KASAUKAN 49 - Tanou Moonsoi Timugon

Ragu pupus ri Jakub

¹ Piawo' ri Jakub anak-anak ungkuyon nano am indagu, “Tulibung kano am balain takamin ra atan ondo' masauk ramuyun ra tauli no:

² Timung kano, anak ri Jakub kau, Rongogo' min noyo ragu ru ama' min i Israil.

³ “I Rubin, anak katuaan kuno, okou noyo ikang kuno, anak ungkuyon ra kasaa' ru kinabaani kuno, ondo' mapanggol kaga' am maikang kaga', intor ra ngaangai' anak ungkuyon kuno.

⁴ Mogondo' kou koson ra liur ondo' marapai, kaa' kalo masauk kou ra maatang. Sabap ra riminulug kou ra ruandu' parulug kuno i Bilga, jinaka' mu pambalangan ru ama' muno.

⁵ “I Simion am i Liwi ti magaka', manangilang ilo koson mambaal ra kalaatan.

⁶ Kalo maya' aku ra inatangan malaat nilo ondo' nasibuni no, am kalo maya' aku ra pansunuran nilono. Sabap ra mamatoi ilo ra ulun paat ra sumangit, am mapalawo ilo ra sapi' gawayan sabap ra pangkulian.

⁷ Kausung noyo sangit nilono, sabap ra najanjayan kaga'. Kausung noyo pamatayan nilono, sabap ra najanjayan laat. Pantuliaron ku ilo ra titikop tana' ru Israil, Pantuliaron ku ilo ra popolos ru mamagun nano.

⁸ “I Jiuda, omporon kou ru pagaka'-pagaka' muno. Manikak kou ru pantula' muno. Pagaka'-pagaka' muno migulatur ra saang muno.

⁹ I Jiuda abigin koson ra singa'. Makapansaam io, sumaguli' io ra luang nano; mambilor am magupu' io, am kolondo' osoi pana makakau' mangulinjo riso.

¹⁰ Mampaguut i Jiuda ra susukur ru parinta. Papag nano magail mamarinta. Bansa'-bansa' magibit ra upiti riso, am migulatur ra guang gumagaya' ra saang nano.

¹¹ Pinarukug no anak kaladai ra puun anggur, puun anggur ra moonsoi kaga'. Mampupu' io ra konoon nano ra wain, koson ra kinalia' ru raraa'.

¹² Malia' mato nano sabap ra nanginum ra wain, mapulak ripon nano sabap nanginum ra gatas.

¹³ “I Jibulon mayan ra kiing ru raat. Raralan ru kapal nagas nano. Wilayah nano lumangka' suku' ra Sidon.

¹⁴ “I Isakar abigin koson ra kaladai makalangan ra kuliamos inibit nano.

¹⁵ Kaa' ilain no intok tangusan nano moonsoi kaga' am tana' no mapabansuk kaga', kuung io mansaan ra kuliamos, am jinajalan mangandoi koson ra ulipon.

¹⁶ “I Dan mamarinta ra bansa' nano. Masauk ilo koson ra santayaran ra bansa' ru Israil ra bokon.

¹⁷ Koson kou ra kukuo ra kiing ru ralan, kukuo makapalig ra kiing ru pangkiralanan, ondo' maninduk ra kakating ru kuda saboi makapatir ulun kumura' no.

¹⁸ “Maginaa aku ra pamayagan Muno Tuhan.

¹⁹ “I Gad ongoyon bulunsaro' ru ulun-ulun mantatakou, kaa' tumbalikon no ilo takawi'.

²⁰ “I Asyir, tana' muno mapatuu' ra akanon mangalabung, manampos kou ra akanon ru raja'.

²¹ “I Naptali koson ra tambang ondo' nakalabus pagisisimbul, maganak io ra anak ru tambang ra mongoonsoi.

²² “I Jusup koson ra sanginan kaladai masigo ra kiing ru taur, sanginan kaladai ra masigo ra kiing ru bulur.

²³ Pantula' nano mamulunsar riso ra masangit am mangilou riso ra panah.

²⁴ Kaa' panah ri Jusup mokotog, am kalindu' nano paikangon ri Aki Kapuuno' ri Jakub Ondo' Maayo Kaga' Kuasa', iono Magagalung am Mangampin ra ulun ru Israil.

²⁵ I Aki Kapuuno' ri ama' mu noyo nangindangan rirun. Io Ondo' Maayo Kaga' Kuasa' ondo' nambarakat rirun ra rasam intor ra limbowon am timug intor ragana' ru tana', barakat ra masuang sapi' am masuang anak.

²⁶ Barakat ra masuang gandum am bunga'. Barakat ri Aki Kapuuno' ru ama' muno lumanja' poyo ka intor ra kalangkayaan ru gunung, ondo' matutuo noyo kaga'. Gama' ru poongoyon ngaangai' barakat no ra ulu ri Jusup, ra rabas ru ulun ondo' painggaluron intor pagaka'-pagaka' nano.

²⁷ “I Binjamin koson ra taani masangit. Paat ra susuab ti mongoi io pansaam ra kana'. Paat ra rondom bibinsangon no.”

²⁸ Ginii noyo koopor am ruo tayar ru bansa' ru Israil, am ginii noyo rinagu ru ama' nilono paat ra io namulintor indagu ra anak-anak ungkuyon nano.

Pinatayan am nampalabangan ri Jakub

^29-30 Pambilin boo i Jakub ra anak-anak ungkuyon nano, “Sangkinolor poyo matoi aku no. Lobongo' min aku pasarango' ra kinamatuaan kuli giu' ra luang batu Makpila, tampilon sirangon ru Mamri ra tana' ru Kanaan. Binali ri Abragam luang batu am umo no intor ri Ipron ulun ru Git koson ra kalabangan.

³¹ Intok raginio noyo nampalabangan ri Abragam am andu' nali i Sara. Intok raginio noyo nampalabangan ri Isak am andu' nali i Ribika, am giu' no niayuk nampalabangan kuno ri Liya.

³² Umo am luang batu ondo' soroi ra giu' no binali intor ra ulun ru Git. Lobongo' min aku ra giu' no.”

³³ Kabilini' ri Jakub anak-anak ungkuyon nano, luya' io am patoi.