KASAUKAN 5 - Tanou Moonsoi Timugon

Papag ri Adam

¹ Gitio noyo papag ri Adam. (Paat ri Aki Kapuuno' napasauk ra ulun, sinauk No ilo koson Riso galama'.

² Napasauk Io ra ruandu' am ungkuyon. Io pana nambarakat risilo am inggalani' No ilo ra “Ulun”.)

³ Paat i Adam makaumur 130 ngambilor, makaanak ungkuyon io ondo' nansalu riso, am ininggalanan no ri Sit.

⁴ Kopongo raginio, lakat poyo naayag i Adam buoi 800 ngambilor poyo am makaanak poyo ra bokon.

⁵ Io minatoi ra umur nano 930 ngambilor.

⁶ Paat i Sit makaumur 105 ngambilor, makaanak ungkuyon io ininggalanan ri Inos.

⁷ Kopongo raginio, lakat poyo naayag i Sit buoi 807 ngambilor am makaanak poyo ra bokon.

⁸ Io minatoi ra umur nano 912 ngambilor.

⁹ Paat i Inos makaumur 90 ngambilor, makaanak ungkuyon io ininggalanan ri Kinan.

¹⁰ Kopongo raginio, lakat poyo naayag i Inos buoi 815 ngambilor am makaanak poyo ra bokon.

¹¹ Io minatoi ra umur nano 905 ngambilor.

¹² Paat i Kinan makaumur 70 ngambilor, makaanak ungkuyon io ininggalanan ri Magalaliil.

¹³ I Kinan ti naayag buoi 840 ngambilor am makaanak poyo ra bokon.

¹⁴ Io minatoi ra umur nano 910 ngambilor.

¹⁵ Paat i Magalaliil makaumur 65 ngambilor, makaanak ungkuyon io ininggalanan ri Jarid.

¹⁶ Kopongo raginio naayag poyo i Magalaliil buoi 830 ngambilor am makaanak poyo ra bokon.

¹⁷ Io minatoi ra umur nano 895 ngambilor.

¹⁸ Paat i Jarid makaumur 162 ngambilor, makaanak ungkuyon io ininggalanan ri Ginok.

¹⁹ Kopongo raginio, naayag poyo i Jarid buoi 800 ngambilor am makaanak poyo ra bokon.

²⁰ Io minatoi ra umur nano 962 ngambilor.

²¹ Paat i Ginok makaumur 65 ngambilor, makaanak ungkuyon io ininggalanan ri Mitusila.

²² Kopongo raginio naayag poyo i Ginok ralalom pasimpungan no ri Aki Kapuuno' buoi 300 ngambilor. Makaanak io poyo ra bokon,

²³ am nakasuku' poyo umur nano 365 ngambilor.

²⁴ I Ginok naayag masalok sumimpung ri Aki Kapuuno', liminiot io sabap inalap io ri Aki Kapuuno'.

²⁵ Paat i Mitusila makaumur 187 ngambilor, makaanak ungkuyon io ininggalanan ri Lamik.

²⁶ Kopongo raginio naayag poyo i Mitusila buoi 782 ngambilor am makaanak poyo ra bokon.

²⁷ Io minatoi ra umur nano 969 ngambilor.

²⁸ Paat i Lamik makaumur 182 ngambilor, makaanak ungkuyon io.

²⁹ Indagu i Lamik, “Anak ragitio mapabansuk paat ra itakau mirot mangandoi ra tana' ondo' inulas ru Tuhan.” Ginio boo inggalani' no anak nano ri Nuu.

³⁰ Naayag poyo i Lamik buoi 595 ngambilor am makaanak poyo ra bokon.

³¹ Io minatoi ra umur nano 777 ngambilor.

³² Kopongo raginio, i Nuu makaumur 500 ngambilor, makaanak ungkuyon io talu ngaulun. Ilo ti i Siim, Japit am i Gam.