MAMPATANOU 4 - Tanou Moonsoi Timugon

¹ Kopongo raginio nakakito aku poyo ra ngaangai' kolondo' katimpakan ondo' masauk ra tana' ti. Ulun ondo' naimbolo' mantangi' am kolondo' sangulun pana mangindangan risilo. Kolondo' sangulun pana makakau' mangindangan risilo sabap ra ulun-ulun mangimbolo' no makakuasa'.

² Mapara' piboo bansuk ru ulun ondo' minatoi; baal nilo moonsoi poyo intor ra ulun ondo' lakat poyo maayag.

³ Kaa' ondo' maansukan toojo ioginio ulun-ulun ondo' kalo poyo inanak, sabap ra ilo kalo poyo nakakito ra kalaatan ondo' binaal ralalom ru tana' ti.

⁴ Nakapandai aku niayuk ra ulun gumogot toojo mangandoi; sabap ra ilo mangusolon amon makakito ra sambalayan nilo. Kaa ginio ngai' kolondo' onong. Paliso raginio koson ra ulun ondo' mangilou ra angin.

⁵ Kon nilo, ulun kalo matanda' ayuk ondo' manturung ra kalindu' pogompoyon am mompoloso ra inan nano matoi maitilan.

⁶ Maaru' lair motopot ginio, kaa moonsoi poyo makarapu' koborok mabaya' ra guang mamaan, intor ra masalok mingkotog toojo mangandoi ra ruo longon am mangilou ra angin.

⁷ Mokoondo' poyo ondo' kolondo' onong ralalom ru kaayagan ti.

⁸ Mokoondo' ulun ondo' maayag misangulun ra kolondo' anak kapoam pabukat. Kabalu' pana raginio, kalo lumonggo' io mangandoi. Kalo majala' io ra rapu' ondo' linonggom nano. Mangandoi io ri osoi saboi mingkotog mangandoi am mangimpai ra katasuan? Sala' ka kia ginio kolondo' onong, am rondo' baal ru kaayagan ondo' mangiluk?

⁹ Moonsoi poyo mikaruo intor misangulun, sabap ra ilo ruo makapangandoi am ampos nano moonsoi poyo.

¹⁰ Amon ru sangulun maratu', rondo' ti poyo makapangindangan riso. Kaa' amon ulun no misangulun, am maratu', alii boo riso sabap ra kolondo' sangulun pana mangindangan riso.

¹¹ Amon ru ruo ngaulun marumak ra mombolong ilo makapantilasu' ra inan, kaa' atan koson mampalasu' ra inan amon ru io ayuk sangulun?

¹² Ulun ondo' misangulun matasu' maala, kaa' amon ru ruo ngaulun makaanggal ra bulunsar. Talu ngakalat ondo' pinampitol masauk ra rondo' kalat, mapagon kaga' bukaton.

^13-14 Sangulun musikin maaru' lair masauk ra raja'; sangulun rinakop maaru' lair makaturung ra turungan ru raja'. Kaa' amon ru paat ra umur matutuo toojo, raja' no kolondo' toojo katandaan saboi kalo boo masaga' mangapu ra bilin, ginio ra nasip nano malaat poyo intor ra sangulun ondo' musikin kaa mapirot.

¹⁵ Mangkara' aku ngaangai' ulun ra tana' ti, am nalimanan ku ra ilo po ngai' no mokoondo' sangulun tuu' bagu malit ra raja'.

¹⁶ Suang ru mamagun ondo' pinarinta ru sangulun raja' maaru' lair kalo nauntob, kaa' amon ru matoi raja' no, kolondo' sangulun pana maringkuanang ra binaal moonsoi nano. Ginio pana kolondo' onong, koson kandoi mangilou ra angin.

Pai' lingasi' mambaal ra bantu'

¹⁷ Pagilalain amon mongoi ra Baloi ru Tuhan. Moonsoi poyo mongoi ra giu' koson migigila', intor ra mampataak ra taak simbalui koson ra ulun kalo matanda' ondo' kalo makapandai ati rondo' motopot am kalo motopot.