KASAUKAN 35 - Tanou Moonsoi Timugon

Nambarakat Tuhan ri Jakub giu' ra Bitil

¹ Indagu i Aki Kapuuno' ri Jakub, “Jakub, Aku noyo i Aki Kapuuno' ondo' minintalang rirun paat ra okou nagiru' intor ri Isau maayo muli. Ongoi noyo ra Bitil, ayan ra giu' am pambaal ra rondo' altar Raki'.”

² Indagu boo i Jakub ra ulun ru baloi nano am ra ngaangai' ulun nababaya' riso no, “Patiri' min noyo sinungkalalaing intor ra bansa' ru bokon ondo' binulian min, kapasawo' min guang am pambayang kano ra bayang moonsoi.

³ Iruanin takau intok ragitio am mongoi ra Bitil. Giu' no mambaal aku ra rondo' altar ri Aki Kapuuno' ondo' nangindangan raki', paat ra aku makakapaganan am ondo' nagalung raki' ra ati ayuk angayan kuli.”

⁴ Pataako' nilo boo ngaangai' sinungkalalaing no ri Jakub am pinaaya' niayuk pataako' anting-anting nilono. Lobongo' ri Jakub ngaangai' kuliamos no ragana' ru puun tataun makalu maar ra Sikgim.

⁵ Paat ri Jakub am ngaangai' ulun nano mangiruan ra intok no, mamagun ru bandar-bandar ra paginggaar no ngaangai' kinuasa' ru kalaanan, am kalo baani ilo mangilou ri Jakub am ulun nano.

⁶ Pakasuku' boo i Jakub am ulun nano ra Lus, am raino mauligan ra Bitil giu' ra pagun ru Kanaan.

⁷ Giu' no nambaal i Jakub ra rondo' altar, am inggalani' no intok raginio “Il-Bitil”, sabap ra minintalang i Aki Kapuuno' riso ra giu' no paat ra io nagiru' intor ra maayo nano.

⁸ Giu' no niayuk i Dibora ruandu' magalung ri Ribika minatoi, am linobong ra saau ru puun tataun makalu rabugus ru Bitil. Ginio ra puun tataun no ininggalanan ra “Puun tataun Nantangian”.

Nambarakat i Aki Kapuuno' ri Jakub giu' ra Bitil

⁹ Pakasaguli' i Jakub intor ra Misopotamia, intalang poyo i Aki Kapuuno' am pambarakat riso.

¹⁰ Indagu i Aki Kapuuno' riso, “Inggalan muno i Jakub, kaa' intor raino piawon kou ri Israil.” Ginio ra inggalani' io ri Aki Kapuuno' ri Israil.

¹¹ Indagu poyo i Aki Kapuuno', “Aku noyo i Aki Kapuuno' Ondo' Maayo Kaga' Kuasa'. Pakaanak no ra masuang. Papag muno intaran ru bansa'-bansa' am masauk kou ra kinamatuaan ru raja'-raja'.

¹² Pagun ra nakataak Ku noyo ri Abragam am i Isak, pataakon Ku rirun am ra papag muno.”

¹³ Kopongo raginio iruani' ri Aki Kapuuno' i Jakub.

¹⁴ Intok raginio inindaguan ri Aki Kapuuno' riso, potolorogo' ri Jakub rondo' batu pangkaraan. Uasi' no ra wain am umau jaitun koson patimpokon no ri Aki Kapuuno'.

¹⁵ Inggalani' no intok raginio “Bitil”.

Pinatayan ri Ragil

¹⁶ I Jakub am ulun nano pana nangiruan ra Bitil no. Paat ra ilo lakat poyo maalur intor ra Iprat, nasaboi noyo paat ri Ragil no maganak kaa' mapagon io kaga' malibasan.

¹⁷ Lumanja' noyo ruol ra maganak no, indagu mampaanak no riso, “Paikango' guang muno Ragil, maganak kou poyo ra anak ungkuyon.”

¹⁸ Kaa' patayan ri Ragil nasuku' noyo, am paat ra io matipamukat, inggalani' no anak no i Binoni, kaa' inggalani' ri Jakub i Binjamin.

¹⁹ Kopongo i Ragil minatoi, lobongo' io ra kiing ru ralan mongoi ra Iprat, raino intok raginio mauligan ra Bitligim.

²⁰ Potolorogo' ri Jakub rondo' batu pangkaraan ra giu' no am lakat ayuk poyo batu no koson tatandu' ru lobong ri Ragil saboi raino ti.

²¹ Paginjul poyo i Jakub am panangkim ra sandaup ru manara Idir.

Anak-anak ungkuyon ri Jakub

²² Buoi ri Jakub minayan ra giu' no, rulug i Rubin ri Bilga, iono ruandu' parulug ru ama' nano. Kaala' i Jakub raginio am siminangit io kaga'. Anak ungkuyon ri Jakub mokoondo' mopor am ruo ngaulun.

²³ Anak ungkuyon ri Liya i Rubin (anak katuaan ri Jakub), Simion, Liwi, Jiuda, Isakar am i Jibulon.

²⁴ Anak ungkuyon ri Ragil i Jusup am i Binjamin.

²⁵ Anak ungkuyon ru ulipon ruandu' ri Ragil, i Bilga no i Dan am i Naptali.

²⁶ Anak ungkuyon ru ulipon ruandu' ri Liya, i Jilpa no i Gad am i Asyir. Anak-anak raginio inanak giu' ra pagun Misopotamia.

Pinatayan ri Isak

²⁷ Minongoi i Jakub tuum ri Isak, ama' nano giu' ra Mamri mamaar ra Gibron. Giu' no intok namagunan ri Abragam am i Isak ra galing i.

²⁸ Naayag i Isak buoi maatus am balu' ngoopor ngambilor,

²⁹ am matutuo noyo kaga' ra io minatoi am linobong io ru anak-anak nano i Isau ri Jakub.