KASAUKAN 24 - Tanou Moonsoi Timugon

Andu' ri Isak

¹ Raino i Abragam ti matutuo noyo kaga' am binarakat io ru Tuhan ra atan ayuk baalon nano.

² Sangarawan ragili, indagu i Abragam ra ulipon matutuo nano ondo' magalung ra ngaangai' rapu' nano, “Poompoyo' kalindu' muno ra lolot ru karuruo puun ru paa kutu am pagibot no.

³ Pagiboton tokou ralalom inggalan ru Tuhan i Aki Kapuuno' ondo' manguasa' ra limbowon am tana' ti, ra kalo tambiliin mu anak ungkuyon kutu ra andu' intor ra ruandu' ru libung Kanaan ti.

⁴ Musiti' kou sumaguli' ra pagun naganakan raki' i am panambili' ra anduon ri Isak anak ungkuyon kutu intor ra gino ngai' ru pabukat kuno ayuk poyo.”

⁵ Kaa' pangkuot ulipon no riso, “Ati kulaan amon ru marara' ruandu' no mangiruan ra baloi nano am marara' maya' raki' ragiti? Musiti' kia ibiton saguli' anak muno ra pagun intor muli?”

⁶ Taam i Abragam, “Karaa'! Pai' ibito' anak kuno ra giu' no!

⁷ Sabap ra Tuhan i Aki Kapuuno' ondo' manguasa' ra limbowon am tana' ti, nagibit noyo raki' intor ra baloi ru ama' kuli am intor ra tana' ru pabukat kuno minongoi ragiti, am nagibot Io raki' ra pataakon No tana' ragitio ra papag kuno. Io niayuk manusub ra malaikat Nano mongoi pangindangan rirun maa' raginio makapanambili' kou ra andu' ru anak ungkuyon kuno ra giu' no.

⁸ Amon ru marara' ruandu' no maya' rirun, makalabus kou intor ra ibot ti. Kabalu' pana raginio, pai' ibito' anak ungkuyon kuno sumaguli' ra giu' no.”

⁹ Poompoyo' boo ru ulipon no kalindu' nano ra lolot ru karuruo puun ru paa ri Abragam tuan nano, am pagibot io ra suguton no atan ayuk kitaakon ri Abragam.

¹⁰ Pangalap ulipon no ra mopor ngainan unta am nansalinut poyo kuliamos mongologo ru tuan nano am ongoi ra bandar intok inayanan ri Nagor paat ra io naayag. Intok no tampilon ralayo ru Misopotamia.

¹¹ Pakasaboi io ra giu' no, powogo' no unta-unta no ra patanguson maar ra makatulubong ra liwar ru bandar. Mamai' noyo orou am paat raginio noyo pansagawan ru ruandu'-ruandu' ra timug intor ra tulubong.

¹² Pakiasi' io, “Tuhan i Aki Kapuuno' ru tuan kuno i Abragam, indangano' aku maa' ra indangan Muno makaampos baalon kuno orou raiti' am guuto' toojo bantu' Muno ra tuan kuno.

¹³ Giti aku minigor mamaar ra tulubong ti. Sangkinolor poyo ralaa-ralaa ondo' intor ra bandar mongoi sagou ra timug.

¹⁴ Raguin ku sangulun intor risilo, ‘Patuuno' rarapu' muno am painumo' aku.’ Amon ru taamon no ra, ‘Inum no am unta muno pana painumon ku niayuk,’ gama' ru io noyo pinili' Muno paanduin ra ulipon Muno i Isak. Amon ru baal ragitio masauk, mapandayan ku ra ginuut Mu bantu' Muno ra tuan kuno.”

¹⁵ Kalo poyo nopongo io makiasi', ratong i Ribika nansaan ra rarapu'. Io anak ruandu' ri Bituil anak ri Nagor am i Milka. I Nagor pongkotob ungkuyon ri Abragam.

¹⁶ I Ribika sangulun ruandu' mamulok ondo' mantalur kaga' am ralaa ayuk poyo. Mongoi io ra tulubong no sagou ra timug, pakasagou io am lukiat.

¹⁷ Pasimbul ulipon no tuum riso am indagu, “Painumo' aku no ra timug intor ra rarapu' sinagawan muno.”

¹⁸ Taam ruandu' no, “Inum no tuan.” Indibaki' no patuuno' rarapu' sinagawan nano intor ra limbawo am guuto' no am papainum ra ulipon no.

¹⁹ Pakainum ulipon no, indagu ralaa no, “Sagawin ku niayuk unta muno maa' raginio ngaangai' no majala' manginum.”

²⁰ Indibaki' pasasaro' no timug intor ra rarapu' nano ra intok panginuman ru unta, am pasimbul io poyo saguli' ra tulubong pansagou ra masuang poyo timug saboi ngaangai' unta no najala' nanginum.

²¹ Mangimansa' ulipon ri Abragam ra ralaa no ra kalo minindagu ra atan pana. Masaga' io makapandai koson mangintutun ra inanian io kia ru Tuhan ra kasugutan.

²² Kopongo ru ralaa no kandoi nano, alapo' ru ulipon no sinsing mas ru arung ra mologo am pasinsingo' no ra arung ru ralaa no. Pogolongo' no ruo golong mas ra kalindu' ru ralaa no.

²³ Indagu io, “Balai' aku osoi ama' muno. Makalamin kia baloi nano ra pambalangan kuno am ngaangai' rangan kutu?”

²⁴ Taam ralaa no, “Ama' kuno i Bituil, anak io ri Nagor am i Milka.

²⁵ Giu' ra baloi mai makapambalangan kau am masuang rami am niayuk papakan ru bibiag.”

²⁶ Igulatur boo ulipon no am samba ra Tuhan.

²⁷ Indagu io, “Koompor noyo Tuhan i Aki Kapuuno' ru tuan kuli i Abragam totopot nampaguut ra bantu' Nano ra tuan kuli i Abragam. Inibit aku ru Tuhan parampuso' ra pabukat ru tuan kuli.”

²⁸ Pasimbul boo ralaa no ongoi ra baloi ru ina' nano am tunungo' no atan ondo' nasauk ni.

²⁹ I Ribika makamaayo ra ungkuyon ininggalanan ri Laban. Pasimbul i Laban ingkual ra baloi ongoi ra tulubong intok binigaran ru ulipon ri Abragam no.

³⁰ Nakito ri Laban sinsing ru arung am golong ra kalindu' ru boborok nano. Naining no niayuk tunung ri Ribika ra ngaangai' ondo' rinagu ru ulipon no ri Ribika. Ongoi io tuum ra ulipon ri Abragam ondo' paribigor nabaya' ra unta-unta nano mamaar ra tulubong.

³¹ Indagu i Laban, “Okou noyo ulun ondo' binarakat ru Tuhan. Pai' bigor ra liwar no. Ibok no, ongoi ra baloi maino, makalamin ondo' tinampos kalalair rirun am ayanan ru unta-unta muno.”

³² Baya' boo ulipon no am umpos ra baloi. Patuuno' ri Laban kuliamos ondo' pinatampak ra unta-unta. Anii' no boo unta-unta no ra rami am papakan. Kopongo raginio, pagibit io ra timug pambaguan ra kalayam ru ulipon ri Abragam am rangan-rangan nano.

³³ Paat ra pasulungon akanon, indagu ulipon no, “Kalo mangakan aku amon ru kalo poyo makasaboi ku bilin ra inibit kutu.” Indagu i Laban, “Ba, pabalaa' noyo.”

³⁴ Puuni' boo ru ulipon ri Abragam no raguon nano, kono, “Aku ti ulipon ri Abragam.

³⁵ Nambarakat toojo Tuhan ra tuan kuli am pinalangkaya' No io. Tinaakan No ra tuan kuli domba, kambing, sapi', unta, kaladai, mas, pirok, ulipon ra ungkuyon am niayuk ulipon ra ruandu'.

³⁶ Paat ra matutuo noyo kaga', andu' ru tuan kuli i Sara naganak ra sangulun anak ungkuyon. Ngaangai' rapu' ru tuan kuli pinasugul no ra anak ungkuyon nano.

³⁷ Pinagibot no aku koson gumagaya' ra susuban nano. Kono, ‘Pai' tambilii' anak ungkuyon kuno ra andu' intor ra ruandu' ru tana' ru Kanaan ti,

³⁸ kaa' intor ra pabukat ru ama' kuno. Ongoi no risilo ra mataki'.’

³⁹ Pangkuot aku boo ra tuan kuli, ‘Ati kulaan amon ru marara' ruandu' no maya' raki'?’

⁴⁰ Kaa' taam io, ‘Tuhan ondo' masalok kuno gagayaan no, mangator ra malaikat Nano mangindangan rirun am manugut ra kandoi muno. Makatuum kou ra andu' ru anak ungkuyon kuno intor ra ulun kuno ayuk poyo galama' am iono pabukat ru ama' kuno ayuk poyo.

⁴¹ Rondo' ayuk ralan muno makalabus intor ra ibot muno, iono kalo apuon nilo okou.’

⁴² “Paat ra aku nakasaboi ra tulubong ra orou raiti', pakiasi' aku, ‘Tuhan i Aki Kapuuno' ru tuan kuli i Abragam, Indangano' aku manugut ra atan ayuk baalon kutu.’

⁴³ Giti aku mamaar ra tulubong ti. Paat ra sangulun ruandu' mamulok mongoi sagou ra timug, raguin ku io, ‘Painumo' aku no ra timug intor ra rarapu' sinagawan muno.’

⁴⁴ Amon ru taamon no ra, ‘Inum no am unta muno pana painumon ku niayuk,’ gama' ru io noyo pinili' Muno paanduin ra anak ungkuyon ru tuan kuli.’

⁴⁵ Kalo poyo nakai' pakiasian ru guang kuno, ratong noyo i Ribika nansaan ra rarapu' pansagawan. Indagu aku riso, ‘Anii' aku ra timug inumon.’

⁴⁶ Indibaki' no patuuno' rarapu' sinagawan nano intor ra limbawo am indagu io, ‘Inum no am unta muno pana painumon ku niayuk.’ Inum aku boo am pakainum aku, painumo' no niayuk unta-unta kuno.

⁴⁷ Pangkuot aku boo riso, ‘Osoi kia ama' muno?’ Taam io, ‘Ama' kuno i Bituil, anak io ri Nagor am i Milka.’ Pasinsingo' ku boo sinsing ra arung nano am pogolongo' ku ruo golong ra kalindu' nano.

⁴⁸ Igulatur aku boo samba ra Tuhan am pongompor aku Riso, i Aki Kapuuno' ri Abragam tuan kuli. Inindangan No aku narampus ragiti, intok ru pabukat ru tuan kuli saboi nakatuum aku ra ralaa ti koson anduon ru anak nano.

⁴⁹ Raino, amon ru nakatampos kano manugut ra baalon maatang mino ra tuan kuno am moonsoi pamakuan min riso, pambala' kano raki', kaa' amon ru kalo, pambala' kau niayuk maa' raginio makapandai aku ra atan baalon kuno.”

⁵⁰ Taam boo i Laban am i Bituil, “Sabap ra atan ondo' nasauk ti intor ra Tuhan, kalo matimpok akai mindagu ra iou kapoam kalo.

⁵¹ Gitio i Ribika; ibito' io noyo am ugar no. Sauko' io noyo ra andu' ru anak ungkuyon ru tuan muno sumugut ra inaru' ru Tuhan galama'.”

⁵² Paat naining ru ulipon ri Abragam ragu nilo raginio, igulatur io samba ra Tuhan.

⁵³ Paingkualo' no boo bayang, limpor ru mas am pirok. Pataako' no ngaangai' ri Ribika. Nangani' io niayuk ra taak ondo' mongologo ra maayo ungkuyon am ina' ri Ribika.

⁵⁴ Ulipon ri Abragam no am niayuk ulun-ulun nabaya' riso pana naggakan am nagginum am nombolong ra giu' no. Suabon no ra ilo timinirong, indagu ulipon no, “Polosoo' min aku rumuli' ra tuan kuli.”

⁵⁵ Kaa' indagu maayo ungkuyon am ina' ri Ribika no, “Polosoo' i Ribika ti mayan ramon buoi saminggu' kapoam mopor ngoorou poyo, am malupus raginio, paugaron mai boo io.”

⁵⁶ Kaa' indagu boo ulipon no, “Pai' min aku ingai'. Sinugut noyo ru Tuhan pangkiralanan kutu; polosoo' min aku rumuli' ra tuan kuli.”

⁵⁷ Taam ilo, “Moonsoi piawon takau i Ribika am imumuyi' takau.”

⁵⁸ Piawo' nilo ri Ribika am kuati', “Masaga' kou kia maya' ra ulun ti?” Taam ralaa no, “Iou, masaga' aku.”

⁵⁹ Polosoo' nilo boo i Ribika am ulipon nano maya' ra ulipon ri Abragam no am ulun nababaya' riso no.

⁶⁰ Barakato' nilo boo i Ribika ra ragu ragitio: “Gama' ru okou Ribika, masauk ra ina' ru jujuta' ulun! Gama' ru papag muno manguasa' ra bandar-bandar ru pantula' nilo!”

⁶¹ Tampos boo i Ribika am ruandu'-ruandu' mamulok ondo' nasauk ra ulipon nano, sakoi ilo boo ra unta am baya' ra ulipon ri Abragam no.

⁶² Liliwa' raginio nakasaboi i Isak ra tana' kaagisan nansail ra tulubong ondo' sabiton ra “Io Ondo' Maayag Ondo' Magilong Raki'”, am ayan io ra tampilon rabugus ru pagun ru Kanaan.

⁶³ Paat ra mamai', ingkual i Isak intor ra kim nano mongoi ugar-ugar ra umo am pakakito ra unta sarulatong.

⁶⁴ Pakakito i Ribika ri Isak, tuun io intor ra unta nano,

⁶⁵ kuati' no ulipon ri Abragam no, “Osoi kia ungkuyon ondo' muma' ritakau no?” Taam ulipon ri Abragam no, “Io no tuan kuno.” Ginio ra alapo' ri Ribika rundung am silii' no ra bulos nano.

⁶⁶ Tunungo' boo ru ulipon no ri Isak ra ngaangai' ondo' binaal nali.

⁶⁷ Kopongo raginio, ibito' ri Isak i Ribika mumpos ra kim ru ina' nali i Sara, am anduo' no boo i Ribika. Motogom kaga' i Isak ri Ribika, am maansukan boo guang ri Isak ra mangiluk no sabap ra pinatayan ru ina' nali.