LUKAS 22 - Tanou Moonsoi Timugon

Mangatang ra orou mamatoi ri Jisus

¹ Mamaar noyo Pangiantakan ra Ruti' Kalo Linatakan ra Ragi ondo' sabiton ra Paska.

² Tingganai imam Jaudi am mangingila' ra Ukum ri Musa no maguyum ra kaluagan mamatoi ri Jisus ra kalo mapandayan ru ulun, sabap ra nalaa' ilo ra ulun masuang.

I Judas nampataak ri Jisus ra pantula' Nano

³ I Judas, ondo' sabiton ri Iskariot, sinubol ru Tingganai ru riwato. I Judas ti sangulun intor ra mopor am ruo ngaulun maamaya' ri Jisus.

⁴ Ongoi boo i Judas am pansusunur ra tingganai imam Jaudi am tingganai ru magagalung ra Baloi Tuhan no ra ati kulaan i Jisus rokopon am pataakin risilo.

⁵ Naansukan am nangiou ilo koson mangani' ri Judas ra ruit.

⁶ I Judas pana nangiou am intor ragili maguyum io ra kaluagan ra ati kulaan io mampataak ri Jisus ra kalo mapandayan ru ulun.

Momongo ra intok pagakanan ru Paska

⁷ Nasuku' noyo orou ra Pangiantakan ra Ruti' Kalo Linatakan ra Ragi, ioginio paat anak domba simbaluyon ra pagakanan ru Paska.

⁸ Panusub i Jisus ri Pitrus am i Juanis, indagu Io, “Ongoyo' min pongoono' kalalair intok pagakanan takau ra Paska.”

⁹ Pangkuot ilo, “Ati ra intok kasagaan Muno pongoonon mai?”

¹⁰ Taam i Jisus, “Ra akau sumubol ra bandar, makatuum kau ra sangulun ungkuyon muli' nansagou. Sunuo' min io suku' ra baloi umpasan nano,

¹¹ am kamin ra tatangan ru baloi no, ‘Kon ru Mangingila', ati nua' intok pagakanan Kuno am maamaya' Kuno ra Paska?’

¹² Tuluin kau ru ulun no rondo' lamin maayo ra rasawat ondo' natampos noyo. Pongoono' min ayuk ra giu' no ngaangai'.”

¹³ Ongoi ilo am katuum nilo ngaangai' ondo' rinagu ri Jisus i, am pongoono' nilo boo intok pagakanan ru Paska no.

Pagakanan ru Tuhan

¹⁴ Kasuku' pagakanan ru Paska no, nantulibung i Jisus am rasul-rasul Nano ra rondo' mija'.

¹⁵ Indagu Io risilo, “Masaga' Aku toojo mangakan ra pagakanan ru Paska ti magugulung ramuyun ra Aku kalo poyo imboloon!

¹⁶ Balain takamin: Kalo boo mangakan Aku ra pagakanan ragitio saboi ra arati' nati pabalaan giu' ra Tana' Bagu ri Aki Kapuuno'.”

¹⁷ Kopongo ragili alapo' boo ri Jisus sangkir, paringkuanang Io ri Aki Kapuuno', am indagu, “Alapo' min gitio, am sonongo' min tatayaro'.

¹⁸ Balain takamin: Intor raino kalo boo manginum Aku ra wain ti saboi i Aki Kapuuno' mamarinta ra ngaangai'.”

¹⁹ Kopongo ragili alapo' No boo ruti', paringkuanang Io ri Aki Kapuuno', pipilango' am tatayaro' No risilo, liliwa' minindagu, “Gitio noyo inan Kutu, ondo' pataakon ramuyun. Baalo' min gitio koson ra pangkaraan min Raki'.”

²⁰ Koson niayuk raginii, kopongo ilo nangakan, pataako' No sangkir i risilo liliwa' minindagu, “Sangkir ragitio nabantuan bagu ri Aki Kapuuno', saukon ralalom ru raraa' Kuno, ondo' pasasaron ramuyun.

²¹ Kaa' ilai'! Ulun ondo' mampataak Raki' soroi ragiti liminibung ra mija' ti!

²² Anak ru Ulun matoi koson ra inaru' ri Aki Kapuuno'; kaa' aibui boo ra usung ru ulun ondo' mampataak Riso!”

²³ Ilo pana tumalimpuun boo mangkukuot ra rondo' am bokon, ra osoi nua' intor risilo mambaal raginio.

Pagansangan ra osoi maatang

²⁴ Mamaya' ri Jisus nagagansang ra osoi kia intor risilo i maatang kaga'.

²⁵ Indagu i Jisus risilo, “Raja' ru tana' rati makakuasa' ra mamagun nilono, am mokoondo' intor risilo no sabiton ra ‘Manindung ra mamagun’.

²⁶ Kaa' pai' kau tilu raginio. Sotopot no, ulun ondo' maatang kaga' intor ramuyun musiti' masauk koson ra ulun mamulok am niayuk osoi ayuk tingganai min musiti' io masauk koson ra ulipon.

²⁷ Osoi maatang kaga'? Ulun ondo' manturung pangakan ra mija' kia, kapoam ondo' mampasulung riso no? Ondo' manturung pangakan ra mija' tupo. Kaa' Aku soroi ra tatanga' min koson ra ulun ondo' mampasulung.

²⁸ Kaa' siminimpung kau Raki' buoi ru pangkinaman Kutu.

²⁹ Koson niayuk ra Aku inanian ru Ama' Kuno ra kuasa' mamarinta, Aku pana mangani' ramuyun ra kuasa' raginio.

³⁰ Mangakan am manginum kau ra rondo' mija' mababaya' Raki' paat ra Aku masauk ra raja'. Akau pana saukon ra raja' koson mangakim ra mopor am ruo ngantayaran bansa' ru Israil.”

Manala' i Jisus ra magali' i Pitrus Riso

³¹ “Simon, rongogo'! Tingganai ru riwato no iniou noyo mangkinam ramuyun ngaangai' koson ra sangulun mangatap ra bilor.

³² Kaa' nakiasi' Aku noyo ra pangintapatan muno kalo malawo. Ra okou sumaguli' Raki', okou tupo niayuk mampaikang ra pangintapatan ru pabukat-pabukat muno.”

³³ Taam i Pitrus, “Tuhan, aputon kapoam matoi marumar Rirun pana, nakatampos aku noyo!”

³⁴ Indagu i Jisus, “Pitrus, balain tokou; ra kalo poyo maningkuluuk manuk tandaa' no rondom raiti', intalu kono magali' ra nakaulig kou Raki'.”

Rumpit, kantungan am ilang

³⁵ Pangkuot boo i Jisus risilo, “Ra Aku nanusub ramuyun ragili am kalo pinagibit ra rumpit, kantungan kapoam kasut, makakapaganan kau kia?” Taam ilo, “Kolondo' rondo' pana!”

³⁶ Indagu i Jisus, “Kaa' raino, osoi ayuk mokoondo' ra rumpit kapoam kantungan, ibito' noyo; am osoi ayuk kolondo' ilang, talanon no sukub nano pambabali ra ilang no.

³⁷ Balain takamin, ondo' tinulisan noyo ra Buuk Kitab, ‘Kinara' Io koson ra sangulun malaat,’ maaru' masauk Raki', am sotopot no masauk noyo ra raino ti.”

³⁸ Indagu maamaya' Nano, “Tuhan, ilai' giti mokoondo' ruo ilang.” Taam i Jisus, “Sama' noyo!”

Nakiasi' i Jisus giu' ra Bulur Jaitun

³⁹ Iruani' ri Jisus bandar no, am koson ra kaindalaman No, minongoi Io ra Bulur Jaitun am maamaya' Nano minaya' niayuk Riso.

⁴⁰ Pakasuku' ra giu' i, indagu i Jisus risilo, “Pakiasi' kano maa' raginio makainggalur kau intor ra pangkinaman.”

⁴¹ Inggalur Io poyo boo koborok, olo'-olo' koson ra galur ru kababalan ra batu, igulatur am pakiasi' Io, indagu Io,

⁴² “Ama', amon ru masaga' Kou, painggaluro' noyo sangkir kaimbalaan ti intor Raki'. Kaa' sala' ka sumugut ra kasagaan Kuno, kaa' kasagaan Muno ayuk saukon.”

⁴³ Pulusat ru sangulun malaikat ru Tuhan mampaikang ra guang Nano.

⁴⁴ Maimbolo' Io tojojo am mapirot Io poyo nakiasi', saboi rasang Nano koson ra raraa' momosok ra tana'.

⁴⁵ Kopongo nakiasi', saguli' i Jisus ra maamaya' Nano am ilai' No nokororot ilo sabap ra mangiluk toojo guang nilai.

⁴⁶ Indagu i Jisus risilo, “Kua pombolong kau? Karat kano am pakiasi', maa' raginio makainggalur kau intor ra pangkinaman.”

I Jisus rinakop

⁴⁷ Tatanga' i Jisus lakat ayuk poyo minindagu, ratong sampulalai ru ulun masuang. I Judas, sangulun intor ra mopor am ruo ngaulun maamaya' ri Jisus no, siminigulu risilo. Alaki' boo ri Judas i Jisus.

⁴⁸ Kaa' indagu i Jisus, “Judas, mabaya' ra alok kia okou mampataak ra Anak ru Ulun?”

⁴⁹ Pakaliman maamaya' ri Jisus ra bokon no ra atan masauk ra maagu no, indagu ilo, “Tuhan, pirison mai kia ilo ra ilang?”

⁵⁰ Sangulun intor risilo boo nampiris ra ulipon ru Tingganai Maayo Imam Jaudi i am napias talingo ra pamiris nali.

⁵¹ Indagu i Jisus, “Sama' noyo!” Bagu kamaa' No talingo ru ulun i am napali' io no.

⁵² Indagu boo i Jisus ra tingganai imam Jaudi, tingganai ru magagalung ra Baloi Tuhan am niayuk tingganai ru ulun ru Jaudi ondo' minongoi pamparakop Riso, indagu Io, “Ilain min ra Aku ti koson ra sangulun malaat kia ra mananggal kau ra ilang am pamalamba' koson mamparakop Raki'.

⁵³ Moonong orou soroi Aku giu' ra Baloi Tuhan mabaya' ramuyun am kalo rinakop min Aku. Kaa' gitio noyo kaluagan min, paat ra kuasa' ru molondom mamarinta.”

Nagali' i Pitrus ra makaulig ri Jisus

⁵⁴ Rokopo' am ibito' nilo i Jisus giu' ra baloi ru Tingganai Maayo Imam Jaudi, am i Pitrus siminunu' intor ra maalur.

⁵⁵ Giu' ra liliut ru baloi i nampaang ilo ra apui am i Pitrus pana riminarang nababaya' ra ulun-ulun no.

⁵⁶ Kakito ru sangulun ulipon ra ruandu' ra i Pitrus nanturung rarang ra apui ra giu' i, tantangi' no io am indagu, “Ulun ragitio niayuk minaya' ri Jisus.”

⁵⁷ Kaa' pagali' i Pitrus, kono, “Kalo nakaulig aku ra ulun ragitio!”

⁵⁸ Kalo nabuoi ragili, sangulun poyo nakakito ri Pitrus am indagu, “Okou niayuk sangulun intor risilo i!” Kaa' taam i Pitrus, “Kalo, sala' ka aku!”

⁵⁹ Mopongo olo'-olo' sanjam, ngansab poyo ru sangulun, “Topot ulun ragitio maamaya' ri Jisus, sabap ra ulun io tupo ru Galilia!”

⁶⁰ Kaa' taam i Pitrus, “Sala', kalo nangarati' aku ra rinagu muni!” Paat ragili niayuk, ra i Pitrus lakat ayuk poyo minindagu, paningkuluuk manuk tandaa' i.

⁶¹ Pangkaili am ponontong Tuhan ri Pitrus. Kakara' boo ri Pitrus ragu ru Tuhan i riso, “Ra kalo poyo maningkuluuk manuk tandaa' no rondom raiti', intalu kono magali' ra okou makaulig Raki'.”

⁶² Ingkual boo i Pitrus intor ra giu' i am sisingut nantangi'.

I Jisus iniis am linamba'

⁶³ Ulun ondo' namparakop ri Jisus i nangiis am nampalamba' Riso.

⁶⁴ Silii' nilo mato Nali am indagu, “Amon ru nabi Kou, kinami' sabito' osoi kia nampalamba' Rirun ti?”

⁶⁵ Am masuang poyo ragu nilo magasab ri Jisus.

I Jisus inibit giu' ra Majlis Ugama

⁶⁶ Io suabon, tingganai ru ulun ru Jaudi, tingganai imam Jaudi am mangingila' ra ukum ri Musa no timinimung ra Majlis Ugama, am paumaa' boo i Jisus risilo.

⁶⁷ Indagu ilo, “Balai' akai! Okou kia Mamamayag ondo' sinusub ri Aki Kapuuno'?” Taam i Jisus, “Balain takamin pana, kaa' kalo niayuk mangintopot kau.

⁶⁸ Amon ru mangkuot Aku ra atan ayuk pana, kalo niayuk tumaam kau.

⁶⁹ Kaa' intor raino, Anak ru Ulun paturungon ra pamiris ri Aki Kapuuno' ondo' Maayo Kaga' Kuasa'.”

⁷⁰ Nagagampan ilo minindagu, “Ginio poyo, Anak Kou kia ri Aki Kapuuno'?” Taam i Jisus, “Kamin, Aku noyo Io.”

⁷¹ Indagu ilo, “Atan pakuan takau maguyum poyo ra sasi'! Norongog takau no ra Io nangiou!”