugon

Namabas i Jisus ra sangulun kalo makalulu'

¹ Kukula' ngoorou boo buoi no, paat ri Jisus minatong saguli' ra pekan Kapirnaum, nakasuku' noyo tanou ra Io soroi ra baloi.

² Ratong boo ulun kumuriulu-ulu saboi kolondo' intok ngaangai' ru kulobon pana. Bubuat Nano mampasaboi ra Tanou Moonsoi risilo,

³ mokoondo' apat ngaulun matong namandas ra ulun kalo makalulu'.

⁴ Kaa' kalo makainggar ilo Riso sabap ra masuang kaga' ulun no. Sukiapo' nilo boo taap ru baloi tuma' ri Jisus no am patuuno' nilo namandasan ra ulun no.

⁵ Paat ri Jisus magilong ra nangintopot ilo toojo, indagu Io ra ulun marualan no, “Anak Kuno, tula muno inampun noyo!”

⁶ Kaa' mokoondo' niayuk kukula' ngaulun mangingila' ra Ukum ri Musa nantuturung ra giu' i, mampaguang ilo;

⁷ “Kua indagu Io koson raginio? I Aki Kapuuno' ayuk galama' makakuasa' mangampun ra tula! Magasab Io ri Aki Kapuuno'!”

⁸ Paat ragili niayuk napandayan ri Jisus ra ilo mampaguang koson raginio, am indagu Io boo risilo; “Kua pampaguang kau koson raginio?

⁹ Ati poyo matasu', mindagu ra ulun kalo makalulu' ti, ‘Tula muno inampun noyo,’ kapoam mindagu riso, ‘Tirong no, kayango' noyo tilam muno am ugar’?

¹⁰ Kaa' mapainono' Aku ramuyun ra tana' ti ra Anak ru Ulun makakuasa' mangampun ra tula.” Indagu Io ra ulun kalo makalulu' no,

¹¹ “Tirong, kayango' tilam muno am uli' no ra baloi muli!”

¹² Liliwa' ru ulun ngaangai' no magilong ra ulun kalo makalulu' no, timinirong am kayango' no tilam nano am ingkual. Nangimuag ilo kaga', nongompor ilo ri Aki Kapuuno', konilo, “Kalo poyo igondo' takau pakakito ra nasauk koson ragitio!”

Nampiau i Jisus ri Liwi

¹³ Ongoi poyo i Jisus ra kiing ru Tasik Galilia, am ulun masuang matong Riso. Mangila' Io boo risilo.

¹⁴ Liliwa' Io nansail ra giu' no, kakito No sangulun mampalulur ra cukai, inggalan nano i Liwi, anak ri Alpius. Nanturung io ra lamin ru cukai am indagu boo i Jisus riso, “Baya' no Raki'!” Bigor i Liwi am baya' Riso.

¹⁵ I Jisus am maamaya'-maamaya' Nano pana nangakan giu' ra baloi ri Liwi, masuang mampalulur ra cukai am ulun ondo' karaan ra malaat giminulung. Masuang niayuk intor risilo minaya' ri Jisus.

¹⁶ Paat ra mangingila' ra Ukum ri Musa intor ra tayar ru Parisi nakakito ri Jisus giminulung ra ulun mampalulur ra cukai am ulun-ulun ondo' karaan ra malaat, pangkuot ilo ra maamaya'-maamaya' Nano, “Kua gulung Io ra mampalulur ra cukai am ulun-ulun ondo' karaan ra malaat?”

¹⁷ Nokorongog i Jisus am indagu risilo, “Sala' ka ulun maligag makibabas, kaa' ulun marualan. Aku minatong sala' ka mampiau ra ulun ondo' moonsoi rokokoon, kaa' ulun ondo' karaan ra malaat.”

Pangkuatan ra mampali

¹⁸ Paat ra sangarawan maamaya' ri Juanis Mampariu' am ulun ru Parisi mampali. Ratong kukula' ngaulun am pangkuot ri Jisus, “Kua ra maamaya' ri Juanis Mampariu' am maamaya' ru ulun ru Parisi mampali, kaa' maamaya'-maamaya' Muti kalo?”

¹⁹ Taam i Jisus risilo, “Makapampali kia rangan-rangan ru ungkuyon uatin paat mabaya' io risilo? Buoi ru uatin no mabaya' risilo kalo makapampali ilo.

²⁰ Kaa' paat nano masuku' ungkuyon uatin no ongoyon alapo' intor risilo, am paat raginio ilo makapampali.

²¹ Kolondo' sangulun pana mapaangkup ra sabinsang konoon baguon ra bayang lairon, sabap ra amon ru koson raginio pangangangkup no mamparilak ra lairon no. Rilak nano pana gumayo poyo.

²² Koson niayuk ra kolondo' sangulun pana mampasungug ra wain baguon ralalom ru kantungan kungkung lairon. Sabap ra amon ru koson raginio wain no mamparilak ra kantungan kungkung no, suku' wain am kantungan kungkung karuruo patirin. Kaa' wain ondo' baguon no maaru' buliin ra ralalom ru kantungan kungkung baguon niayuk.”

Pangkuatan ra orou Sabat

²³ Paat ra rondo' orou Sabat, ugar i Jisus ra umo ru gandum. Paat ra ilo marapas, maamaya'-maamaya' Nano nantipu' ra kawa' ru gandum.

²⁴ Indagu boo ulun-ulun ru Parisi Riso, “Ilai'! Kua pambaal ilo ra ondo' inggalarin ru Ukum ri Musa ra orou Sabat?”

²⁵ Taam Nano risilo, “Kalo poyo kia igondo' kau pambasa' atan binaal ru raja' Daut, paat ra io am maamaya'-maamaya' nali nakayaan ra akanon?

²⁶ Minumpos io ra Baloi Tuhan, paat ri Abiatar nasauk ra Tingganai Maayo Imam Jaudi, am nangakan io ra ruti' pasulungon ri Aki Kapuuno' no. Maya' ra Ukum ri Musa osoi pana kalo makaakan ra ruti' ti, ondo' ayuk am imam-imam ru Jaudi, kaa' nangani' io poyo ra maamaya'-maamaya' nano.”

²⁷ I Jisus pana minindagu risilo, “Orou Sabat ti binaal koson pataakon ra ulun, am sala' ka ulun binaal koson pataakon ru orou Sabat.

²⁸ Ginio ra Anak ru Ulun pana, manguasa' ra orou Sabat.”