KASAUKAN 46 - Tanou Moonsoi Timugon

I Jakub am sasambaloi nano mongoi ra pagun ru Misir

¹ Tomposo' ri Jakub ngaangai' kuliamos nano am ongoi ra Birsyiba, intok nano mapataak ra taak simbalui nano ri Aki Kapuuno' ru ama' nali i Isak.

² Paat ra iorondom rondo' intalangan riso, indagu i Aki Kapuuno' riso, “Jakub, Jakub!” Taam io, “Iou, Tuhan.”

³ Kono, “Aku noyo i Aki Kapuuno' sambaan ri ama' muli, pai' kalaa' mongoi ra Misir. Saukon Ku papag muno rondo' bansa' maayo ra giu' no.

⁴ Bayaan Tokou mongoi ra Misir am magibit ra papag muno sumaguli' ra tana' ragitio. Soroi i Jusup ra sapapa' muno paat ra okou matoi.”

⁵ Ugar boo i Jakub intor ra Birsyiba no. Posokoyo' io ru anak-anak nano, am andu' nilono nabaya' ra anak-anak mongoborok nilono ra kurita' kuda pinaator ru raja' ru Misir.

⁶ Ibito' nilo niayuk ngaangai' biniag nilono am kuliamos ondo' naalap nilo ra Kanaan, am ongoi ra Misir. Ibito' ri Jakub ngaangai' papag nano, iono,

⁷ ngaangai' anak ungkuyon am ruandu', ngaangai' akupu ungkuyon am ruandu'.

⁸ Gitio noyo sasambaloi ri Jakub ondo' nababaya' riso minongoi ra Misir. Anak katuaan ri Jakub iono i Rubin,

⁹ am anak-anak ungkuyon ri Rubin; Ginok, Palu, Gijron am i Karmi.

¹⁰ I Simion am anak-anak ungkuyon nano; Jimuil, Jamin, Ogad, Jakin, Jogar am i Saul anak ungkuyon intor ra andu' nano ra ruandu' ru Kanaan.

¹¹ I Liwi am anak-anak ungkuyon nano; Girson, Kigat am i Mirari.

¹² I Jiuda am anak-anak ungkuyon nano; Syila, Piris am i Jirag, kaa' anak-anak ungkuyon ra bokon no; i Ir am i Onan minatoi noyo giu' ra Kanaan. Anak ungkuyon ri Piris iono i Gijron am i Gamul.

¹³ I Isakar am anak-anak ungkuyon nano; Tola, Pua, Jasub am i Simron.

¹⁴ I Jibulon am anak-anak ungkuyon nano; Sirid, Ilon am i Jagliil.

¹⁵ Ginio noyo anak-anak ungkuyon ondo' inanak ri Liya giu' ra Misopotamia, am poyo anak ruandu' nano i Dina. Ngaangai' papag ri Jakub intor ra andu' nano i Liya suang no talu ngoopor am talu ngaulun.

¹⁶ I Gad am anak-anak ungkuyon nano; Jipyon, Gagi, Suni, Ijbon, Iri, Arodi am i Arili.

¹⁷ I Asyir am anak-anak ungkuyon nano; Jimna, Jiswa, Jiswi, Biria am pagaka' ra ruandu' i Sira. Anak ungkuyon ri Biria iono i Gibir am i Malkiil.

¹⁸ Koopor am onom ngaulun ti papag ri Jakub intor ri Jilpa, iono ulipon ruandu' ondo' pinataak ri Laban ra anak ruandu' nano i Liya.

¹⁹ I Ragil andu' ri Jakub makaanak ungkuyon ruo ngaulun iono i Jusup am i Binjamin.

²⁰ Giu' ra Misir makaanak ungkuyon i Jusup ruo ngaulun, iono i Manasi am i Ipraim, ondo' inanak ru andu' nano i Asnat, anak ri Potipira sangulun imam giu' ra Giliopolis.

²¹ Anak ungkuyon ri Binjamin iono i Bila, Bikgir, Asybil, Gira, Naaman, Igi, Ros, Mupim, Gupim am i Arid.

²² Koopor am apat ngaulun ti papag ri Jakub intor ra andu' nali i Ragil.

²³ I Dan am anak ungkuyon nano i Gusyim.

²⁴ I Naptali am anak-anak ungkuyon nano; Jagjiil, Guni, Jijir am i Syilim.

²⁵ Katulu' ngaulun ti papag ri Jakub intor ri Bilga, iono ulipon ruandu' ondo' pinataak ri Laban ra anak ruandu' nali i Ragil.

²⁶ Papag ri Jakub ondo' minongoi ra Misir ngaangai' no suang onom ngoopor am onom ngaulun, kalo nakasimpung anak-anak mangiwan ruandu' nano.

²⁷ Anak ungkuyon ri Jusup ondo' inanak ra Misir ruo ngaulun, am suang ru sasambaloi ri Jakub ondo' soroi ra Misir tulu' ngoopor ngaulun.

I Jakub am sasambaloi nano giu' ra Misir

²⁸ Panusub i Jakub ri Jiuda sumigulu riso mongoi pambala' ri Jusup koson muma' ra ama' nano giu' ra Gosyin. Pakasuku' ilo ra Gosyin,

²⁹ sakoi i Jusup ra kurita' kuda nano muma' ra ama' nano ra giu' no. Pakapaguma' ilo, ganggol i Jusup ra ama' nano am pantangi' io ra nabuoi kaga'.

³⁰ Indagu i Jakub ri Jusup, “Raino nakatampos aku noyo matoi ra nakakito aku noyo rirun am nakapandai ra maayag kou ayuk poyo.”

³¹ Indagu i Jusup ra pagaka'-pagaka' nano am ra pabukat-pabukat ra bokon no, “Musiti' aku muma' ra raja' am mambala' riso ra nakaratong noyo pagaka'-pagaka' kuti am ngaangai' sasambaloi ru ama' kuno ondo' minayan ra Kanaan.

³² Balain ku io ra akau ti magagalung ra domba am sapi', am inibit min biniag mino am ngaangai' longgom min.

³³ Amon ru piawon kau ru raja' am mangkuot atan kandoi mino,

³⁴ balai' min ra magagalung ra biniag ayuk kaayagan mino mogondo' ra kinamatuaan mini. Intor raginio, susubon kau boo mayan ra libung ru Gosyin.” Rinagu ri Jusup ginio sabap ra ulun ru Misir maasaban ilo amon ru sumimpung ra magagalung ra biniag.