MAMPATANOU 6 - Tanou Moonsoi Timugon

¹ Nakakito aku ra kolondo' katimpakan ondo' mangimbolo' ra ulun ru tana' ti.

² Nangani' i Aki Kapuuno' ra ulun ra rapu', kalangkayaan am urumat – atan ayuk ondo' gogoton nilo, kaa' kalo mangiou i Aki Kapuuno' risilo sumia' ra ngaangai' tinaakan no. Kaa', ulun ondo' kalo nauligan makasia' ra kalangkayaan raginio. Ngaangai' no kolondo' onong am kalo matimpok.

³ Sangulun maaru' lair makalalaing suku' maatus ngaulun, am umur nano maaru' lair maawar. Kabalu' pana maawar umur nano, kaa' kalo maansukan io, am kalo linobong io ra matanda', baal nano makaasi'-asi' poyo intor ra lalagang minatoi paat ra inanak.

⁴ Kolondo' onong toojo lalagang no inanak; minugar io ralalom kalandaman am lilianin ru ulun.

⁵ Lalagang no kalo makakito ra sinda mato ru orou kapoam makasia' ra kaayagan. Kaa' makatangus io am mokororo'.

⁶ Baal raginio moonsoi poyo intor ra ulun ondo' maayag ruo ngaribu ngambilor kaa' kalo igondo' nakasia' ra kaayagan, sabap karuruo no mongoi ra intok nogondo'.

⁷ Ulun gumogot toojo mangandoi koson maguyum ra akanon, kaa' kalo niayuk mapandai maukop.

⁸ Atan nua' mauli' ra ulun mapintar amon pogondoon ra ulun kolondo' katutunan? Atan nua' onong ru ulun musikin ondo' makapaliso moonsoi ra tatanga' ru ulun?

⁹ Ngaangai' no kolondo' onong koson kandoi mangilou ra angin. Moonsoi poyo maringkuanang kou ra atan ondo' soroi rirun intor ra masalok kou gumogot ra atan ondo' kolondo' rirun.

¹⁰ Ngaangai' ondo' nasauk inaru' noyo intor ra galing i, am nakapandai takau ra ngaangai' ulun kalo makagula' ra ulun ondo' makakuasa' poyo.

¹¹ Jumanjai ilo mansang, jumanjai kolondo' onong, am ilo kalo makaalap ra ampos ru atan ayuk.

¹² Atan koson ulun makapandai ra atan ondo' moonsoi kaga' tayar ru kaayagan nilo ondo' mariwa' am kolondo' onong ti – kaayagan ondo' mataki' lumiot koson ra babara'? Atan koson ulun makapandai ra atan ondo' masauk ra tana' ti malupus ra ilo matoi?