KASAUKAN 18 - Tanou Moonsoi Timugon

Nambantu' i Aki Kapuuno' ra manaak ri Abragam ra sangulun anak ungkuyon

¹ Minintalang Tuhan ri Abragam maar ra puun-puun matulai giu' ra Mamri. Nakapaat ra mapangit toojo orou am nanturung i Abragam ra kulobon ru kim nano.

² Tungar io am kakito no mokoondo' talu ngaulun ungkuyon minigor ra tuma' nano. Kakito no ilo, pasimbul io ongoi tuum risilo. Kubu io boo,

³ am indagu, “Tuan, akau ngaangai' ti, pai' kau sail ayuk ra kalo mapit galing, nakatampos aku noyo manguma' ramuyun.

⁴ Moonsoi mangalap aku ra timug pambaguan ra kalayam mino. Pantingangus kau ra saau ru puun ti.

⁵ Mampasulung aku ramuyun ra sanganu akanon maa' raginio maikang kau maparampus ra pangkiralanan mino. Nangurumat kano raki' ra minapit kau ra inayanan kutu.” Taam ilo, “Paringkuanangan mai rirun, iou mapit akai poyo.”

⁶ Pagindibok i Abragam minumpos ra kim am indagu ri Sara, “Ribaki', alap ra tapung moonsoi kaga' no am pambaal ra ruti'.”

⁷ Pasimbul io boo ongoi ra intok sampanon ru bibiag nano am rakop ra sanginan anak sapi' molomok am malami' kual no, pataako' no ra kinambo nano am pakandayi' no riso.

⁸ Kopongo raginio, pangalap i Abragam ra sanganu krim, sanganu gatas am kual ra naansak noyo, am pasulungo' no ra tambului-tambului nano. Am liliwa' nilo mangakan, i Abragam galama' magayam risilo ra saau ru puun no.

⁹ Kopongo raginio, pangkuot ilo ri Abragam, “Ati andu' muno i Sara?” Taam i Abragam, “Giu' no, ralalom kim no.”

¹⁰ Indagu sangulun intor risilo, “Siam ngansila' intor raino ti rumuli' aku. Paat raginio, andu' muno i Sara makaanak sangulun ungkuyon.” Paat raginio, mangintalingo i Sara ra kulobon ru kim no, giu' ra talikuron nilai.

¹¹ Matutuo noyo i Abragam am i Sara, am liminonggo' noyo i Sara ti liuran.

¹² Masuatan i Sara am indagu, “Matutuo aku noyo am nangumpis noyo, kalo noyo lair makimarulug aku ra ralaki kuno? Ralaki kuno pana matutuo noyo.”

¹³ Pangkuot boo Tuhan ri Abragam, “Kua kasuati' i Sara am pangimuag ra lakat poyo maganak io kabalu' pana matutuo io noyo?

¹⁴ Ginio ra babaai kia kalo mapasauk Tuhan no ra atan-atan? Koson ra ragu Ku ra raitii' ni ra siam ngansila' intor raino rumuli' Aku ragiti. Paat raginio i Sara makaanak sangulun ungkuyon.”

¹⁵ Sabap ra nalaa' i Sara, pangimbuali' io, kono, “Kalo nasuatan aku.” Kaa' taam Tuhan, “Iou, nasuatan kou.”

Pakiasian ri Abragam ra bandar Sodom ampunon

¹⁶ Kopongo raginio, ugar boo talu ngaulun no mongoi ra rondo' intok maimpal bandar Sodom. Rapiti' ilo ri Abragam ra pangkiralanan.

¹⁷ Migindagu Tuhan ralalom guang, “Kalo bunion Ku intor ri Abragam atan ondo' baalon Kuno.

¹⁸ Papag nano noyo masauk ra bansa' maayo am makakuasa'. Barakaton Ku ngaangai' bansa' ra tana' ti sabap io.

¹⁹ Pinili' Kuno io, maa' raginio ra masusub no anak-anak nano am papag nano gumagaya' Raki' am mambaal ra atan ondo' motopot am matanda'. Amon ru baalon nilo koson raginio, ngaangai' bantu' Kuno ri Abragam suguton Ku.”

²⁰ Indagu boo Tuhan ri Abragam, “Makapanguwan ra maagat kaga' ra bandar Sodom am bandar Gomora am tula nilono maayo kaga'.

²¹ Ginio ra moonsoi mongoi Aku pangimumui ru ngaangai' panguwan ondo' naining Kuno motopot kapoam kalo.”

²² Ruo ngaulun no pana minugar mongoi ra bandar Sodom, kaa' Tuhan timinatang ri Abragam.

²³ Inggaar i Abragam ra Tuhan am pangkuot, “Motopot kia ra pusoon Mu ulun kolondo' sala mabaya' ra ulun makasala?

²⁴ Amon ru makalimo ngoopor ngaulun kolondo' sala ralalom bandar no, pusoon Mu kia ngaangai'? Kalo kia ampunon Mu koson mamayag ra limo ngoopor ngaulun no?

²⁵ Pai' potoyo' ulun kolondo' sala mabaya' ra ulun makasala. Tuhan, pai' noyo! Sabap amon ru baalon Mu ginio, ulun kolondo' sala pana makaaya' kaukum. Maaru' akim ru titikop ra tana' ti tumimbalos ra matanda'.”

²⁶ Taam Tuhan, “Amon ru mapandayan Ku ra limo ngoopor ngaulun ondo' kolondo' sala ra bandar Sodom, ampunon Ku titikop bandar no sabap ilo.”

²⁷ Indagu poyo i Abragam, “Ampuno' aku sabap kinabaani kuno mararayus indagu Rirun, Tuhan. Aku ti ulun toojo ayuk am kalo maaya' mindagu ra atan-atan pana.

²⁸ Kaa' maaru' lair makaapat ngoopor am limo ngaulun ayuk ondo' kolondo' sala am sala' ka limo ngoopor. Pusoon Mu niayuk kia bandar raginio sabap ra limo ngaulun poyo kalo naukop?” Taam Tuhan, “Kalo pusoon Ku bandar no ru mapandayan Ku makaapat ngoopor am limo ngaulun ondo' kolondo' sala.”

²⁹ Indagu poyo i Abragam, “Amon ru makaapat ngoopor ngaulun ayuk?” Taam Tuhan, “Kalo pusoon Ku sabap ra apat ngoopor ngaulun no.”

³⁰ Indagu i Abragam, “Malansan kalo sumangit Kou Tuhan sabap ra mindagu aku poyo. Ati kulaan amon ru makatalu ngoopor ngaulun ayuk?” Taam Tuhan, “Amon ru mapandayan Ku ra talu ngoopor ngaulun ayuk, kalo niayuk baalon Ku.”

³¹ Indagu i Abragam, “Tuhan, ampuno' aku sabap ra kinabaani ku marayus ayuk mangkuot Rirun. Amon ru makaruo ngoopor ngaulun ayuk?” Taam Tuhan, “Kalo pusoon Ku bandar no ru mapandayan Ku ra makaruo ngoopor ngaulun.”

³² Indagu poyo i Abragam, “Pai' sangit Tuhan, mindagu aku poyo kaigondo'. Ati kulaan amon ru mokomopor ngaulun ayuk?” Taam Tuhan, “Kalo pusoon Ku sabap ra mopor ngaulun no.”

³³ Kopongo Tuhan minindagu ri Abragam, Tuhan pana minugar am i Abragam pana minuli' ra baloi nano.