KASAUKAN 37 - Tanou Moonsoi Timugon

I Jusup am pagaka'-pagaka' nano

¹ Riminapil poyo i Jakub ra pagun ru Kanaan, intok inayanan ru ama' nali ra galing i.

² Gitio noyo tunung ri Jakub sambaloi: I Jusup sangulun buayoi ondo' umur nano mopor am tulu' ngambilor. Magalung io ra domba am kambing nababaya' ra pagaka' ungkuyon no ra bokon, iono anak ri Bilga am i Jilpa. Ilo ti ruandu' parulug ru ama' nano. Balain ri Jusup ama' nano ra baalon mangalaat ru pagaka'-pagaka' nano.

³ Motogom poyo i Jakub ri Jusup intor ra anak-anak nano ra bokon no, sabap ra i Jusup inanak paat ra ama' nano matutuo noyo. Pikiti' no i Jusup ra sukub mokolongon maawar ondo' moonsoi.

⁴ Pakaliman pagaka'-pagaka' nano ra motogom poyo ama' nilono ri Jusup ka ilo, kasisangin nilo kaga' i Jusup saboi kalo mindagu ilo riso ra bobonsoi.

⁵ Sarandaman raginio paginupi i Jusup, am katunungi' no pagaka'-pagaka' nano ra inupi nali, giminaai poyo sisang nilai riso.

⁶ Indagu i Jusup, “Rongogo' min inupi kuli.

⁷ Naginupi aku ra itakau ngai' giu' ra umo ondo' tatanga' mamangkos ra gandum. Gandum ra binangkos kuli timinolorog. Gandum ra binangkos mini liminiput am kuku' ra binangkos kuli.”

⁸ Pangkuot pagaka'-pagaka' nano, “Mampaguang kou kia sumauk ra raja' am mamarinta ramon ngaangai'?” Ginio ra liminanja' sisang nilo ri Jusup sabap ra inupi nano am ra atan ondo' pinabala' no intor ra inupi nano.

⁹ Paginupi poyo i Jusup, am tunungo' no ra pagaka'-pagaka' nano, “Naginupi aku poyo. Nakakito aku ra mato ru orou, bulan am mopor am rondo' butitin kiminuku' raki'.”

¹⁰ Tunungo' niayuk ri Jusup inupi nali ra ama' nano, am sangit ama' nano riso, “Atan kia ra inupi ginio? Guang mu kia aku, ina' muli am pagaka'-pagaka' muno matong am kuku' samba rirun?”

¹¹ Mangusolon pagaka'-pagaka' ri Jusup riso, kaa' magail ama' nano mampaguang ra ngaangai' no.

Tinalan i Jusup am inibit ra pagun ru Misir

¹² Sangarawan raginio paat ra pagaka'-pagaka' ri Jusup minongoi ra Sikgim pagalung ra biniag ru ama' nilono,

¹³ indagu i Jakub ri Jusup, “Masaga' aku okou mongoi ra Sikgim intok nagalungan ru pagaka'-pagaka' muno ra biniag no.” Taam i Jusup, “Nakatampos aku noyo ama'.”

¹⁴ Indagu ama' nano, “Ongoi ilai' ru mongoonsoi ayuk kia pagaka'-pagaka' muno am biniag no, am saguli' pambala' raki'.” Ginii noyo napaugaran ru ama' nano ri Jusup intor ra Limayak Gibron. Pakasuku' i Jusup ra Sikgim,

¹⁵ ijajawot io ra giu' no am katuum io ru sangulun ungkuyon ondo' nangkuot riso, “Atan kia uyumon muno?”

¹⁶ Taam io, “Maguyum aku ra pagaka'-pagaka' kuli ondo' magalung ra biniag. Nakapandai kou kia ati ilo i?”

¹⁷ Taam ulun no, “Nakaugar ilono intor ragiti. Naining ku ragu nilai, mongoi ilo ra Dotan.” Sunuo' boo ri Jusup pagaka'-pagaka' nano am katuum no ilo giu' ra Dotan.

¹⁸ Kakito ru pagaka'-pagaka' no i Jusup intor ra maalur, am kalo poyo nakarapog io risilo, pangatang ilo ra mamatoi riso.

¹⁹ Pagindagu ilo, “Gitio noyo magiginupi i.

²⁰ Potoyo' takau io am patiri' takau baangkai nano ra tulubong nalasakan. Raguon takau ra sinaam io ru bibiag masigo. Ilain takau atan kasaukan ru inupi nali.”

²¹ Kaining ri Rubin inatangan nilono am mangkinam io mamayag ri Jusup. Kono, “Pai' min potoyo' io.

²² Patirin ayuk ra tulubong ru tana' kaagisan ti, kaa' pai' jamari'.” Rinagu no ginii sabap ra nangatang io koson mamayag ri Jusup intor risilo am mangator saguli' ra ama' nano.

²³ Pakarapog i Jusup ra pagaka'-pagaka' nano, Bungkayuto' nilo sukub mokolongon maawar ri Jusup.

²⁴ Ralaato' nilo io am patiri' ra tulubong nalasakan.

²⁵ Liliwa' ilo magakan, kakito nilo sampulalayan ulun ru Ismail ondo' mangkiralan intor ra Giliad mongoi ra pagun ru Misir. Unta nilono pinagaut ra apa' pampagamis ra akanon am salong.

²⁶ Indagu i Jiuda ra pagaka'-pagaka' nano, “Atan ampos no ra itakau mamatoi ra boborok takano am patayan nano bunion takau?

²⁷ Talano' takau io ra ulun ru Ismail no. Intor raginio kalo majamaran takau io, am poyo io pagaka' takau galama'.” Nangiou pagaka'-pagaka' nano,

²⁸ am paat ra mansail kukula' ngaulun mantatalan ru Midian, ingkualo' ru pagaka'-pagaka' nano i Jusup intor ra tulubong no am talano' nilo io ra ulun ru Ismail no ra logo ruo ngoopor ngampila' ruit pirok. Ibito' boo i Jusup ru ulun ru Ismail no ra pagun ru Misir.

²⁹ Paat ri Rubin siminaguli' ra tulubong no, am ilai' no kalio i Jusup ra giu' no, rilako' no boo bayang nano sabap ra mangiluk guang.

³⁰ Ruli' io ra pagaka'-pagaka' nano am indagu, “Kalio lalaing i ra giu' no! Atan kia boo baalon ku raino?”

³¹ Panimbalui ilo boo ra sanginan kambing am pososopo' nilo sukub ri Jusup no ra raraa' ru kambing no.

³² Ibito' nilo sukub no am pataako' ra ama' nilono am indagu, “Natuum mai gitio. Anak muno kia tatangan ragitio?”

³³ Nauligan ri Jakub am indagu, “Iou, bayang gitio ri Jusup! Sinaam io ru bibiag masigo. Alii ri Jusup anak kuli minatoi ra bininsang-binsang noyo!”

³⁴ Rilako' ri Jakub bayang nano sabap ra mangiluk guang am pambayang ra bayang mangulir. Nabuoi no binaal ginio sabap pinatayan ru anak nali.

³⁵ Ngaangai' anak ungkuyon am anak ruandu' nano minongoi panimayo riso, kaa' marara' io simoyoon. Indagu io, “Mangulir aku ra anak kuli saboi ra aku matoi.” Pangungulir io ra anak nali i Jusup.

³⁶ Liliwa' raginio, giu' ra pagun ru Misir, talano' i Jusup ru ulun ru Midian no ri Potipar, iono sangulun intor ra pagawai ru raja' ondo' naningganai ra magagalung ru istana raja'.