KOLOSI 3 - Tanou Moonsoi Timugon

¹ Sabap ra pasimpungan min ri Kristus inanian kau ra kaayagan bagu ondo' mogondo' ra akau binayag saguli'. Ginio nai ra kaikango' ayuk toojo guang mino koson mompogogot ra kalangkayaan ru suruga', ioginio panturungan ri Kristus ra takhta ra tampilon pamiris ri Aki Kapuuno'.

² Moonsoi ru guango' min noyo kaatangan raginio, sala' ka kaatangan ru tana' ti.

³ Sabap ra akau ti karaan koson ayuk ra minatoi noyo am kaayagan bagu min sumimpung ri Aki Kapuuno' mabaya' ri Kristus, kalo makito ru ulun.

⁴ Ginio nai ra i Kristus noyo puun ru kaayagan bagu mino. Am paat ra Io paintalangon saguli', makapasimpung kau Riso ra katulayan Nano.

Kaayagan bagu am kaayagan lair

⁵ Ginio ra patiri' noyo kasagaan ra pansasawaan, mansalinut baal ra makauyuyu', kasagaan ru guang malaat am maringkumaa' (sabap ra paliso raginio mogondo' ayuk koson sumamba ra sinungkalalaing).

⁶ Ulun makapaliso koson ragitio noyo mampakasalula' ra sangit ri Aki Kapuuno'.

⁷ Ragili akau pana galama' siminugut ra paliso malaat koson raginio ra io nanguasa' ramuyun.

⁸ Kaa' raino inggaluri' min noyo paliso ragitio: masasangit, mataki' malasu' guang, guang masisang, ragu magasab am poyo ragu ondo' makauyuyu' iningon.

⁹ Ginio boo ra pai' kau pagabau ra rondo' am bokon sabap ra kaayagan am paliso nakalair min i iniruanan min noyo.

¹⁰ Raino inanian kau ra kaayagan bagu. Akau noyo ulun bagu ondo' masalok talimbaguin ri Aki Kapuuno' koson makatilu ra paliso Nano. Arati' no makaintutun kau bagu toojo ri Aki Kapuuno'.

¹¹ Koson boo raginio, kalo boo maatang mangkara' osoi ulun ru Jaudi kapoam osoi sala' ka ulun ru Jaudi; osoi nasunatan kapoam kalo; osoi bansa' ra bokon kapoam osoi bansa' ra kolondo' guang; am poyo osoi ulipon kapoam kalo. Kaa' ondo' maatang am i Kristus, sabap ra Io puun ru ngaangai' no am sumimpung Io ra ngaangai'.

¹² Akau nakasimpung noyo ri Aki Kapuuno', nampili' Io no ramuyun am monogom Io ramuyun. Ginio nai ra pakitono' min noyo togom min, bonsoi ru guang min, inggana' ru guang min, kinolomoi ru guang min am poyo kinataan ru guang mino.

¹³ Pai' kano kataki' sumangit ra rondo' am bokon am ampuno' noyo amon ru mokoondo' sumonsol ra ulun bokon. Mogondo' ra Tuhan nangampun noyo ramuyun, moonsoi ru akau pana mangampun ra rondo' am bokon.

¹⁴ Kaa' ondo' maatang intor ra ngaangai' ru gitio io no togom, sabap ra gitio noyo ondo' mampasimpung ramuyun ngaangai' masauk rondo' guang.

¹⁵ Pobobonsoi kano ra rondo' am bokon ralalom ra pasimpungan ulun Kristian, maya' ra pabansayan ondo' tinaakan ri Kristus ramuyun, sabap ra gitio noyo pampiawan ri Aki Kapuuno' ramuyun. Kasalok kano maringkuanang.

¹⁶ Kaayag kano sumugut ra bala' ri Kristus ondo' kolondo' paganda'. Pangila' am paminson noyo ra rondo' am bokon mabaya' ra kapintaran. Parimbai kano ra Mazmur, rimbai mongompor ri Aki Kapuuno' am rimbai Kristian. Pongompor kano ri Aki Kapuuno' mabaya' ra guang paringkuanangan.

¹⁷ Ngaangai' ondo' baalon am raguon min sauko' no ralalom inggalan ru Tuhan Jisus ayuk. Paringkuanang kano ri Aki Kapuuno', Ama' takau ra atan ondo' binaal ri Jisus Kristus ramuyun.

Baal ru pabukatan ralalom kaayagan bagu

¹⁸ Andu' kau ngai', moonsoi ru mampagagaya' kau ra ralaki mino sabap ra ginio maaru' baalon ru sangulun Kristian.

¹⁹ Ralaki kau ngai', tagami' min noyo andu' mino am pai' min ilo ulipono'.

²⁰ Anak kau ngai', moonsoi sumugut kau ra karuo matuo mino sabap ra gitio noyo paliso ru sangulun Kristian ondo' mampakatasu' ra guang ri Aki Kapuuno'.

²¹ Matuo kau ngai', pai' min sinduali' guang ru anak mino saboi malawo guang nilo.

²² Ulipon kau ngai', moonsoi ru gagaya' kano ra tuan mino ra atan ayuk kondoyon min. Sala' ka gumagaya' ayuk paat ra akau tamungin, koson makiompor kau ak risilo. Kaa' gagaya' kano toojo risilo mogondo' ra akau gumagaya' toojo ra Tuhan.

²³ Atan ayuk kondoyon mino, paugaro' min noyo toojo mabaya' ra guang mabanis, koson ayuk mangandoi kau ra Tuhan am sala' ka ra ulun.

²⁴ Karaa' min noyo ra aniin kau ru Tuhan ra ampos moonsoi ondo' pinongo No kalalair ramuyun. Sotopot no i Kristus noyo ondo' tuan pangandayan min.

²⁵ Am osoi ayuk ondo' mambaal ra tula, io galama' magiba' ra balos ru tula nano sabap ra ukum ri Aki Kapuuno' pogondoon ra ngaangai' ulun.