MARKUS 12 - Tanou Moonsoi Timugon

Abig ra ulun-ulun ondo' naniwa' ra umo ru anggur

¹ Tumalimpuun boo i Jisus mantunung ra abig ra tingganai imam Jaudi, mangingila' ra Ukum ri Musa am tingganai ru ulun ru Jaudi. Indagu i Jisus, “Mokoondo' sangulun ungkuyon nanangumo ra anggur, pagaro' no umo i. Kopongo ragili, pangkali io ra rondo' luang ra batu maayo, pamagaan ra anggur, am pambaal io ra manara masawat pagimpalan. Umo nali pana pasiwai' ra ulun bokon am ongoi io ra pagun ru bokon.

² Kasuku' pangupuan ra kawa' ru anggur, ulun ti nanusub ra sangulun ulipon mongoi pangalap ra tayar nali intor ra ulun nampasiwaan no ra umo i.

³ Kaa' rokopo' ru ulun-ulun naniwa' ulipon i am lambaa' nilo, am susubo' nilo io muli' am kalo pinagibit ra atan-atan.

⁴ Ulun tatangan ra umo no nanusub poyo ra sangulun ulipon ra bokon. Kaa' lambaa' ru ulun-ulun naniwa' no ulu ru ulipon no am tauyuo' nilo.

⁵ Panusub io boo ra sangulun ulipon ra bokon, kaa' potoyo' nilo. Masuang poyo ulipon ra bokon i, mokoondo' linamba' am mokoondo' niayuk pinatoi nilo.

⁶ Sangulun ayuk boo soroi, anak nali galama' ondo' tagamin nali. Susubo' no boo anak nali mongoi ra ulun-ulun naniwa' no, ‘Maaru' anak kutu urumaton nilo,’ pangkaraan nali.

⁷ Kaa' ulun-ulun naniwa' no nagindagu ra ilo-ilo ayuk, ‘Gitio anak nati ondo' manungkus ra rapu' nati, moonsoi potoyon takau. Tauli no itakau tatangan ra rapu' ti!’

⁸ Rokopo' am potoyo' nilo anak tatangan ra umo i. Baangkai nali patiri' nilo ra lisar ru umo no.”

⁹ Pangkuot boo i Jisus, “Atan boo alapon ru tatangan ra umo i? Maaru' matong io am potoyon no ngaangai' naniwa' no, am pasiwai' umo no ra ulun ra bokon.

¹⁰ Kalo kia igondo' kau pambasa' ragu ragitio ralalom ru Buuk Kitab? ‘Batu ondo' pinatiran ru ulun-ulun manambaloi nasauk noyo ra batu maatang.

¹¹ Ginio binaal ru Tuhan; mumpara' boo bonsoi no!’ ”

¹² Tingganai ru ulun ru Jaudi no mirot mamparakop ri Jisus, sabap ra napandayan nilo ra ilo inabigan ri Jisus. Kaa' malaa' ilo ra ulun masuang no, am iruani' nilo boo i Jisus.

Pangkuatan intor ra mambayar ra cukai

¹³ Santayaran ulun ru Parisi am ulun ru Irodis sinusub mangkinam ri Jisus ra kukula' pangkuatan.

¹⁴ Ratong ilo ri Jisus am indagu, “Mangingila', nakapandai akai ra Okou ti masalok mindagu ra motopot am kalo mangkara' ra atan ayuk pangkaraan ru ulun. Mangila' Kou ra kasagaan ri Aki Kapuuno' ondo' motopot ayuk, sabap ra Okou kalo mangkara' ra osoi ayuk ulun no. Kinami' akai balai', amon ru mambayar takau ra cukai ra Kaisar Roma, ginio makasala kia ra Ukum ri Musa, kapoam kalo?”

¹⁵ Nakapandai i Jisus ra guang nilono. Taam Io, “Kua pangkinam kau Raki'? Pakitono' min Aku ra rondo' ruit pirok.”

¹⁶ Pakitono' nilo i Jisus ra sampila' ruit pirok am pangkuot i Jisus, “Osoi ra bulos am inggalan ragitio?” “I Kaisar,” konilo.

¹⁷ Indagu i Jisus, “Amon ru koson poyo raginio, pasagulio' ra Kaisar ondo' io tatangan am pasagulio' niayuk ri Aki Kapuuno' ondo' Io tatangan.” Nangimuag ilo ngaangai' nakaining ra ragu ri Jisus.

Pangkuatan ra kaayagan saguli'

¹⁸ Santayaran ra ulun ru Saduki minatong ri Jisus. Ilo ti noyo am ulun ondo' mangkara' ra malupus matoi kalo maayag saguli'. Konilo ri Jisus:

¹⁹ “Mangingila', i Musa nanulis ritakau ra ukum ti: ‘Amon ru sangulun ungkuyon makaandu' matoi, kaa' kolondo' anak nilo, boborok no ra ungkuyon ti musiti' manangandu' ra along nano. Amon ru makaanak ilo, anak ragitio karaan koson ra sayat intor ra ralaki ra minatoi i.’

²⁰ Ragili tulu' ngaulun sangkaaka'. Katuaan i nanangandu' kaa' minatoi am kolondo' anak.

²¹ Boborok nali poyo nanangandu' ra napuor i, kaa' io pana minatoi am kolondo' anak. Koson niayuk ra boborok ra katalu

²² saboi ra pupusan i. Katulu'-tulu' nilo nanangandu' ra ruandu' i am minatoi ilo ngaangai' ra kolondo' anak. Pupus i ruandu' i pana minatoi.

²³ Paat ra orou kaayagan saguli' no, osoi boo tatangan ra ruandu' i? Sabap ra katulu'-tulu' nilo nanangandu' riso!”

²⁴ Taam i Jisus, “Sotopot no nasala kau. Kalo nangarati' kau ra Buuk Kitab am kuasa' ri Aki Kapuuno'.

²⁵ Sabap ra paat ra ngaangai' ulun minatoi maayag saguli', ilo kalo boo maguguot, kaa' maayag ilo koson ra malaikat giu' ra suruga'.

²⁶ Ra koson ra ulun matoi bayagon saguli', kalo kia igondo' kau pambasa' ra Ukum ri Musa, koson sampuun tataun magana' ondo' mapaang kaa' kalo nosolob? Ginio mokoondo' tinulisan ra i Aki Kapuuno' minindagu ri Musa, ‘Aku noyo i Aki Kapuuno' ondo' sambaan ri Abragam, ri Isak am ri Jakub.’

²⁷ Arati' no, i Aki Kapuuno' sala' ka Tuhan ondo' sambaan ru ulun minatoi, kaa' ulun maayag. Nakalayau toojo pangkaraan mino.”

Panusuban ondo' maatang kaga'

²⁸ Ratong sangulun mangingila' ra Ukum ri Musa ondo' nangkirongog ra sunur ri Jisus am ulun-ulun ru Saduki no. Rongogon no motopot taam ri Jisus i. Pangkuot io niayuk ri Jisus, “Ati rondo' panusuban ondo' maatang kaga' intor ra ngaangai' Ukum ri Musa?”

²⁹ Taam i Jisus, “Gitio noyo panusuban ondo' maatang kaga': ‘Rongog kau bansa' ru Israil! Tuhan no, Io no i Aki Kapuuno' takau. Tuhan no rondo' ayuk.

³⁰ Tagami' noyo Tuhan, i Aki Kapuuno' min ra topot-topot ru guang min, kaayagan min, pangkaraan min am ikang min.’

³¹ Panusuban maatang ra karuo: ‘Tagami' noyo ulun ra bokon koson okou niayuk motogom ra inan galama'.’ Kolondo' boo panusuban ra bokon ondo' maatang intor ra ruo ni.”

³² Indagu boo mangingila' ra Ukum ri Musa no, “Moonsoi, Mangingila'! Topot toojo ragu Muno ra Tuhan no, Io no i Aki Kapuuno' ondo' rondo' ayuk am kolondo' bokon.

³³ Ulun musiti' motogom ri Aki Kapuuno' ra topot-topot ru guang, kaayagan, pangkaraan am niayuk ikang nano. Io niayuk musiti' motogom ra ulun ra bokon koson io motogom ra inan galama'. Gumagaya' ra panusuban ra ruo ti maatang kaga' intor ra mampataak ri Aki Kapuuno' ra taak simbalui solobon am niayuk taak-taak simbalui ra bokon.”

³⁴ Nalimanan ri Jisus ra motopot toojo taam ru mangingila' ra Ukum ri Musa i. Indagu boo i Jisus riso, “Raino bagu mamaar kou masauk ra ulun ri Aki Kapuuno'.” Kopongo ragili kolondo' boo makakau' mangkuot ri Jisus koson mangkinam Riso.

Pangkuatan ra Mamamayag ondo' sinusub ri Aki Kapuuno'

³⁵ Liliwa' i Jisus mangila' giu' ra Baloi Tuhan, pangkuot Io, “Ati kulaan mangingila' ra Ukum ri Musa mangila' ra Mamamayag no papag ru raja' Daut?

³⁶ Alika i raja' Daut galama' minindagu ra io binalaan ru Ambiluo ri Aki Kapuuno', kono, ‘I Aki Kapuuno' minindagu ra Tuhan kuno: Panturung no ra pamiris Kutu saboi baalon Ku pantula' Muno kumuku' ngai' Rirun.’

³⁷ I raja' Daut galama' nampiau Riso ‘Tuhan’. Ati kulaan Mamamayag ondo' sinusub ri Aki Kapuuno' no masauk ra papag ru raja' Daut?” Ulun masuang maansayan mangkirongog ra pangilaan ri Jisus.

Pangkaraan koson pagilalain paliso ru mangingila' ra Ukum ri Musa

³⁸ Indagu Io risilo, “Ilalai' min ra mangingila' ra Ukum ri Musa no. Masaga' ilo ayuk ugar-ugar am mambayang ra sukub maawar, am masaga' ilo makitabi' ra ulun giu' ra pasar.

³⁹ Masaga' ilo manturung ra panturungan pinabatang ra saang ru baloi sambayangan am ra pangiantakan.

⁴⁰ Mamparuung ilo ra napuor-napuor am manalingaau ra baloi nilono. Koson mangampin boo ra kalaatan ru inggalan malaat nilono, kaawaron nilo makiasi'. Ukum taakin risilo ra maagu no makalalaa'.”

Taak ru sangulun napuor

⁴¹ Paat ri Jisus nanturung maar ra kaban panimungan ra ruit ru Baloi Tuhan i, tantangin No ngaangai' ulun ondo' mampasubol ra ruit nilo ra kaban no. Masuang ruit pasuangon ru ulun langkaya'.

⁴² Sangulun napuor musikin boo nampasuang ra ruo ngampila' ruit tambaga', ioginio sanganu ayuk logo nano.

⁴³ Pampiau i Jisus ra maamaya' Nano am indagu boo risilo, “Balain takamin: Ondo' pinasuang ru napuor musikin ni mauli' toojo ka pasuangon ru ngaangai' ulun bokon no.

⁴⁴ Sabap ra ngaangai' nilo nangani' intor ra suwo ru ruit nilo. Kaa' napuor i, kabalu' pana ra io musikin, pinataak no ngaangai' ondo' soroi riso no – nanaak io ra tukir ru kaayagan nano.”