MARKUS 10 - Tanou Moonsoi Timugon

Pangilaan ri Jisus ra pangalian

¹ Iruani' boo ri Jisus intok raginio am ongoi ra Judia ondo' sandaup ru Sungoi Jordan. Masuang ulun minatong am liminimpu poyo ri Jisus am koson ra kaindalaman tumalimpuun Io mangila' risilo.

² Kukula' ngaulun ru Parisi minatong koson mangkinam ri Jisus. Pangkuot ilo, “Sumugut ra Ukum ri Musa, ioginio ukum ru ugama takau, iowon kia sangulun mangali ra andu' nano?”

³ Taam i Jisus ra mangkuot risilo, “Atan guat parinta tinaak ru nabi Musa ramuyun?”

⁴ Taam ilo, “I Musa nangiou koson sasangulun mangali ra andu' nano kaa' mambatik io galing ra surat pangalian.”

⁵ Indagu i Jisus risilo, “I Musa nanulis ra undang raginio sabap ra akau ti mokotog ulu.

⁶ Kaa' paat ra talimpuun i, paat i Aki Kapuuno' namingkal ra tana' ti, kon ru Kitab, ‘I Aki Kapuuno' nambaal risilo ungkuyon am ruandu'.

⁷ Ginio sabap ra sasangulun ungkuyon sumuai ra matuo nano am masimpung ra andu' nano,

⁸ am karuruo no maangun rondo'.’ Amon ru koson raginio sala' ka ruo ilo kaa' rondo'.

⁹ Ginio ra ilo ondo' kinorondo' ri Aki Kapuuno', pai' ilo noyo pantuliaro' ru ulun.”

¹⁰ Pakauli' ilo ra baloi, pangkuot maamaya' no ri Jisus ra pagagalian ti.

¹¹ Indagu i Jisus risilo, “Osoi mangali ra andu' nano am maguot ra ruandu' ra bokon, ulun no lumapau ra andu' galing nano.

¹² Koson niayuk ra ruandu' mangali ra ralaki nano am mangindalaki ra bokon, io pana lumapau niayuk.”

Nambarakat i Jisus ra kukula' ngaulun lalaing

¹³ Mokoondo' kukula' ngaulun nagibit ra lalaing patuumon ri Jisus ra mapabanta' ra kalindu' Nano koson mambarakat risilo. Kaa' maamaya' ri Jisus no siminangit ra ulun-ulun raginio.

¹⁴ Pakakito i Jisus, sangit Io am indagu ra maamaya' Nano, “Polosoo' noyo lalaing-lalaing no matong Raki'! Pai' min ingai' ilo, sabap ra ulun koson ra lalaing-lalaing ti noyo masauk ra ulun ri Aki Kapuuno'.

¹⁵ Balain takamin! Sotopot no Osoi kalo mangapu ra pamarintaan ri Aki Kapuuno' koson ra sangulun lalaing, ulun raginio kalo masauk ra ulun ri Aki Kapuuno'.”

¹⁶ Kopongo minindagu, ganggali' ri Jisus lalaing-lalaing no, am pabantaa' kalindu' Nano risilo koson mambarakat risilo.

Ulun langkaya'

¹⁷ Paat ri Jisus minintor, nanunggul ra pangkiralanan Nano, ratong sangulun nasisimbul rumampot Riso. Ulun no igulatur ra saang ri Jisus am pangkuot, “Mangingila' ra moonsoi, atan musiti' baalon kutu koson mokoowot ra kaayagan ondo' motopot am mantilayun?”

¹⁸ Taam i Jisus, “Kua guat inggalani' mu Aku ra moonsoi? Kolondo' sangulun pana moonsoi kaa' rondo' ayuk i Aki Kapuuno'.

¹⁹ Okou maaru' makapandai ra susuban ri Aki Kapuuno': ‘Pai' pampatoi, pai' lapau, pai' pantakou, pai' panguu' ra ulun bokon amon ru kalo motopot, pai' pamparuung, urumato' noyo ina' am ama' muno.’ ”

²⁰ Taam ulun no, “Mangingila', intor ra aku mamulok ayuk poyo, ngaangai' susuban raginio ginagaya' ku noyo.”

²¹ Kaa' pagilong i Jisus ra ulun no am maansayan riso, am indagu, “Rondo' ayuk boo kalo nabaal muno. Ugar no am talano' kuliamos muno, am tatayaro' ruit no ra ulun musikin, am okou pana makakuliamos boo giu' ra suruga'; am saguli' boo ragiti am baya' Raki'.”

²² Pokorongog ra ragu ri Jisus no, ulun no mangiluk toojo guang sabap ra kuliamos nano masuang.

²³ Ponontong boo i Jisus ra maamaya' Nali am indagu, “Mapara' boo pagon ru ulun langkaya' masauk ra ulun ri Aki Kapuuno'!”

²⁴ Maamaya' Nano mangimuag nokorongog ra ragu ri Jisus ni. Kaa' indagu Io poyo, “Anak kau, mapagon toojo masauk ra ulun ri Aki Kapuuno'!

²⁵ Matasu' poyo sanginan unta sumubol ra luang ru jarum ka sangulun langkaya' makaumpos ra Tana' Bagu ri Aki Kapuuno'.”

²⁶ Maamaya' ri Jisus mangimuag toojo ra pangilaan Nano am pasakuot ilo boo ra rondo' am bokon, “Amon ru koson poyo ragino osoi ayuk boo bayagon?”

²⁷ Ponontong i Jisus risilo am indagu, “Ginio kalo mabaal ru ulun, kaa' kolondo' kalo mabaal ri Aki Kapuuno'. Ngaangai' mabaal ri Aki Kapuuno'.”

²⁸ Indagu boo i Pitrus, “Ilai', ngaangai' iniruanan mai am baya' Rirun.”

²⁹ Taam i Jisus, “Balain takamin ra sotopot no, osoi ondo' nangiruan ra pamagunan nano kapoam pinongkotob nano ra ungkuyon kapoam ruandu', ina', ama' kapoam lalaing-lalaing nano, kapoam lanau am umo nano sabap ra maya' io Raki' am sabap ra mampasaboi ra Tanou Moonsoi no;

³⁰ am paat ra raino ti ulun no maaru' makaalap maatus poyo ruli'. Maruangan poyo ayanan, pinongkotob ra ungkuyon kapoam ruandu', ina', lalaing-lalaing nano, lanau am umo nano am maimbolo' niayuk. Ra orou tauli no makaalap ulun no ra kaayagan motopot am mantilayun.

³¹ Kaa' masuang ulun ondo' raino ti sumigulu, tumauli ilo am masuang ulun ondo' raino ti tumauli, sumigulu ilo.”

Kaintalu nambala' i Jisus ra patayan Nano

³² I Jisus am maamaya' Nali mangkiralan mongoi ra Jirusalim. I Jisus minugar siminigulu risilo am maimamang ilo ngaangai'. Ulun-ulun ondo' siminunu' risilo i pana nangalaa'. Igondo' poyo piawo' ri Jisus koopor am ruo ngaulun maamaya' Nali ra sangkiingan am pambala' Io risilo ra atan ondo' masauk Riso no.

³³ Indagu Io, “Rongogo' min. Raino mongoi takau ra Jirusalim. Giu' i Anak ru Ulun pataakon ra tingganai imam Jaudi am mangingila' ra Ukum ri Musa. Ukumin nilo Io ra potoyon am pataakin nilo ra ulun sala' ka Jaudi.

³⁴ Mangiis ilo Riso, tiwagin Io, loposon Io, potoyon Io kaa' malupus kataluan maayag Io saguli'.”

Kitaakon ri Jakubus am i Juanis

³⁵ I Jakubus am i Juanis no pana, anak ilo ri Jibidius, mininggaar ri Jisus am indagu ilo Riso, “Mangingila', makiindangan akai Rirun!”

³⁶ Pangkuot i Jisus risilo, “Atan pakiindanganan min Raki'?”

³⁷ Taam ilo, “Paat ra Okou mamarinta mabaya' ra kuasa' matulai moogot akai manturung ra pamiris am kait Muno.”

³⁸ Taam i Jisus, “Akau ti kalo makapandai atan gogoton mino. Makakau' kau kia manginum ra sangkir kaimbalaan ondo' maaru' inumon Kuno? Makakau' kau kia manguma' ra pampariwan kaimbalaan ondo' maaru' umaan Kuno?”

³⁹ Taam ilo, “Makakau' akai.” Indagu poyo i Jisus risilo, “Maaru' manginum kau ra sangkir kaimbalaan ondo' maaru' inumon Kuno am manguma' kau ra pampariwan kaimbalaan ondo' maaru' umaan Kuno.

⁴⁰ Kaa' osoi ondo' tumurung ra pamiris am kait Kuno sala' ka Aku mangatang. I Aki Kapuuno' mangatang osoi panturungon ra intok raginio.”

⁴¹ Paat ra mopor ngaulun maamaya' ri Jisus ra bokon no nokorongog raginio, siminangit ilo ri Jakubus am i Juanis.

⁴² Piawo' ilo ngaangai' boo ri Jisus am indagu Io, “Nakapandai kau ra tingganai ru ulun ondo' kalo makaulig ri Aki Kapuuno' mamarinta mamisi' am manginjang toojo ra mamagun nilono.

⁴³ Kaa' akau ngai' kalo koson raginio. Amon ru sangulun intor ramuyun moogot sumauk ra maatang, musiti' maangun io ra ulipon ru bokon.

⁴⁴ Amon ru osoi ayuk intor ramuyun masaga' masauk ra kasaa', musiti' maangun io ra ulipon ru ngaangai'.

⁴⁵ Sabap ra Anak ru Ulun no pana kalo minatong koson maningganai ra ulipon, kaa' Io galama' sumauk ra ulipon am mampataak ra painawo Nano koson mamayag ra masuang ulun.”

Namabas i Jisus ri Bartimius ondo' nobolou

⁴⁶ Pakasuku' i Jisus am maamaya' Nano ra bandar Jiriko. Paat ri Jisus am maamaya' Nano am niayuk ulun masuang no mangiruan ra bandar no, mokoondo' sangulun nobolou nanturung makikitaak ra kiing ru ralan. Inggalan nano i Bartimius, anak ri Timius.

⁴⁷ Pokorongog io ayuk ondo' mansail no am i Jisus, ulun ru Nasarit, pompogolok io, “Jisus, Anak ru raja' Daut! Pakaasi' no raki'!”

⁴⁸ Sinangitan io ru ulun masuang, pongkororon io. Kaa' kosongowon no poyo golok nali, “Anak ru raja' Daut! Pakaasi' no raki'!”

⁴⁹ Uog i Jisus am indagu, “Piawo' io nga!” Piawo' nilo nobolou no konilo, “Pai' pagalabo, luat no mampiau Io rirun.”

⁵⁰ Aluso' ru ulun bolou no bayang maawar nano am patiri', am indibok bigor am rapog ri Jisus.

⁵¹ Pangkuot i Jisus, “Atan kitaakon muno Raki'?” Taam nobolou no, “Mangingila', masaga' aku makakito.”

⁵² Indagu i Jisus, “Ugar no, sabap ra mangintopot kou Raki' mababas kou noyo.” Paat ragili niayuk makakito boo ulun no. Baya' io boo ri Jisus nangkiralan.