KASAUKAN 42 - Tanou Moonsoi Timugon

Minongoi pagaka'-pagaka' ri Jusup ra pagun ru Misir bali ra gandum

¹ Kaining ri Jakub ra pagun ru Misir mokoondo' masuang gandum, indagu io ra anak-anak ungkuyon nano, “Kua pai' kau pambaal ra atan-atan?

² Naining ku masuang gandum ra pagun ru Misir. Ongoi kano ra giu' am pambali kau ra gandum am kalo boo matoi takau ra bitilan.”

³ Ongoi boo koopor ngaulun pinansukapu ri Jusup pambali ra gandum giu' ra pagun ru Misir,

⁴ kaa' iningaan ri Jakub pongkotob ri Jusup iono i Binjamin, sabap ra malaa' io ru makakalaatan masauk ri Binjamin no.

⁵ Anak-anak ri Jakub minatong nababaya' ra ulun bokon mongoi bali ra gandum, sabap ra giu' ra tana' ru Kanaan bulintok bitilan.

⁶ I Jusup koson ra gabenor ru pagun ru Misir nantalan ra gandum ra ngaangai' ulun ra titikop ru tana' ti. Ratong boo pagaka'-pagaka' ri Jusup am kubu ra saang nano.

⁷ Kakito ri Jusup pagaka'-pagaka' nano, kauligi' no ilo, kaa' itambingai io koson kalo nakaulig risilo. Kalasango' ri Jusup kuot no risilo, “Ati intor min ti?” Taam ilo, “Akai ti ulun ru Kanaan, mongoi akai bali ra akanon.”

⁸ Kabalu' pana nakaulig i Jusup ra pagaka'-pagaka' nano, kaa' kalo nakaulig ilo riso.

⁹ Kakara' boo ri Jusup inupi nali risilo, am indagu io boo, “Akau ti mansisigo. Minatong kau ragiti mongoi pangintutun ra kalawaan ru pagun maiti.”

¹⁰ Taam ilo, “Kalo tuan! Minatong akai koson ra ulipon-ulipon muno, mongoi bali ra akanon.

¹¹ Akai ti sangkaaka'. Sala' ka mansisigo akai tuan, mangabanis guang maiti.”

¹² Indagu i Jusup risilo, “Kalo! Minatong kau ragiti mongoi pangintutun ra kalawaan ru pagun maiti.”

¹³ Indagu ilo, “Tuan, akai ti mopor am ruo ngaulun sangkaaka'. Anak ungkuyon akai ru sangulun ungkuyon minayan ra pagun ru Kanaan. Sangulun intor ramon minatoi noyo am raino ondo' pupusan maino soroi ra ama' maili.”

¹⁴ Taam i Jusup, “Koson ra rinagu kuni, akau ti mansisigo.

¹⁵ Kinamin takamin. Ralalom inggalan ru raja' magibot aku ra kalo paugaron kau intor ra pagun ti amon ru kalo matong pupusan mino ragiti.

¹⁶ Sangulun intor ramuyun musiti' mongoi pangalap riso. Bokon-bokon no aputon saboi atan rinagu mini motopot toojo. Amon ru kalo motopot, magibot aku ralalom inggalan ru raja' ra mansisigo kau.”

¹⁷ Aputo' no boo ilo ra pangaputan buoi kataluan.

¹⁸ Paat katalu ra orou, indagu i Jusup risilo, “Aku ti sangulun gumagaya' ri Aki Kapuuno', ampunon takamin ra rondo' kitaakon kuno.

¹⁹ Koson mapainono' kau ra kinabanis ru guang min, tatangon sangulun intor ramuyun ra pangaputan ondo' nangaputan ramuyun, ondo' bokon-bokon no muli' am magibit ra gandum ondo' binali min koson akanon ru ulun ru baloi mini ra nangaitilan i.

²⁰ Mopongo raginio musiti' min ibiton toojo pupusan mino tumuum raki'. Gitio mapainono' ra minindagu kau ra motopot, am kalo ukumin takamin ra potoyon.” Nangiou ilo,

²¹ am pagindagu ilo ra rondo' am bokon, “Iou makasala takau sabap ra atan ondo' pinamakuan takau ra boborok takali. Nakapandai takano nakimasi' io ritakau kaa' kalo linio takau kabalu' pana naimbolo' io kaga'. Ginio sabap ra itakau ti raino natiu' ra kaimbalaan ti.”

²² Indagu i Rubin, “Binalaan takamin noyo ra pai' min jamari' lalaing i, kaa' kalo inining min ragu kuli. Raino nalumaagan takau ra pinatayan nali.”

²³ Nakarati' i Jusup ra ragu nilono, kaa' kalo nakapandai ilo, sabap ra minindagu ilo ri Jusup pinabala' galing ra sangulun mangangalig ra ragu.

²⁴ Iruani' ri Jusup ilo am kokos pantangi'. Pakaindagu io saguli', ongoi io saguli' risilo, alapo' no i Simion am pabangkili' ra saang nilono.

Pagaka'-pagaka' ri Jusup siminaguli' ra Kanaan

²⁵ Pasuangi' ri Jusup karung ru pagaka'-pagaka' nano ra gandum am paulio' ruit nilono ra karung ru sigagama'. Palutui' no ilo ra akanon ra pangkiralanan. Susuban nano ginagaya' baalo'.

²⁶ Kopongo raginio posokoyo' ru pagaka'-pagaka' ri Jusup no gandum ra binali no ra kaladai nilono am ugar intor ra giu' no.

²⁷ Giu' ra intok nambalangan nilo iorondom, bungkalaro' ru sangulun intor risilo karung nano koson mampakan ra kaladai nano. Kakito no boo ruit nano nakatampak ra gandum no.

²⁸ Golok io ra pagaka'-pagaka' nano, “Pinasaguli' ruit kutu. Gitio nai, ralalom ru karung kuti.” Ponontol pusu' nilo am ra ilo nangalaa' pasakuot ilo ra rondo' am bokon, “Atan kia binaal ri Aki Kapuuno' ritakau?”

²⁹ Pakasaguli' ilo ra ama' nilono giu' ra pagun ru Kanaan, tunungo' nilo ngaangai' ondo' nasauk risilo i.

³⁰ Indagu ilo, “Malasang ragu ru gabenor pagun ru Misir i ramon am nanguu' ramon ra mongoi pansigo ra pagun nano.

³¹ Kaa' taam akai, ‘Sala' ka mansisigo akai, mangabanis guang maiti.

³² Mopor am ruo ngaulun akai sangkaaka' intor ra rondo' ama'. Sangulun intor ramon minatoi noyo am ondo' pupusan maino soroi ra ama' maino giu' ra Kanaan.’

³³ Taam gabenor i, ‘Kinamin takamin ru mabanis kia guang mino kapoam kalo. Tatangon sangulun intor ramuyun ra pangaputan ondo' nangaputan ramuyun, ondo' bokon no muli' am magibit ra gandum ondo' binali mino koson akanon ru ulun ru baloi mini ondo' nangaitilan.

³⁴ Ibiton min boo pupusan mini tumuum raki'. Gitio kapandayan ku ra sala' ka mansisigo kau, kaa' ulun mangabanis guang. Pasagulion ku boo pabukat mino ramuyun am makaayan kau ra pagun ti am guguang min mangindapu'.’ ”

³⁵ Paat ra ilo nangalin ra suang ru karung no, katuum nilo sigagama' katia' nilo ra makaruit. Nalaa' ilo am ama' nilo i Jakub.

³⁶ Indagu ama' nilono, “Masaga' kau kia ra maluusan aku ra ngaangai' anak kuno? I Jusup kalio noyo. I Simion pana kalio; am raino masaga' kau poyo magibit ri Binjamin ti. Aku ayuk ondo' maimbolo'!”

³⁷ Indagu i Rubin ra ama' nano, “Amon ru kalo ibiton ku saguli' i Binjamin ti rirun, potoyon mu ruo ngaulun anak ungkuyon kuno. Paalungi' i Binjamin no raki' am ibiton ku io sumaguli'.”

³⁸ Kaa' indagu i Jakub, “Kalo paayaan ku rirun anak kuno. Pagaka' nano minatoi noyo am raino io ayuk soroi. Maaru' makakalaatan masauk riso ra pangkiralanan. Aku ti matutuo noyo am kangilukan porotongon min raki' mangkinibit ra patayan kuno.”