MAMPATANOU 2 - Tanou Moonsoi Timugon

¹ Namatas aku koson mapakaansuk ra guang galama' maa' raginio makapandai atan arati' ru kaansukan, kaa binaal kuno kolondo' onong.

² Nakapandai aku no ra kurit no koson mampailong ra kalo matanda' am katasuan kolondo' onong.

³ Sabap ra inunsu' ru gogot ru guang galama' koson mokoowot ra kapintaran, manginum aku ra wain am mambaal aku ra kasagaan galama' koson mapakaansuk ra guang. Indos kuli gitio noyo ralan moonsoi kaga' ra ulun koson sumia' ra kaayagan ondo' mariwa' kaga' ra tana' ti.

⁴ Nakasugut aku no ralalom masuang baal. Nanambaloi aku no am manangumo ra anggur.

⁵ Mangandoi ra taman am umo ondo' tinanaman ku ra masuang kaga' puun ru kinawa'.

⁶ Mangkali aku ra parit koson manimug ra taman am umo no.

⁷ Mokoondo' aku ra masuang ulipon, ondo' binali ku kapoam ondo' inanak ra baloi kuno. Mokoondo' aku ra masuang tinambiag intor ra ulun ondo' igondo' minayan ra Jirusalim.

⁸ Nanimung aku ra mas am pirok intor ra raja'-raja' ralalom ru pagun-pagun ondo' kinuasa' kuno. Ulun maririmbai ungkuyon am ruandu' marimbai koson mapakaansuk ra guang kutu ralalom ru rimbai-rimbai nilo, am mokoondo' aku ra masuang kaga' ruandu' ondo' kalaayin kuno.

⁹ Topot, ra aku ti maayo kaga' kuasa' intor ra ulun ondo' nakaili' minayan ra Jirusalim, am kuasa' kuno masalok mangindangan raki'.

¹⁰ Nakaalap aku no ra atan ayuk gogoton ru guang kuno. Kalo igondo' aku pakaili' mongorot ra inan kuno intor sumia' ra atan ayuk kaansukan. Naansukan aku ra ngaangai' baal ondo' piniratan kuli. Ngaangai' no ampos ru binaal kuli.

¹¹ Kopongo raginio karaan kuno ra ngaangai' ondo' binaal kuli, am mapara' boo kinaikang kuno nambaal raginio. Nalimanan ku boo ra ngaangai' kolondo' arati' nano. Binaal kuno kolondo' onong koson mangilou ra angin.

¹² Sangulun raja' makapambaal ra atan ayuk binaal ru raja'-raja' ondo' nakapagulu riso. Aku pana tumalimpuun mangkara' ra kapintaran, sasambungon am kolondo' katandaan.

¹³ Nakapandai aku no, “Kapintaran moonsoi poyo intor ra kolondo' katandaan, koson ru sinda moonsoi poyo intor ra kalandaman.

¹⁴ Ulun mapintar makapandai ra intok ondo' angayan nilo, am ulun kalo matanda' kalo makapandai ra ati rondo' ralan ugaran nilo.” Kaa' nakapandai aku niayuk ra pupus nilono ngaangai' no nogondo'!

¹⁵ Karaan ku, “Pupus kuno nogondo' ayuk ra pupus ru ulun kolondo' katandaan. Ginio ra, atan onong no ru mapintar aku?” Ginuang ku ra kapintaran kutu totopot kolondo' onong.

¹⁶ Kolondo' sangulun pana mangkara' ra ulun mapintar, kapoam ulun kolondo' katandaan. Ilo ngaangai' lilianin paat ra orou rumatong. Ngaangai' ulun musiti' matoi, ulun ondo' mapintar am niayuk ondo' kolondo' katandaan.

¹⁷ Ginio ra, kolondo' arati' ru kaayagan ti raki', sabap ra nakaili' aku noyo ra ngaangai', nangani' ayuk raki' ra kapaganan. Ngaangai' no kolondo' onong; nangilou aku ayuk ra angin.

¹⁸ Kolondo' rondo' pana ondo' binaal am naalap kuli makaarati' ralalom ru kaayagan kuno, sabap ra nakapandai aku noyo ra musiti' pataakon ku gitio ra ulun malit raki'.

¹⁹ Osoi makapandai? Maaru' lair mapandai io! Maaru' lair kolondo' katandaan! Kaa' io noyo nanungkus ra ngaangai' ondo' binaal kutu; ngaangai' ondo' naalap kuli ra tana' ti intor ra kapintaran kutu. Ngaangai' no kolondo' onong.

²⁰ Ginio ra pansagulian guang kutu sabap ra matipatoi aku nangandoi.

²¹ Sasangulun gumogot toojo ralalom ru binaal no maya' ra kapintaran, katutunan, am katasikan nano, kopongo raginio pinataak kalalaat ngaangai' ampos ru kandoi nano ra sangulun ondo' kalo nakaili' toojo mambaal ra kandoi raginio. Sala' ka kia kolondo' toojo arati' ru ginio am kolondo' katimpakan?

²² Ulun mangandoi am maimamang buoi ru bayag nilo, kaa' atan nua' ampos nano?

²³ Buoi ru bayag nilo, ngaangai' binaal nilai namparatong ra kaimamangan am karualan ru guang. Paat ra rondom ti magalabo toojo guang nilo. Ngaangai' no kolondo' onong!

²⁴ Atan ayuk ondo' nabaal ru ulun io ginio maangkan, manginum, am sumia' ra ampos ru kandoi nilo. Kaa' nalimanan ku ra ngaangai' ragitio tinaakan ri Aki Kapuuno' niayuk.

²⁵ Osoi makaalap ra akanon am sumia' ra kaayagan amon ru kolondo' ri Aki Kapuuno'?

²⁶ Nangani' i Aki Kapuuno' ra kapintaran, katutunan am kaansukan ru ulun ondo' napabansuk Riso. Kaa' ulun makatula sinusub No mangandoi maguyum ra rapu' am mangumung ra ampos, am pupus no ngaangai' no pataakin ra ulun ondo' mapabansuk ra guang ri Aki Kapuuno'. Ngaangai' no kolondo' onong, koson mangilou ra angin.