LUKAS 14 - Tanou Moonsoi Timugon

Namabas i Jisus sangulun marualan

¹ Sangarawan ra orou Sabat ru ulun ru Jaudi, minongoi i Jisus pangakan giu' ra baloi ru sangulun intor ra tayar Parisi ondo' nauligan toojo. Bambal ayuk ru ulun-ulun no monontong ri Jisus.

² Giu' ra saang ri Jisus mokoondo' sangulun ondo' liminanit kalindu' am kalayam nali.

³ Kuati' ri Jisus mangingila' ra ukum ri Musa am ulun-ulun ru Parisi no, “Iowon kia ru Ukum ri Musa mamabas ra ulun marualan paat ra orou Sabat kapoam kalo?”

⁴ Kaa' nongkoror ilo ayuk. Ginio ra piawo' ri Jisus ulun marualan i am babaso' no, am susubo' no mugar.

⁵ Indagu boo i Jisus risilo, “Amon ru sangulun intor ramuyun mokoondo' ra lalaing kapoam sapi' naratu' ralalom ru tulubong paat ra orou Sabat, kalo kia indibakin min paingkualo' kabalu' pana nakainamot ra orou Sabat?”

⁶ Kaa' kalo nakataam ilo ra pangkuatan ri Jisus ni.

Guang ra minggana' am mataau

⁷ Inilayan ri Jisus ati kulaan kukula' ngaulun tambului nampili' ra intok moonsoi toojo. Ginio ra tunungo' No abig ragitio risilo ngaangai':

⁸ Indagu Io, “Amon ru piawon kau ru sasangulun mongoi ra bunsag ru paguatan, pai' kau ongoi turung ra intok moonsoi toojo, sabap ra mokoondo' poyo lair ulun maatang toojo ondo' piniau.

⁹ Tatangan ra baloi ondo' nampiau ramuyun karuruo matong rirun am mindagu, ‘Pataaki' intok ragitio riso.’ Maaru' mauyu' kou ongoyon paturungo' ra intok ondo' kalo moonsoi no.

¹⁰ Ginio ra amon ru piawon kou, mongoi kou panturung ra intok kalo moonsoi, maa' raginio tatangan ra baloi no matong am mangkimait rirun, ‘Ibok, ongoi turung ra intok moonsoi ti.’ Baal ragitio mampakaansuk rirun ra saang ru tambului ra bokon no.

¹¹ Moonong ulun makapaliso ra minsawat guang, paingganaan; am moonong ulun makapaliso minggana' guang, painsawaton.”

¹² Indagu boo i Jisus ra tatangan ra baloi i, “Maampon ru mampiau kou ra ulun mongoi akan ra baloi muno, pai' piawo' pabukat muno, rangan muno, kapoam pasambalayan muno ondo' langkaya' no. Sabap ra balasin kou boo piawo', am ginio noyo ampos muno.

¹³ Kaa' amon ru mampiau kou ra ulun mongoi akan ra baloi, piawo' niayuk ulun musikin, ulun kalo makalulu', ulun kimpo' am ulun bolou.

¹⁴ Barakaton kou boo sabap ra ulun ragitilo kalo makabalos rirun, kaa' i Aki Kapuuno' mambalos rirun paat ra ulun motopot bayagon saguli'.”

Abig ra bunsag maayo

¹⁵ Kaining ru sangulun tambului i ragu ri Jisus, indagu io Riso, “Mumpara' bonsoi nilo ondo' mabaya' ri Aki Kapuuno' mangakan ra bunsag maayo ra Tana' Bagu ri Aki Kapuuno'.”

¹⁶ Indagu i Jisus ra ulun no, “Mokoondo' sangulun munsag am mampiau io ra masuang ulun.

¹⁷ Kasuku' paat ru bunsag i, susubo' no ulipon nali mongoi pambala' ra ngaangai' piniau nali am indagu, ‘Ibok kano, nopongo noyo ngaangai'!’

¹⁸ Kaa' rorondo' ilo makimaap ra kalo mokoongoi ilo. Ondo' kasaa' i nambala' ra ulipon no, ‘Nambali bagu aku ra sampila' tana'. Musiti' aku mongoi pagilong. Makimaap aku ra kalo mokoongoi!’

¹⁹ Bokon i mindagu, ‘Nambali bagu aku ra mopor ngainan karabau am masaga' aku mangkinam risilo. Makimaap aku ra kalo mokoongoi!’

²⁰ Bokon i mindagu, ‘Bagu aku ayuk naguot; ginio sabap ra aku kalo makaratong.’

²¹ Uli' ulipon no am pambala' ra tuan nano. Siminangit io toojo am indagu ra ulipon nano, ‘Ribaki' ongoi ra ralan maayo am boborok giu' ra bandar am piawo' ulun musikin, ulun kalo makalulu', ulun bolou am ulun kimpo'.’

²² Kopongo ragili indagu ulipon no, ‘Tuan, nanusuban muli binaal noyo, kaa' lakat ayuk poyo mokoondo' masuang intok panturungan.’

²³ Indagu tuan no ra ulipon nano, ‘Ongoi no ra ralan maayo am boborok giu' ra liwar ru bandar am jajali' porotongo' ngaangai' ulun, koson mososok boo baloi kutu.

²⁴ Balain takamin, kolondo' sangulun pana intor ra piniau galing kuli makasia' ra akanon ru bunsag kutu!’ ”

Guangon galing ra kalo poyo sumauk ra maamaya' ri Jisus

²⁵ Sasusunu' ulun masuang ri Jisus ralalom pangkiralanan Nali. Pangkaili i Jisus risilo am indagu,

²⁶ “Osoi ayuk matong Raki' no, kalo masauk ra maamaya' Kuno amon ru kalo motogom io toojo Raki' intor ra togom no ra ina' nano, ama' nano, andu' nano, anak-anak nano, pinongkotob no ra ungkuyon am ruandu' am kaayagan nano galama' pana.

²⁷ Osoi ayuk kalo masaga' mansaan ra salip nano am maya' Raki', kalo masauk ra maamaya' Kuno.

²⁸ Amon ru mokoondo' sangulun intor ramuyun masaga' mambaal ra baloi masawat, mangkara' io po galing am manguntob ra kula' suang ru balanja' nano, koson mapandayan no ru maukop kia ruit nano momongo ra baloi no.

²⁹ Kaa' amon ru nopongo no noyo tinansakan kaa' kalo makaukop ruit nano, maaru' kalo boo masauk baloi no. Ngaangai' ulun ondo' nakakito no mangiis boo riso.

³⁰ Konilo boo, ‘Ilai', timinalimpuun ulun ti nanambaloi, kaa' kalo pinongo no!’

³¹ Amon ru sangulun raja' ondo' makasaujor mopor ngaribu ngaulun makimangayou ra raja' ra bokon ondo' makasaujor ruo ngoopor ngaribu ngaulun, mampaguang io poyo galing ru maikang io no kia manggal ra pantula' nano.

³² Amon ru napandayan no ra kalo maikang, paat ra maalur ayuk poyo pantula' nano, manusub io ra ulun mongoi pakimansaung ra raja' ra bokon no.”

³³ Pupusi' ri Jisus ragu Nali, “Koson niayuk ramuyun, kolondo' sangulun pana masauk ra maamaya' Kuno amon ru kalo mangiruan kau ra ngaangai'.”

Usi' ondo' mapalo

³⁴ “Usi' moonsoi kaa' amon ru mapalo usi' no, mailo boo kaasinon saguli'.

³⁵ Kolondo' boo onong no ra tana' kapoam baja, patirin ayuk. Rongogo' am karaa' min toojo!”