KASAUKAN 50 - Tanou Moonsoi Timugon

¹ Gaba' i Jusup ra ama' nano, pantangi' io am alaki' no bulos ru ama' nano.

² Panusub boo i Jusup maparatok ra tutuu' maamis owou ra baangkai ru ama' nano koson pangampin.

³ Buoi ru kandoi raginio apat ngoopor ngoorou, iono buoi ru kaindalaman maparatok ra tutuu' maamis owou ra baangkai. Ulun ru Misir nangulir buoi tulu' ngoopor ngoorou.

⁴ Kaampus nangulir, indagu i Jusup ra pagawai-pagawai ru raja', “Posoboyo' bilin ragitio ra raja':

⁵ ‘Paat ra ama' kuli maar matoi, nanusub io raki' mabantu' riso ra makilobong io raki' ra kalabangan ondo' pinongo no giu' ra tana' ru Kanaan. Sabap raginio malansan aku mataak mu aku mongoi pompolobong ra ama' kuno. Mopongo ginio sumaguli' aku.’ ”

⁶ Taam raja' no, “Ugar no, ongoyo' noyo lobongo' ama' muno koson ra atan ondo' bantu' muli riso.”

⁷ Ugar boo i Jusup ongoi pompolobong ra ama' nano. Ngaangai' pagawai ru raja', ulun-ulun mangaatang lair ra pamisaraan am ngaangai' ulun maatang ru pagun ru Misir nababaya' ri Jusup.

⁸ Sasambaloi nano, pagaka'-pagaka' nano am pabukat-pabukat no ra bokon no minaya' niayuk. Ondo' ayuk kalo minaya' lalaing-lalaing, domba, kambing am sapi' nilono soroi ra libung ru Gosyin.

⁹ Sampulalai nangkurita' kuda am nangkuda niayuk minaya' saboi ilo ti masuang kaga'.

¹⁰ Pakasaboi ilo ra intok mangagik ra gandum giu' ra Atad, tampilon sirangon ru Sungoi Jordan, panulaboi ilo ra mangiluk am bolos matangil. Paugaro' ri Jusup kaulayan mangulir buoi katuluan.

¹¹ Pakakito mamagun ru Kanaan ra panguliran ru ulun-ulun raginio giu' ra Atad, konilo, “Mapara' boo ngiluk ru kaulayan mangulir ru ulun ru Misir!” Ginio ra ininggalanan intok raginio ra Abil-Mijraim.

¹² Ginio noyo ra ginagaya' ru anak-anak ungkuyon ri Jakub bilin nali risilo.

¹³ Inibit nilo baangkai nano ra Kanaan, am lobongo' ra luang batu Makpila, tampilon sirangon ru Mamri, umo ondo' binali ri Abragam intor ra ulun ru Git iono i Ipron koson saukon ra tana' kalabangan.

¹⁴ Kolobong ri Jusup ama' nano, saguli' io ra Misir nababaya' ra pagaka'-pagaka' nano, am ngaangai' ondo' minaya' riso ra nampalabangan no.

Nanimayo i Jusup ra pagaka'-pagaka' nano

¹⁵ Kopongo pinatayan ru ama' nilono, pagindagu pagaka'-pagaka' ri Jusup no, “Atan nua' koson amon ru mansuli' i Jusup ritakau am mambalos io ra kalaatan takali riso ra galing i?”

¹⁶ Pangator ilo boo ra bilin ri Jusup, “Kalo poyo minatoi ama' takali,

¹⁷ nambilin io ramon mambala' rirun, ‘Ampuno' noyo kalaatan ondo' binaal ru pagaka'-pagaka' muno ragili.’ Raino, ampuno' noyo kasalaan mai, ra akai ti ulipon ri Aki Kapuuno' ondo' sambaan ru ama' takali.” Nantangi' i Jusup nakaapu ra bilin no.

¹⁸ Ilo galama' pana minatong am igulatur ra saang ri Jusup. Konilo, “Akai ti ulipon muno.”

¹⁹ Kaa' kon ri Jusup risilo, “Pai' kano kalaa' sabap ra kalo makatimbalos aku koson ri Aki Kapuuno'.

²⁰ Nangatang kau mambaal ra kalaatan raki', kaa' kalaatan no kinulau ri Aki Kapuuno' ra kaansayan, maa' raginio atan ondo' nasauk ra galing i mamayag ra masuang ulun ondo' mainono' ra raino ti.

²¹ Pai' kano pagalabo, alungin takamin mabaya' ra anak-anak min.” Ginii noyo i Jusup nanimayo ra pagaka'-pagaka' nano ra ragu molomoi saboi guang nilo nabinsaluyan.

Pinatayan ri Jusup

²² Liminayun ayan i Jusup ra Misir nababaya' ra pagaka'-pagaka' nano. Umur nano maatus am mopor ngambilor paat ra io minatoi.

²³ Nakarampot io poyo ra anak am akupu ri Ipraim. Nakarampot io poyo nangapu ra anak-anak ri Makir, akupu ri Manasi koson anak nano galama'.

²⁴ Indagu i Jusup ra pagaka'-pagaka' nano, “Mamaar noyo patayan kuno, kaa' i Aki Kapuuno' magalung ramuyun am magibit ramuyun mingkual intor ra pagun ti am mongoi ra pagun ondo' binantu' Nano ri Abragam, i Isak am i Jakub.”

²⁵ Pagiboto' boo ri Jusup ngaangai' pabukat nano, kono, “Pabantu' kano raki', ra paat ri Aki Kapuuno' magibit ramuyun ra tana' nabantuan i, ibiton min niayuk baangkai kutu mababaya' ramuyun.”

²⁶ Patoi boo i Jusup giu' ra Misir am umur nano maatus am mopor ngambilor. Lataki' nilo baangkai nano ra tutuu' maamis owou am pasuango' ra karanda'.