MARKUS 11 - Tanou Moonsoi Timugon

Inurumat toojo i Jisus sumubol ra bandar Jirusalim

¹ Paat ra maar makasaboi ra Jirusalim, nakasuku' ilo ra libung ru pamagunan Bitpagi am Bitania, giu' ra kiing ru Bulur Jaitun. Giu' i susubo' ri Jisus ruo ngaulun maamaya' Nali

² am pambilin: “Ongoi kau ra pamagunan ra giu' no. Makasuku' kau ra giu' no makakito kau ra sanginan anak kaladai ondo' kalo igondo' sinakayan ru ulun. Bugali' min anak kaladai no am ibito' min ragiti.

³ Amon ru mokoondo' ulun mangkuot ramuyun ra akau mamugal ra anak kaladai no, balai' min, ‘Makapakuan Tuhan ragitio am pasagulion No ra mataki'.’ ”

⁴ Karuruo ngaulun maamaya' Nali pana minongoi am kakito nilo sanginan anak kaladai rinukugan ra kiing ru ralan tuma' ru kulobon ru baloi. Bugali' nilo boo.

⁵ Kukula' ngaulun ondo' siminoroi ragili nangkuot risilo, “Kua bugali' min anak kaladai no? Atan pakuan min?”

⁶ Balai' nilo ulun-ulun no ra atan nanusuban ri Jisus risilo am polosoo' ilo ayuk boo ru ulun-ulun no nagibit ra anak kaladai i.

⁷ Paat ra anak kaladai i nakasuku' ri Jisus, apini' nilo bakulung ru anak kaladai i ra bayang nilai am sakoi boo i Jisus.

⁸ Masuang ulun nangapin ra ralan i ra sukub nilai, am bokon i nangalap ra bulisang ru tataun ondo' inalap intor ra umo am pabantaa' nilo ra tanga' ru ralan.

⁹ Ulun-ulun no ondo' minugar ra saang am tinaulian ngaangai' giminolok, “Omporo' noyo i Aki Kapuuno'! Kabarakat noyo Io ondo' minatong ralalom inggalan ru Tuhan!

¹⁰ Kabarakat noyo pamarintaan Nano ra orou matong no – pamarintaan ru raja' Daut kinamatuaan takau! Omporo' noyo i Aki Kapuuno'!”

¹¹ Pakasuku' ra Jirusalim, parayus Io subol ra Baloi Tuhan am pulolowo' No ngaangai'. Paat ragili tumalimpuun noyo lumondom, Io am mopor am ruo ngaulun maamaya' Nano minongoi ra Bitania.

Ibot ri Jisus ra sampuun ara

¹² Ra iosuabon, paat ra ilo minugar intor ra Bitania, naitilan i Jisus.

¹³ Intor ra maalur nakito No sampuun ara ondo' maawas raun no. Ongoyo' No ilai' ru mokoondo' kawa'. Kaa' pakasuku' ra puun ru ara i, ilai' No raun ayuk, sabap ra paat ragili kalo poyo pangkawaan ru ara.

¹⁴ Ragui' ri Jisus puun ru ara i, “Intor raino kolondo' sangulun pana mangakan ra kawa' intor rirun ti!” Ngaangai' maamaya' ri Jisus nokorongog ra ragu i.

Sumubol i Jisus ra Baloi Tuhan

¹⁵ Pakasuku' ilo ra Jirusalim, ongoi i Jisus ra Baloi Tuhan am tumalimpuun mampagiru' ra ngaangai' ulun ondo' mantalan am mambali ra giu' i. Mija' ru ulun-ulun mangngalig ra ruit no am pantuturungan ru ulun mantatalan ra susuit asang, tinuntuar No ngaangai'.

¹⁶ Kolondo' sangulun mataak No magibit ra atan-atan kuliamos magantos ra liliut ru Baloi Tuhan i.

¹⁷ Pangila' Io boo ra ulun ondo' soroi ra giu' i. Indagu Io, “Tinulisan noyo ralalom ru Buuk Kitab koson ragitio: I Aki Kapuuno' minindagu, ‘Baloi Kuno sabiton ra intok pakiasian ru ngaangai' bansa'!’ Kaa' binaal min boo Baloi Tuhan ti ra pansibunian ru mantatakou!”

¹⁸ Tingganai imam Jaudi am mangingila' ra Ukum ri Musa nokorongog ra ragu Nani. Ginio ra tumalimpuun ilo maguyum ra ralan mamatoi ri Jisus. Malaa' ilo Riso sabap ra ulun masuang no mabunduk guang mangkirongog ra pangilaan Nali.

¹⁹ Io palunggai', i Jisus am maamaya' Nano nangiruan ra bandar no.

Pangilaan intor ra sampuun ara i

²⁰ Ra iosusuab, paat ra ilo nansail ra puun ru ara no, ilai' nilo puun no minatoi noyo suku' ra bakat no.

²¹ Kakara' boo ri Pitrus ibot ri Jisus ra puun i. Kon boo ri Pitrus ri Jisus, “Mangingila', ilai' puun ru ara ondo' inibatan Muli, naguol noyo!”

²² Taam i Jisus risilo, “Pangintopot kano ri Aki Kapuuno'!

²³ Balain takamin: Amon ru mindagu kau ra bulur no, ‘Kakayang no am patir no giu' ra raat!’ Ginio maaru' masauk amon ru kalo maimamang kau kaa' mangintopot ra ondo' raguon mino topot-topot masauk.

²⁴ Ginio ra karaa' min gitio: Paat ra akau makiasi' ri Aki Kapuuno' am makitaak ra atan ayuk, pangintopot kano ra naapu min noyo kitaakon mini, am maaru' aniin kau.

²⁵ Paat ra akau makiasi', amon ru sasangulun makasala ramuyun, ampuno' noyo galing ulun no bagu no Ama' min giu' ra suruga' mangampun niayuk ra tula min.” [

²⁶ Amon ru kalo mangampun kau ra tula ru ulun, Ama' min giu' ra suruga' niayuk kalo mangampun ra tula min.]

Pangkuatan ra kuasa' ri Jisus

²⁷ Saguli' ilo poyo ra Jirusalim. Nakapaat ri Jisus minugar ra liliut ru Baloi Tuhan i, tingganai imam Jaudi, mangingila' ra Ukum ri Musa am tingganai ru ulun ru Jaudi minatong Riso.

²⁸ Pangkuot ilo Riso, “Atan kuasa' Muno mambaal raginio? Osoi nangiou Rirun mambaal raginio?”

²⁹ Taam i Jisus, “Kuatin takamin galing. Amon ru makataam kau ra pangkuatan Kuti, bagu no mambala' Aku osoi nangiou Raki' mambaal raginio?

³⁰ Balai' min Aku: osoi nangiou ri Juanis Mampariu' no mampariu' ra ulun, i Aki Kapuuno' kia kapoam ulun?”

³¹ Tumalimpuun ilo mansusunur, konilo, “Atan paraguon takau? Amon ru mindagu takau, ‘Intor ri Aki Kapuuno',’ maaru' mindagu Io boo ritakau, ‘Kua pai' kau pangintopot ri Juanis?’

³² Kaa' mapagon niayuk mindagu, ‘Intor ra ulun…’ ” (Sabap ra malaa' ilo ra ulun masuang ondo' mangintopot ra i Juanis no sangulun nabi.)

³³ Taam ilo boo, “Kalo nakapandai akai.” Indagu boo i Jisus risilo, “Koson poyo ragino, Aku pana kalo niayuk mambala' osoi nangiou Raki' mambaal raginio.”