MALIAKI 3 - Tanou Moonsoi Timugon

¹ Tumaam Tuhan Ondo' Maayo Kaga' Kuasa', “Atarin Ku ulun sinusub Kuno koson manampos ra ralan Kuno. Pulusat ru Tuhan ondo' uyumon min, matong ra Baloi ru Tuhan. Ulun sinusub Kuno ondo' inaanin min matong am mampatanou ra nabantuan Kuno.”

² Kaa' osoi kia ondo' tumaan ra orou Io matong am mintalang ra inan? Io koson ra sabun ondo' totopot makalulu' am koson ra apui ondo' manuyu' ra logam.

³ Matong Io koson mangakim ra ulun, koson sangulun ondo' mamasau am manuyu' ra mas am pirok, koson niayuk ra ulun sinusub ru Tuhan mamasau toojo ra imam-imam maa' raginio mampataak ilo ra taak simbalui ondo' maaya' pataakon ra Tuhan.

⁴ Kopongo raginio koson ra galing i, maansukan Tuhan ra taak simbalui ondo' pataakon Riso ru mamagun ru Jiuda am Jirusalim.

⁵ Mindagu Tuhan Ondo' Maayo Kaga' Kuasa', “Matong Aku koson mangakim ramuyun. Mataki' Aku masauk ra sasi' koson manggal ra ulun mapandai kaga' ra sihir, ulun mansawa', ulun mangani' ra inono' kalo motopot, ulun nambaal ra malaat ralalom ru baal mampagaji' ra ulun mangandoi, ulun ondo' mangimbolo' ra ruandu' napuor, nailusan ra matuo, am ulun bansa' ra bokon, am niayuk ra ngaangai' ulun ondo' kalo mangurumat Raki'.”

Taak Sampiopor

⁶ “Aku noyo Tuhan; kalo makulau Aku. Ginio ra akau, papag ri Jakub, kalo pusoon ra malingon.

⁷ Koson ra kinamatuaan min ragili, akau ngaangai' siminiang noyo intor ra ukum Kuno am kalo ginagaya' mambaal raginio. Saguli' kano Raki', am Aku niayuk sumaguli' ramuyun. Kaa' mangkuot kau, ‘Atan kia ondo' musiti' mai baalon koson sumaguli' Rirun?’

⁸ Raino kuatin Takamin, ‘Maruung kia ru ulun i Aki Kapuuno'?’ Maaru' kalo. Kaa' namparuung kau niayuk Raki'. Nangkuot kau, ‘Ati kulaan?’ Taam Aku, ‘Ralalom ru baal mangani' ra sampiopor am papataakan.’

⁹ Akau ngaangai' matiu' ra ulas sabap ra ngaangai' bansa' namparuung Raki'.

¹⁰ Ibito' min ngaangai' sampiopor min giu' ra Baloi Kuno maa' raginio mokoondo' masuang akanon ra giu'. Pangkinam kano Raki', am makito min Aku mangukab ra gigimpalan-gigimpalan ru suruga' am labain kau ra ngaangai' ondo' moonsoi.

¹¹ Kalo polosoon Ku bibiag boborok mamuso ra tinanom min; puun ru anggur min makakawa' ra maawas.

¹² Akau pana raguon boo ra ondo' maansukan ru ngaangai' bansa', sabap ra pagun min masauk ra intok ayanan ondo' moonsoi.”

Binantu' ri Aki Kapuuno' guang makaasi'

¹³ Mindagu Tuhan, “Ragu-ragu min magasab kaga' Raki'. Kaa' mangkuot kau, ‘Atan kia ondo' raguon mai intor Rirun?’

¹⁴ Kamin, ‘Kolondo' onong mangandoi ayuk ri Aki Kapuuno'. Atan onong no sumugut ra susuban Nano, kapoam mampakito ra itakau pansagulian guang ra kasalaan takau giu' ra saang ru Tuhan Ondo' Maayo Kaga' Kuasa'?

¹⁵ Itakau galama' makakito ra ulun malilimbau noyo ondo' maansukan. Ulun malaat kalo ayuk rumuang langkaya', kaa' niayuk mangkinam ilo ra guang tumaan ri Aki Kapuuno' ra mambaal ra malaat, am masalok ilo makalabus intor ra ukuman.’ ”

¹⁶ Kopongo raginio ulun ondo' malaa' ra Tuhan mindagu ra ilo galama'. Mangkirongog Tuhan am mampaguang ra ragu-ragu nilo. Giu' ra saang ru Tuhan, inggalan ru moonong ulun ondo' mangurumat Riso am malaa' Riso, tulisin ralalom ru rondo' kitab.

¹⁷ Mindagu Tuhan Ondo' Maayo Kaga' Kuasa', “Masauk ilo ra ulun Kuno. Paat ra orou Aku mimbuor ra tauli no, masauk ilo ra longgom Kuno ondo' tagamin toojo. Makaasi' Aku risilo koson ra sangulun ama' ondo' makaasi' ra anak ondo' mangandoi ayuk riso.

¹⁸ Ulun Kuno makakito poyo ra pansuayan ru pupus ru ulun moonsoi am pupus ru ulun malaat, ulun ondo' mangandoi ayuk Raki' am ondo' kalo.”