MARKUS 1 - Tanou Moonsoi Timugon

Tanou pinasaboi ri Juanis Mampariu'

¹ Gitio noyo talimpuun Tanou Moonsoi, i Jisus Kristus, Anak ri Aki Kapuuno'.

² Tanou ti koson ra tinulisan ru nabi Jisaya, kon ragino, “Kon ri Aki Kapuuno', ‘Gitio noyo ulun sinusub Kutu. Ulun sinusub kutu, magulu io Rirun, maa' raginio mambaal io ra ralan Muno.’

³ Makaulun mampipiau giu' ra tana' kaagisan, ‘Pongoono' noyo ralan ru Tuhan, baniso' noyo pansailan Nano.’ ”

⁴ Koson ra tinulisan no, nogondo' niayuk i Juanis Mampariu' siminila' giu' ra tana' kaagisan. Mampariu' ra ulun am mampabala' ra tanou ri Aki Kapuuno', kono, “Talikur kano intor ra tula mino am pakiriu' kano am ampunon kau boo ri Aki Kapuuno'.”

⁵ Masuang ulun intor ra Judia am bandar Jirusalim minongoi pangkirongog ri Juanis am liliwa' nilo nangakun ra tula nilo, riwon ilo ra Sungoi Jordan.

⁶ Binayang ri Juanis binaal intor ra bulu ru unta am abot nano kungkung. Akanon nano gapu' am ruu' ru maningot.

⁷ Gitio noyo ondo' pinabala' nali, “Mopongo aku, matong poyo sangulun ondo' maayo kaga' kuasa' ka aku. Mamugal ra kaputan ru kasut Nano pana kalo maaya' aku.

⁸ Riwon takamin ra timug, kaa' Io mampariu' ramuyun ra Ambiluo ri Aki Kapuuno'.”

Nampariwan ri Jisus

⁹ Paat ragili ratong i Jisus intor ra pekan Nasarit, libung ru Galilia, am riwo' Io ri Juanis ra Sungoi Jordan.

¹⁰ Paat ra Io minasak intor ra sungoi i, makito No ra limbowon pabulowo am Ambiluo ri Aki Kapuuno' timinuun Riso koson ra susuit asang.

¹¹ Morongog boo bolos ri Aki Kapuuno' mambala'; “Okou noyo Anak Kuno ondo' tagamin Kuno, maansayan Aku Rirun.”

Nangkinaman ri Jisus

¹² Kopongo ragili, indibok Ambiluo ri Aki Kapuuno' nangaak Riso mongoi ra tana' kaagisan.

¹³ Minayan Io ra giu' buoi apat ngoopor ngoorou, kininaman Io ru Tingganai ru riwato. Io soroi ra giu' am nagiantanga' ra bibiag masigo am malaikat nangindangan Riso.

Nampiau i Jisus ra apat ngaulun mangimpait

¹⁴ Kopongo i Juanis rinakop, ratong noyo i Jisus ra Galilia pampasaboi ra Tanou Moonsoi intor ri Aki Kapuuno'.

¹⁵ Ragu Nano, “Paat nano naukop noyo; i Aki Kapuuno' tumalimpuun mamarinta. Talikur kano intor ra tula mino am pangintopot kano ra Tanou Moonsoi ti!”

¹⁶ Paat ri Jisus nangkiralan mansusug ra Tasik Galilia, kakito No ruo ngaulun mangimpait, i Simon am i Andrias magaka'. Namparalo ilo.

¹⁷ Indagu i Jisus risilo, “Ibok, baya' kano Raki', am ilaan takamin mangkimait ra ulun maya' Raki'.”

¹⁸ Iruani' nilo ayuk ralo nilono am baya' Riso.

¹⁹ Pakasail ayuk koborok i Jisus, ilai' No i Jakubus am i Juanis, anak ilo ri Jibidius. Tatanga' ilo mamuna' ra ralo ralalom ru parau.

²⁰ Nalingas i Jisus nampiau risilo maya' Riso. Iruani' nilo ama' nilono, i Jibidius, ondo' soroi ra parau, nababaya' ra ulun ginajian no, am baya' ilo ri Jisus.

Ulun sinubol ru riwato

²¹ Pakasuku' i Jisus am maamaya'-maamaya' Nano ra pekan Kapirnaum. Paat ra orou Sabat ra sumunu' no, mumpos i Jisus ra baloi sambayangan am tumalimpuun mangila'.

²² Ulun ondo' mangkirongog Riso mangimuag ra pakuan Nano mangila', sabap ra Io mangila' makakuasa', sala' ka koson ra mangingila' ra Ukum ri Musa no.

²³ Paat ragili, sangulun ondo' sinubol ru riwato minumpos ra baloi sambayangan am pompogolok.

²⁴ Kono, “Atan kia kitaakon Muno ramon, O Jisus, ulun ru Nasarit? Masaga' Kou kia mamuso ramon? Nakapandai aku osoi Kou: Okou noyo ulun sinusub ondo' binantu' ri Aki Kapuuno'!”

²⁵ Inggalari' ri Jisus riwato no, indagu Io, “Pongkoror am ingkual no intor ra ulun ti!”

²⁶ Ugogogo' ru riwato no inan ru ulun no. Pompogolok io liliwa' ingkual intor ra inan ru ulun i.

²⁷ Ngaangai' ru ulun nangimuag saboi mindagu ilo rondo' am bokon, “Atan kia nua' gitio, rondo' pangilaan nakabagu? Ulun ti makakuasa' mampagiru' ra riwato am gumagaya' ilo ra susuban Nano!”

²⁸ Tanou ri Jisus ti matasik nakatabual ra ngaangai' libung ru Galilia.

Namabas i Jisus ra ulun masuang

²⁹ Iruani' ri Jisus am maamaya' Nano baloi sambayangan no am parayus ongoi ra baloi ri Simon am Andrias. I Jakubus am i Juanis minaya' risilo.

³⁰ Iwan ruandu' ri Simon botoi-botoi sabap ra mansalom. Kakasaboi nilo ra giu', pambala' ilo mataki' ra babaal nano ri Jisus.

³¹ Ongoi Io ra intok ru ruandu' no, guuto' No kalindu' nano am sukalo' No. Kairu' boo salom nali am kalo nabuoi minongoi io pansulung risilo.

³² Io palunggai', nokotolop noyo mato ru orou, ngaangai' ulun marualan am sinubol ru riwato pinauma' nilo ri Jisus.

³³ Ngaangai' ulun namagun ra pekan no kumuriulu-ulu ra lisar ru baloi no.

³⁴ Masuang ulun ondo' nansalinut maruol binabas No am nampagiru' Io ra masuang riwato. Inggalari' No riwato-riwato no mindagu sabap ra nakaulig ilo Riso.

Nambala' i Jisus ra Tanou Moonsoi giu' ra libung ru Galilia

³⁵ Suabon no, maar matawang, luat i Jisus am ongoi ra lisar ru pekan. Minongoi Io ra intok masiluk sabap ra makiasi' Io ra giu' no.

³⁶ Kaa' i Simon am rangan-rangan nali naguyum Riso.

³⁷ Pakatuum ilo Riso indagu ilo, “Ngaangai' ru ulun maguyum Rirun.”

³⁸ Taam Io, “Ibok kano ongoi takau ra pekan ra bokon no ondo' libung ru gitio. Giu' no pana, musiti' mampabala' Aku ra Tanou Moonsoi, sabap raginio ra Aku minatong!”

³⁹ Ugar Io boo ra tikop-tikop ru Galilia. Pambala' Io ra Tanou Moonsoi ralalom ru baloi sambayangan am mampagiru' Io ra riwato.

Namabas i Jisus ra sangulun makamaruol ra kungkung ra maaja'

⁴⁰ Sangulun ondo' makamaruol ra kungkung ondo' maaja' minuma' ri Jisus. Ulun no migulatur am indagu, “Amon ru masaga' Kou, maalap Mu aku ra babas.”

⁴¹ Makaasi' i Jisus ra ulun no. Pokopoo' No kalindu' Nano ra ulun no liliwa' No mindagu, “Maansayan Aku, kababas no!”

⁴² Paat ragili niayuk maruol nano nairu' am ulun no nababas noyo.

⁴³ Susubo' boo ri Jisus ulun i mugar am pinson No bilini',

⁴⁴ “Karaa', pai' pantunung ra nasauk ragitio ra osoi-osoi ayuk pana, kaa' ongoi no ra imam Jaudi am polosoo' io mangiou ra okou nababas noyo. Mopongo raginio, pangani' noyo ra taak simbalui sumugut ra nanusuban ri Musa, koson mapaintutun ra ulun ra okou ti raino nababas noyo.”

⁴⁵ Kaa' ulun no minugar am mantutunung ra ati-ati ayuk ra io ti binabas noyo. Saboi i Jisus kalo boo makaumpos mintalang ra ati ayuk pekan. Nongkoror Io ayuk ra intok masiluk am ulun intor ra ati-ati minatong Riso.