KASAUKAN 21 - Tanou Moonsoi Timugon

I Isak inanak

¹ Binarakat ru Tuhan i Sara koson ra binantu' Nali.

² Ginio ra maapang i Sara am paganak sangulun anak ungkuyon paat ri Abragam matutuo noyo. Anak raginio inanak sumugut ra ondo' inaru' noyo ri Aki Kapuuno'.

³ Inggalani' ri Abragam anak no ri Isak.

⁴ Paat umur ri Isak balu' ngoorou, sunati' io ri Abragam sumugut ra susuban ri Aki Kapuuno'.

⁵ Umur ri Abragam maatus ngambilor paat i Isak inanak.

⁶ Indagu i Sara, “Napakurit i Aki Kapuuno' raki' sabap ra maansukan. Moonong ulun makaining ra baal raginio ondo' makakurit ra maansukan mabaya' raki'.”

⁷ Indagu poyo i Sara, “Osoi kia nakaindagu ragili ra ralaki kuno ra mapatiti' aku ra anak? Kaa' naganak aku niayuk kabalu' pana matutuo noyo kaga' ralaki kutu.”

⁸ Sumukor noyo anak no am paat ra io pinolonggo' tumiti', pambaal i Abragam ra rondo' bunsag maayo.

I Agar am i Ismail pinaugar ri Abragam

⁹ Sangarawan ragili, i Ismail anak ri Abragam ilo ri Agar ruandu' ru Misir no, nakimangkuli ri Isak, anak ri Sara.

¹⁰ Kakito ri Sara ginio, indagu io ri Abragam, “Pagiruo' ulipon ruandu' no mabaya' ra anak nano. Anak ru ruandu' no kalo makaalap ra tayar ru rapu' kalangkayaan muno ondo' tungkuson ru anak kuno i Isak.”

¹¹ Baal raginio makangiluk kaga' ra guang ri Abragam sabap ra i Ismail pana anak nano niayuk.

¹² Kaa' indagu i Aki Kapuuno' ri Abragam, “Pai' pangiluk guang sabap ra ulipon muno i Agar am anak nano. Kaa', suguto' ayuk atan ondo' rinagu ri Sara rirun sabap ra intor ri Isak noyo makapapag kou ra masuang sumugut ra ondo' binantu' Kuli.

¹³ Koon niayuk ra anak ri Agar, taakin Ku riso papag ra masuang am masauk ilo ra rondo' bansa', sabap ra anak mu io niayuk.”

¹⁴ Paat ra suabon no, rondomo' anii' ri Abragam i Agar ra akanon am rondo' kantungan ru kungkung sinuangan ra timug. Paibaa' no anak no ri Agar am paugaro' no ruandu' no. Ongoi boo i Agar ra tana' kaagisan ru Birsyiba.

¹⁵ Kakai' timug ra linutu' no, pabantaa' ri Agar anak nano ra malalaat,

¹⁶ panturung io boo olo'-olo' maatus ngamito galur i. Kon ru guang nano, “Kalo tumaan aku magilong ra anak kuno matoi.” Io pana nantangi'.

¹⁷ Naining ri Aki Kapuuno' tangi' ri Ismail am intor ra limbowon, indagu malaikat ri Aki Kapuuno' ri Agar, kono, “Atan kia mantipagon rirun Agar? Pai' no kalaa', naining ri Aki Kapuuno' tangi' ru anak muno.

¹⁸ Ingkakat no, ongoyo' ibai' am simoyoo' io. Sabap saukon Ku papag nano ra rondo' bansa' ondo' maayo.”

¹⁹ I Aki Kapuuno' pana nangukab ra mato ri Agar saboi nakito no rondo' tulubong. Ongoyo' no suangi' kantungan ru kungkung no ra timug am painumo' no anak nano.

²⁰ I Aki Kapuuno' riminondon ri Ismail saboi ra io nasukor. Minayan io ra tana' kaagisan ru Paran am nasauk ra sangulun moporong mampalula'.

²¹ Inuatan io ru ina' nano ra sangulun ruandu' ru Misir.

Nabantuan ri Abragam am Raja' Abimilik

²² Paat raginio Raja' Abimilik am i Pikgol, tingganai saujor nano minongoi tuum ri Abragam am indagu, “Sumimpung i Aki Kapuuno' rirun ra atan ondo' baalon muno.

²³ Ginio ra pagibot no ragiti ra saang ri Aki Kapuuno' ra kalo mamparuung kou raki', anak-anak kuno kapoam papag kuno. Koson raki' minonsoi rirun, koonsoi niayuk raki' am tana' inayanan muti.”

²⁴ Indagu i Abragam, “Magibot aku.”

²⁵ Kaa' panguang i Abragam ri Abimilik ra tulubong ondo' ginaau ru ulipon ru Raja' Abimilik.

²⁶ Indagu i Abimilik, “Kalo nakapandai aku ra osoi boo nambaal ni. Kalo poyo nambala' kou raki' am gitio kasaa' ku makaining ra baal raginio.”

²⁷ Pangani' boo i Abragam ri Abimilik ra kukula' ngainan domba am sapi' am pambaal ilo karuruo ra bantu'.

²⁸ Pasuayo' ri Abragam tulu' ngainan anak domba intor ra domba tinambiag nano,

²⁹ am pangkuot Raja' Abimilik, “Kua kia baalo' mu ginio?”

³⁰ Taam i Abragam, “Alapo' noyo tulu' ngainan anak domba ti koson tatandu' ra okou mangiou ra aku noyo nangkali ra tulubong ragitio.”

³¹ Ginio ra ininggalanan intok raginio ra Birsyiba sabap ra intok raginio nabantuan nilo ruo.

³² Kabaal nilo nabantuan no ra Birsyiba, Raja' Abimilik am i Pikgol siminaguli' ra pagun ru ulun ru Palistin.

³³ Pantanom boo i Abragam ra puun tamariska ra Birsyiba am intok sambaan nano ra Tuhan i Aki Kapuuno' ondo' mantilayun.

³⁴ Kopongo raginio, nabuoi niayuk i Abragam minayan ra pagun ru ulun ru Palistin.