MAMPATANOU 12 - Tanou Moonsoi Timugon

¹ Ginio ra karaa' noyo Io Namangun ramuyun paat ra akau mamulok, ra kalo poyo makasaboi bulintok kaimbalaan min am mindagu kau, “Kalo nakasia' akai ra kaayagan.”

² Bulintok raginio mato min kalo boo makakito saboi sinda ru mato ru orou, bulan am butitin masauk ra molondom. Kapaganan koson ra gaun masait mompolondom ramuyun.

³ Longon min tumontol am kalo boo makapanindung. Kaikangan ru kalayam min lumawo. Ripon min kalo boo maukop koson manapa' ra akanon am mato min kalo boo makakito.

⁴ Talingo min mabarat, saboi kalo boo mokorongog kou ra ginia' giu' ra ralan. Akau kalo boo mokorongog ra bolos ru kinsaran kapoam bolos ru miujik. Bolong min kalo boo maamis; makatirong kau moonong ra susuit no mamios.

⁵ Malaa' kou magaloi ra intok ondo' masawat kaga', am musiti' ilalain ra mugar. Abuk min makauan, am kalayam min ralaaton min paat ra akau mugar, am ngaangai' guangon min am gogoton min lumiot. Sumuku' takau ra intok pupus, am ngaangai' ulun mantangi' buoi mangkiralan.

⁶ Sisigot pirok maukat am lampung ru mas maratu' am maabak; kalat ru baladi giu' tulubong naukat am rarapu' nagagai.

⁷ Inan takau masauk saguli' ra kaau ra tana' ti. Painawo ru kaayagan takau sumaguli' ri Aki Kapuuno' ondo' nangani' ritakau.

⁸ Ngaangai' no kolondo' onong, kon ri Ulun Mangkara'.

Ontoson ragu

⁹ Kaa' i Ulun Mangkara' i mapintar; ginio ra nagulayun io nangila' ra ulun ra baal ondo' napandayan no. Tinutun no amsal am kininaman no katapatan nano.

¹⁰ Gumogot io koson mindagu ra ragu ondo' moonsoi. Kabalu' pana raginio ragu ondo' tinulisan nano mabanis.

¹¹ Rinagu ru ulun mapintar koson ra jujuga' malarom ondo' pinakai ru magagalung koson mantamung ra domba, am santimungan ra amsal maikang koson ra paku' ondo' pinatansok ra malandom kaga'. Ngaangai' no tinaakan ri Aki Kapuuno', rorondo' ayuk Magagalung ritakau.

¹² Alii ra anak ku ngai', mokoondo' poyo ondo' musiti' kau makapandai: manulis ra buuk kolondo' pupus nano, am najanjayan suang ru igilaan mantibagui ra inan.

¹³ Gitio noyo ontoson ragu intor ra ngaangai' no: Uramato' noyo i Aki Kapuuno' am gagaya' no ra ngaangai' susuban Nano, sabap ra ginio noyo kuayan itakau ulun inangun.

¹⁴ Mangakim i Aki Kapuuno' ra ngaangai' binaal takau, ondo' moonsoi, ondo' malaat, am poyo ondo' nakasibuni.