MAMPATANOU 3 - Tanou Moonsoi TimugonNgaangai' no mokoondo' ra paat nano 1 Ngaangai' mokoondo' ra tana' ti masauk ra paat ondo' inaru' ri Aki Kapuuno'. 2 Io no nangaru' ra paat koson maganak am paat ra patayan, paat ra mantanom am paat ra bubulon, 3 paat ra mamatoi am paat ra mamabas, paat ra mamunsag am paat ra mambaal. 4 Io nangaru' ra paat koson mantangi' am paat ra makakurit, paat ra mangulir am paat ra lumigo', 5 paat ra mansilar am paat ra mongorot ra inan, paat ra gumanggol am paat ra mongorot ra guang. 6 Io nangaru' ra paat koson mokoowot am paat ra matatakan, paat ra koson mambuli am paat ra mamatir, 7 paat ra mamparilak am paat ra mampikit, paat ra mongkoror am paat ra mindagu. 8 Io nangaru' ra paat koson tumogom am paat ra masisang, paat ra mangayou am paat ra mobonsoi. 9 Atan nua' ampos ru binaal takau ti? 10 Nakapandai aku noyo ra i Aki Kapuuno' nangani' ra kapaganan ondo' maagat kaga' ritakau. 11 Io noyo nangaru' ra paat ondo' motopot toojo ra ngaangai' baal. Io niayuk ondo' nangani' ritakau ra kasagaan koson makapandai ra paat orou rumatong, kaa' kalo nangani' Io ra karatian intor ra ngaangai' binaal Nano intor ra talimpuun saboi ra pupus. 12 Ginio ra, nakaliman aku boo ra ondo' moonsoi baalon takau iono masalok maansukan am mirot toojo paat ra itakau lakat poyo maayag. 13 Itakau ngaangai' musiti' mangakan, manginum am makasia' ra ampos ru binaal takau sabap ra ngaangai' no tinaakan ri Aki Kapuuno'. 14 Makapandai aku ra ngaangai' ondo' binaal ri Aki Kapuuno' ti mantilayun. Ulun kalo makapamparuang kapoam mangiruru' raginio. Nambaal i Aki Kapuuno' koon raginio maa' raginio urumaton takau Io. 15 Atan ayuk ondo' masauk kapoam masauk ra maagu no nasauk noyo ra galing i. I Aki Kapuuno' nangaru' maa' raginio atan ondo' nasauk raino, masauk poyo saguli'. Kolondo' katimpakan ra tana' ti 16 Suai raginio, nakito ku niayuk ra tana' ti, giu' ra intok ondo' musiti' mokoondo' ra katimpakan am moonsoi, giu' no mokoondo' ra kalaatan. 17 Karaan kuno, mangakim i Aki Kapuuno' ra ulun moonsoi am malaat, sabap ra moonong baal am moonong binaal masauk ra paat ondo' naaru'. 18 Gitio noyo guangon kuno: Mangkinam i Aki Kapuuno' ritakau koson manulu' ra nasip takau nogondo' ra nasip ru bibiag. 19 Sala' ka kia ulun am bibiag no nogondo' ayuk nasip nilo? Karuruo no ondo' naayag am mapandai matoi. Ulun kalo niayuk moonsoi poyo intor ra bibiag, sabap karuruo no maayag am kolondo' onong. 20 Karuruo no sumaguli' ra intok nogondo' – ralalom ru tana'. Karuruo no intor ra tana' am sumaguli' niayuk ra tana'. 21 Osoi kia' makapandai ra ambiluo ru ulun mongoi ra rasawat am ambiluo ru bibiag mongoi ralalom ru tana'? 22 Ginio ra, aku nakaliman ra kolondo' ondo' moonsoi kaga' ra tayar ru ulun intor ra sumia' ra ampos ru kandoi nano. Suai raginio kolondo' atan ondo' maalap kabaal. Kalo lair makapandai takau ra ondo' baal masauk malupus ra itakau matoi. |
Hakcipta © Bible Society of Malaysia, 2013.
Bible Society of Malaysia