KASAUKAN 41 - Tanou Moonsoi Timugon

Nambala' toojo i Jusup ra arati' ru inupi ru raja'

¹ Kopongo ruo ngambilor, raja' ru pagun ru Misir no nakaupi ra minigor io ra igig ru Sungoi Nil.

² Pulusat ru tulu' ngainan sapi' mongolomok am mongoonsoi siminalula' intor ra sungoi no, am ongoi pongkotop ra sakot giu' ra igig ru sungoi no.

³ Kopongo raginio salula' poyo tulu' ngainan sapi' ra bokon. Sapi'-sapi' ragitio nangabalajat am bungul ayuk soroi. Ongoi ilo umbir ra sapi'-sapi' mongolomok giu' ra igig ru sungoi no.

⁴ Tolono' boo ru sapi'-sapi' nangabalajat no sapi'-sapi' mongolomok, am kakarat boo raja' no.

⁵ Pokororot poyo raja' no am paginupi poyo. Tulu' ngaumi gandum ondo' makaumas am naansak ra rondo' tanggayan.

⁶ Kopongo raginio mokoondo' poyo rondo' tanggayan ondo' mokoondo' tulu' ngaumi gandum ra nangumpis am liminonot sabap ra siniob ru angin ru tana' kaagisan.

⁷ Tolono' boo ru gandum ra nangumpis no gandum makaumas no. Kakarat boo raja' no am katutuni' no ra naginupi io.

⁸ Suabon raginio magalabo guang ru raja' no. Ginio ra piawo' no ngaangai' ulun mapandai kaga' ra sihir am makakapandayan mangilong ru pagun ru Misir no. Tunungo' no risilo inupi nano, kaa' kolondo' sangulun pana risilo makapambala' ra arati' ru inupi ru raja' no.

⁹ Indagu boo tingganai mansulung ra inumon no ra raja', “Orou raiti' musiti' iowon ku kasalaan kuli.

¹⁰ Ragili siminangit kou ra tingganai mansulung ra akanon muli am aku, am pinasubol mu akai ra pangaputan giu' ra baloi ru tingganai ru magagalung no.

¹¹ Sarandaman ragili naginupi akai ruo am inupi maili kalo nogondo' arati' no.

¹² Nakapaat raginio mokoondo' sangulun sumbiling ulun ru Ibrani nababaya' ramon. Ulipon io ru tingganai ru magagalung no. Tunungo' mai inupi maili riso am pambala' io ra arati' ru inupi no.

¹³ Totopot nasauk baal ru inupi maili koson ra rinagu nali. Pinasaguli' mu aku ra kandoi lair kuli, kaa' iningguluan mu tingganai mansulung ra akanon i.”

¹⁴ Panusub raja' no mampiau ri Jusup am indibaki' io paingkualo' intor ra pangaputan no. Pakapangkaur io ra salub nano am kaaligi' no bayang, ongoi io uma' ra raja' no.

¹⁵ Indagu raja' no riso, “Nakaupi aku am kolondo' sangulun pana ondo' makapambala' ra arati' no. Binalaan aku ra okou ondo' makapambala' ra arati' ru inupi i.”

¹⁶ Taam i Jusup, “Raja' mai ra matulai kaga', sala' ka aku kaa' i Aki Kapuuno' ondo' makapambala' ra arati' ru inupi no ra motopot.”

¹⁷ Indagu raja' no, “Naginupi aku ra minigor aku ra igig ru Sungoi Nil.

¹⁸ Pulusat ru tulu' ngainan sapi' mongolomok am mongoonsoi siminalula' intor ra sungoi no, am ongoi pongkotop ra sakot ra igig ru sungoi no.

¹⁹ Kopongo raginio salula' poyo tulu' ngainan sapi' ra bokon. Sapi'-sapi' ragitio nangabalajat am bungul ayuk soroi. Kalo poyo igondo' aku pakakito ra sapi' nangabalajat koson raginio ra titikop pagun ru Misir ti.

²⁰ Tinolon ru sapi'-sapi' nangabalajat no sapi'-sapi' mongolomok no,

²¹ kaa' kolondo' sangulun pana makarati' raginio sabap ra sapi'-sapi' ra nangabalajat no lakat poyo nangabalajat am mangalaat. Kakarat aku boo.

²² Naginupi aku poyo ra tulu' ngaumi gandum ondo' makaumas am naansak ra rondo' tanggayan.

²³ Kopongo raginio mokoondo' poyo rondo' tanggayan ondo' mokoondo' tulu' ngaumi gandum ra nangumpis am liminonot sabap ra siniob ru angin ru tana' kaagisan.

²⁴ Tinolon ru tulu' ngaumi gandum ra nangumpis no tulu' ngaumi gandum ra makaumas no. Tinunung ku inupi kuno ra ulun-ulun mapandai kaga' ra sihir no, kaa' kolondo' sangulun pana risilo makapambala' ra arati' no raki'.”

²⁵ Indagu i Jusup ra raja' no, “Karuo-ruo inupi no nogondo' arati'. Nambala' noyo i Aki Kapuuno' rirun ra atan baalon Nano.

²⁶ Tulu' ngainan sapi' mongolomok no tulu' ngambilor. Tulu' ngaumi gandum ra makaumas no tulu' ngambilor niayuk. Arati' nano nogondo'.

²⁷ Tulu' ngainan sapi ra nangabalajat ondo' siminunu' salula' no am tulu' ngaumi gandum ra nangumpis am liminonot sabap ra siniob ru angin ru tana' kaagisan no tulu' ngambilor bitilan.

²⁸ Koson ra pinabala' ku noyo rirun, nambala' noyo i Aki Kapuuno' rirun ra atan baalon Nano.

²⁹ Buoi tulu' ngambilor, titikop ru tana' ru Misir ti mangaulian.

³⁰ Mopongo raginio matong boo tulu' ngambilor bitilan am paat ra mangaulian i lilianin sabap ra bitilan no mapaluus ra pagun ti.

³¹ Paat ra mangaulian i lingonon liliani' sabap ra bitilan no maaja' kaga'.

³² Nanginduaan ra inupi muno, arati' no baal raginio inaru' noyo ri Aki Kapuuno' am baalon No ginio ra mataki'.

³³ “Raino moonsoi mampili' kou ra sangulun ondo' makaguang am mapintar am anii' io ra kuasa' manalingapu ra pagun ti.

³⁴ Musiti' mangalap kou niayuk ra tingganai ra bokon poyo koson manalingapu ra pagun ti am mangalap sampilimo intor ra tinanom ra buoi tulu' ngambilor mangaulian no.

³⁵ Susubo' ilo manimung ra ngaangai' akanon buoi ru tulu' ngambilor mangaulian no, am anii' ilo ra kuasa' mambuli ra gandum ra bandar-bandar am magalung raginio.

³⁶ Gandum ra tinimung no alapon ra lutuon ru pagun ti paat ra tulu' ngambilor bitilan no. Namagun ra Misir ti pana makaakanon ilo paat ra bitilan no.”

Sinauk i Jusup ra Gabenor ra pagun ru Misir

³⁷ Nangiou raja' am tingganai-tingganai nano ra inatangan ri Jusup no.

³⁸ Indagu boo raja' no risilo, “Kalo lair makauyum takau ra ulun ra bokon ondo' moonsoi poyo intor ri Jusup ti, sabap ra io ti inalungan ru Ambiluo ri Aki Kapuuno'.”

³⁹ Indagu raja' no ri Jusup, “Tinuluan kono ri Aki Kapuuno' ra ngaangai' ti. Sabap no ra napandayan noyo ra okou ti makaguang am mapintar poyo intor ra ulun ra bokon.

⁴⁰ Saukon tokou ra gabenor ra pagun kuti am ngaangai' namagun gumagaya' ra susuban muno. Aku ayuk ondo' makakuasa' poyo intor rirun.

⁴¹ Raino saukon tokou ra gabenor ra titikop pagun ru Misir ti.”

⁴² Paguso' ru raja' sinsing intor ra bubua' ru kalindu' nano, ondo' tinatanduan ra kuasa' ru raja' ru Misir, am pasinsingo' ra bubua' ru kalindu' ri Jusup. Pambayango' no i Jusup ra sukub binaal intor ra linon am pansisigoto' no ra sisigot mas.

⁴³ Anii' no i Jusup ra kurita' kuda ondo' karuo ru raja' ru Misir, am magagalung ayuk ra raja' no siminigulu ugar ra kurita' no liliwa' mompogolok, “Ingkiing kau! Ingkiing kau!” Koson raginio noyo sinauk i Jusup ra gabenor ra titikop pagun ru Misir.

⁴⁴ Indagu raja' no ri Jusup, “Aku noyo raja' – kolondo' sangulun pana ra titikop pagun ru Misir ti makapambaal ra atan-atan amon ru kalo iowon muno.”

^45-46 Inggalani' boo ru raja' no i Jusup ra rondo' inggalan ru Misir i Japnat-Paania, am anii' no i Jusup ra andu' i Asnat, anak ruandu' ri Potipira imam ru bandar Giliopolis. Umur ri Jusup talu ngoopor ngambilor paat io tumalimpuun mangandoi ra raja' ru Misir. Tatango' no istana ru raja' no am ongoi ra titikop ra tana' ru Misir no.

⁴⁷ Buoi tulu' ngambilor mangaulian, tana' nanangampos ra masuang kaga' kumoson.

⁴⁸ Timungo' ri Jusup ngaangai' gandum no am paulio' no ra moonong intok pambulian ra bandar-bandar. Giu' ra moonong bandar, nambuli io ra gandum ondo' kinumos intor ra liliut ru bandar no.

⁴⁹ Gandum tinimung ri Jusup mamu' kaga' saboi linanggaan no manguntob, sabap ra gamu' ru gandum no koson ra gamu' ru agis ru raat.

⁵⁰ Kalo poyo nasaboi bitilan no, i Asnat andu' ri Jusup naganak ra ruo ngaulun anak ungkuyon.

⁵¹ Indagu i Jusup, “Nambaal i Aki Kapuuno' raki' koson mampalilian ra ngaangai' kaimbalaan kuno am ngaangai' baloi ru ama' kuno.” Ginio ra inggalani' no anak katuaan nano i Manasi.

⁵² Kono niayuk, “Nangani' i Aki Kapuuno' raki' ra anak giti ra pagun kaimbalaan kuti.” Ginio ra inggalani' no anak karuo nano i Ipraim.

⁵³ Tulu' ngambilor mangaulian ra gandum ra tana' ru Misir raino tumulou noyo,

⁵⁴ am tumalimpuun boo bitilan tulu' ngambilor koson ra pinabala' ri Jusup i. Giu' ra moonong pagun ra bokon makabitilan, kaa' giu' ra titikop ra tana' ru Misir mokoondo' ra akanon.

⁵⁵ Paat ra ulun-ulun ru Misir bitilan, makitaak ilo ra raja' ra akanon. Kaa' susubon ilo ru raja' no mongoi ri Jusup am gumagaya' ra ngaangai' panusuban ri Jusup no risilo.

⁵⁶ Paat ra bitilan no lumanja' makalalaa' am rumalat ra titikop pagun ru Misir, ukabi' ri Jusup intok nambulian ra gandum am talano' no ra ulun ru Misir.

⁵⁷ Ulun intor ra titikop ru tana' ti matong ra pagun ru Misir mongoi bali ra gandum intor ri Jusup, sabap ra bitilan ra makalalaa' kaga' no riminalat noyo ra ati ayuk intok.