KASAUKAN 9 - Tanou Moonsoi Timugon

Nabantuan ri Aki Kapuuno' am i Nuu

¹ Nambarakat i Aki Kapuuno' ri Nuu, anak-anak ungkuyon nano am indagu Io, “Paganak kano kasusuang maa' raginio mapapak boo ru papag mino tana' ti.

² Ngaangai' susuit, papait am bibiag ra bokon no mangalaa' ramuyun. Ngaangai' nilo soroi ralalom ru kuasa' min.

³ Ngaangai' no maakan min, koson niayuk ra tutuu' ondo' mangasansam; tinaakan Ku ngaangai' no ramuyun koson ra akanon min.

⁴ Rondo' ayuk ondo' kalo maakan min, iono kual ondo' makararaa' ayuk poyo, sabap ra painawo no soroi ralalom ru raraa' no.

⁵ Amon sangungulun ondo' mamatoi ra ulun, ukumin Ku io ra matoi. Ukumin Ku ra potoyon atan ayuk bibiag ondo' mamatoi ra ulun.

⁶ Ulun sinauk nogondo' ra baal Kuno; ginio ra osoi ayuk mamatoi ra ulun, io galama' niayuk potoyon ru ulun.

⁷ Paganak kano kasusuang maa' raginio mapapak boo ru papag mino tana' ti.”

⁸ Indagu i Aki Kapuuno' ri Nuu am anak-anak ungkuyon nano,

⁹ “Raino mambaal Aku ra nabantuan ramuyun am papag mino,

¹⁰ am ngaangai' ondo' maayag, iono susuit am ngaangai' bibiag ru lantur am ngaangai' ondo' miningkual intor ra kapal no mababaya' ramuyun.

¹¹ Intor ra ragu Kuti mambaal Aku ra bantu' rirun: Bantuon Ku ra ngaangai' ondo' maayag, kalo boo luuson Ku ra rosob. Rosob kalo boo mamuso ra tana' ti.

¹² Gitio tatandu' ru bantu' mantilayun ondo' baalon Kuno ramuyun am ra ngaangai' ondo' maayag.

¹³ Pasilaan Ku bulintung no ra gaun. Io masauk ra tatandu' ru bantu' Kuno ra tana' ti.

^14-15 Paat ra matauban limbowon ru gaun am makito bulintung no, ginio mapakara' Raki' ra bantu' Kuno ramuyun am ngaangai' ondo' maayag ra kalo boo luuson Ku ra rosob ngaangai' ondo' maayag.

¹⁶ Paat makito bulintung no ra gaun no, makito Ku am mangkara' Aku ra nabantuan mantilayun Kuli am ngaangai' ondo' maayag ra tana' ti.

¹⁷ Ginio noyo tatandu' ru nabantuan Kuno ondo' binaal Kuno ra ngaangai' ondo' maayag ra tana' ti.”

I Nuu am anak-anak ungkuyon nano

¹⁸ Anak-anak ungkuyon ri Nuu ondo' miningkual intor ra kapal, iono i Siim, Gam am i Japit. (I Gam ama' ri Kanaan).

¹⁹ Katatalu anak ri Nuu ti noyo kinamatuaan ru ngaangai' ulun ru tana' ti.

²⁰ I Nuu sangulun magitanom, io noyo ulun kasaa' nantanom ra anggur.

²¹ Pakainum i Nuu ra wain, kagauk io. Aluso' no ngaangai' bayang nali am pombolong am nagibabaang io ralalom ru kim nano.

²² Paat i Gam, ama' ri Kanaan nakakito ra ama' nano nagibabaang, ingkual io am pambala' ra karuo pagaka' nano ra baal raginio.

²³ Kopongo ragili, i Gam am i Japit nangalap ra sukub am pasulompoyo' ra limbawo nilo. Ilo pana timinimbakulung ra minumpos ra kim i am pakusibo' nilo sukub no ra ama' nilono. Pinalikur nilo bulos am kalo makakito ilo ra ama' nilono nagibabaang.

²⁴ Katabinaasi' i Nuu intor ra gauk nali am kapandayi' no atan binaal ru anak pupusan nano,

²⁵ indagu io, “Kausung noyo i Kanaan! Masauk io ra uliponon ru pabukat-pabukat nano.

²⁶ Koompor noyo Tuhan i Aki Kapuuno' ri Siim! Masauk i Kanaan ra uliponon ri Siim!

²⁷ Gama' ru ruangin ri Aki Kapuuno' barakat Nano ri Japit am kalangkaan ayanan nano. Gama' ru papag nano masimpung mayan ra papag ri Siim. Masauk i Kanaan ra uliponon ri Japit.”

²⁸ Kopongo rosob raginio, naayag poyo i Nuu buoi 350 ngambilor.

²⁹ Io minatoi ra umur nano 950 ngambilor.