MARKUS 13 - Tanou Moonsoi Timugon

Ragu ri Jisus intor ra kalunsayan ru Baloi Tuhan

¹ Paat ri Jisus nangiruan ra Baloi Tuhan no, sangulun intor ra maamaya' Nali mindagu, “Mangingila', kinami' ilai' baloi ru Baloi Tuhan, mangasawat am mangaayo. Ilai' batu no, moonsoi kaga'!”

² I Jisus timinaam, “Baloi-baloi ra mangasawat am mangaayo no kia nakito muno? Kolondo' rondo' batu pana intor ra baloi raginio soroi ra intok nano. Ngaangai' no lunsayon.”

Kapaganan am kaimbalaan

³ Pakasuku' i Jisus ra Bulur Jaitun ondo' kalo maalur intor ra Baloi Tuhan, panturung Io am ratong boo i Pitrus, Jakubus, Juanis am i Andrias koson mangkuot Riso. Paat ragili naluluur ilo ayuk.

⁴ Indagu ilo ri Jisus, “Balai' akai ra sanggilan ngaangai' raginio masauk? Am tatandu'-tatandu' no ra mapandayan ra mamaar noyo orou ngaangai' raginio masauk.”

⁵ Taam i Jisus, “Ilalai' min, pai' kau karuung ru osoi ayuk pana.

⁶ Masuang ulun matong am migiangku ra ‘Aku noyo Io!’ Ilo ti mamparuung ra masuang ulun.

⁷ Amon ru maining min bubuor kapoam tanou ru pampatayan, pai' kau kalaa'. Baal ragitio musiti' masauk, kaa' sala' ka nasuku' noyo kiamat.

⁸ Rondo' bansa' mangayou ra bansa' ru bokon. Rondo' pagun mamulunsar ra pagun ru bokon. Ati-ati ayuk masauk tana' mogonggon am paat ra kolondo' boo akanon. Ngaangai' no talimpuun ayuk, koson ra maruol ru sangulun ruandu' paat io matipaganak.

⁹ Ilalai' min, rokopon am ibiton kau ra intok pamisaraan. Lambaan kau giu' ra baloi sambayangan. Ongoyon kau paumaa' ra tingganai-tingganai am raja'-raja', sabap ra akau maamaya' Kuno, am koson raginio akau mampaintutun risilo ra Tanou Moonsoi intor Raki'.

¹⁰ Tanou Moonsoi ti musiti' pabalaan galing ra ngaangai' bansa'.

¹¹ Paat ra akau rokopon am ibiton ra pamisaraan, pai' kau kalaa' ra atan raguon min, sabap ra paat raginio raguon min ayuk ondo' musiti' min raguon. Ragu ondo' sabiton mino sala' ka intor ra guang min, kaa' matong intor ra Ambiluo ri Aki Kapuuno'.

¹² Sangulun mampataak ra pongkotob koson ra papatayin. Ama' niayuk mambaal koson raginio ra anak nano galama', am anak-anak manggal ra matuo nilo suku' papatayin.

¹³ Ngaangai' ulun masisang ramuyun sabap ra akau maamaya' Kuno, kaa' ulun ondo' mokoorot saboi ra pupus no, ulun no bayagon.”

Sauk Malaat giu' ra Jirusalim

¹⁴ Tungguli' poyo ri Jisus ragu Nali, “Makakito kau ra ‘Sauk Malaat’ migor ra intok panginggalaran no. (Ngaangai' mambabasa' pakarati' kano ragitio!) Paat raginio, ulun ondo' soroi ra Judia musiti' magiru' ra kabuluran.

¹⁵ Ulun ondo' soroi ra rasawat ru baloi, kalo pana tumuun mangalap ra atan-atan kuliamos intor ra baloi.

¹⁶ Ulun ondo' minongoi ra umo, pai' noyo saguli' mangalap ra sukub nano.

¹⁷ Aibui boo ra ruandu' ra maapang am ondo' mampatiti' ra lalagang paat raginio.

¹⁸ Pakiasi' kano ri Aki Kapuuno' koson baal ragitio kalo masauk bulintok mangkawanan.

¹⁹ Paat raginio tumalimpuun kaimbalaan ondo' kalo igondo' kasauk ra tana' ti, intor ri Aki Kapuuno' nambaal ra tana' ti saboi raino am kalo boo baalon.

²⁰ Kinariwa' noyo ri Aki Kapuuno' orou no, amon ru kalo, kolondo' sangulun pana maayag. Kaa' sabap ra ulun pinili' Nano, kinariwa' noyo ri Aki Kapuuno' orou no.

²¹ Paat raginio, amon ru sasangulun mindagu ramuyun, ‘Ilai', Mamamayag ondo' sinusub ri Aki Kapuuno' soroi ragiti!’ kapoam, ‘Ginio Io soroi ra giu',’ pai' kau pangintopot riso.

²² Sabap ra ilo mamamayag magabau am ilo migiangku ra nabi rumatong. Mambaal ilo ra kaimuagan koson mamparuung ra ulun ri Aki Kapuuno' amon ru maalap.

²³ Ilalai' min! Ngaangai' pinabala' Ku noyo ramuyun ra kalo poyo masuku' paat raginio.”

Ratangan ru Anak ru Ulun

²⁴ “Mopongo orou kaimbalaan raginio, mato ru orou lumondom am bulan kolondo' binusasal.

²⁵ Mangaratu' butitin-butitin intor ra limbowon, am mangunguasa' ru limbowon no majajou.

²⁶ Paat raginio, makito Anak ru Ulun matong ralalom ru gaun mabaya' ra kuasa' am katulayan Nano.

²⁷ Anak ru Ulun manusub ra malaikat-malaikat mongoi ra ngaangai' pamagunan ru tana' am manimung ilo ra ngaangai' ulun pinili' ri Aki Kapuuno'.”

Pangilaan intor ra puun ru ara

²⁸ “Alapo' min ra igigilaan puun ru ara. Amon ru masansam raan nano am malami', am tumalimpuun manalantar, mapandayan min ra mamaar noyo bulintok mogorou.

²⁹ Mogondo' niayuk amon ru makito min baal raginio masauk, mapandayan min ra maar noyo kaga' ratangan nano.

³⁰ Balain takamin! Ngaangai' baal raginio masauk ra kalo poyo matoi ngaangai' ulun ondo' maayag ra raino ti.

³¹ Limbowon am tana' ti mapuso, kaa' ragu Kutu mantilayun.”

Kolondo' sangulun makapandai ra orou am paat nano

³² “Kaa' koson pana raginio, kolondo' sangulun makapandai ra orou kapoam paat nano, malaikat-malaikat giu' ra suruga' kapoam Anak; kaa' i Ama' ayuk makapandai.

³³ Ilalai' am tataanin min! Sabap ra kalo napandayan min sanggilan paat nano sumuku'.

³⁴ Sauk nano koson ra sangulun mugar ra maalur, ondo' mangiruan ra baloi nano am paalungin no ra ulipon-ulipon nano. Sigagama' inanian no ra kondoyon, am nambilin io ra ulun magagalung ra kulobon ra ilalain toojo.

³⁵ Ginio sabap ra tataanin, sabap ra akau kalo nakapandai paat ra ulian ru tatangan ra baloi; paat ra mamai', kapoam tanga' rondom, kapoam mampayung rondom kapoam matawang.

³⁶ Amon ru pulusat tatangan ru baloi no matong, pai' no karampati' kau mokororot.

³⁷ Ondo' raguon Kuno ramuyun, raguon Ku niayuk ra ngaangai' ulun: Pantataani' min!”