MAMPATANOU 10 - Tanou Moonsoi Timugon

¹ Baangkai ru bulongor nampalaat ra sambutul umau maamis owou, koson raginio niayuk ra kalo matanda' koborok ondo' makairu' ra kapintaran masawat kaga'.

² Topot ra ulun mapintar masalok mambaal ra motopot, am ulun kalo matanda' masalok mambaal ra ondo' sala.

³ Kalo matanda' nilono makito am poyo matuum ilo ru ulun giu' ra tanga' ralan. Nampakito ilo ra ilo ti kalo matanda' ra ngaangai' ulun.

⁴ Amon siminangit panguasa' i ramuyun, pai' longgo' ra kandoi; kasalaan ondo' maayo maampun amon tumaan guang min.

⁵ Mokoondo' poyo ondo' inilayan ku kalo natimpok ra tana' ti: kolondo' katimpakan ondo' binaal ru panguasa'.

⁶ Ulun kalo matanda' inanian ra intok ondo' lansanin toojo, kaa' ulun ondo' langkaya' no ininggi'.

⁷ Nakaili' aku nakakito ra ulipon nangura' ra kuda, kaa' ulun bangsawan mantana' koson ra ulipon.

⁸ Osoi ayuk nangkali ra luang ra tana', maratu' ilo ra ralalom nano. Osoi ondo' nomopol ra timbok no tindukon ru kukuo.

⁹ Osoi ondo' nangandoi giu' ra kuari ru batu mapilatan matiu' ru batu. Osoi ondo' nampalapak ra luton, maaru' lair mapilatan.

¹⁰ Amon ru kapak muno mangangol am kalo inasa', musiti' kou mingkotog poyo mangandoi. Moonsoi poyo atangon mu galing.

¹¹ Amon ru kukuo pinoloso maninduk ra kalo poyo pinakaup, ragu-ragu ru babalian kukuo no kolondo' boo onong.

¹² Rinagu ru ulun mapintar namparatong ra urumat ru inan nilo galama', kaa' rinagu ru ulun kalo matanda' nampalaat ra inggalan nilo galama'.

¹³ Tumalimpuun ilo mindagu ra ragu kolondo' ampos, am pupus nano mindagu koson ra ulun mantuyang.

¹⁴ Ulun kalo matanda' mindagu kalo makakai'. Kolondo' sangulun pana makapandai ra baal ondo' masauk ra orou rumatong, am kolondo' sangulun pana mambala' ritakau ra baal ondo' masauk malupus ra itakau matoi.

¹⁵ Sangulun ondo' nangandoi saboi nakai' ikang ru inan koson ra sangulun kalo matanda' ondo' kalo makapandai ra ralan mongoi ra baloi nano galama'.

¹⁶ Aibui boo ra rorondo' pagun ondo' lakat poyo mamulok raja' nano am tingganai nano munsag saboi masuaban.

¹⁷ Kaa' moonsoi ondo' pagun mokoondo' ra raja' nano ondo' matanda' manguasa' am tingganai nano mangakan ra bulintok ondo' inaru', mapandai mongorot ra guang am kalo gumauk.

¹⁸ Taap ru baloi mapasut amon ru kalo punaan, am pupus no maaba' baloi no kinibit ru katiaran.

¹⁹ Bunsag mapabansuk ra guang min, wain pana mampakurit ramuyun, kaa' karuruo no kalo maalap min amon ru kolondo' ruit.

²⁰ Pai' asabi' raja', kabalu' pana ralalom ru guang min, am pai' asabi' ulun langkaya', kabalu' pana giu' ra lamin muno galama'. Maaru' lair sanginan susuit mokorongog ra atan ondo' rinagu muli, am posoboyon no ra ulun raginio.