KASAUKAN 16 - Tanou Moonsoi Timugon

I Agar am i Ismail

¹ I Sarai andu' ri Abram ti lakat poyo kolondo' anak. Kaa' i Sarai makaulipon intor ra Misir, sangulun ralaa inggalan no i Agar.

² Indagu i Sarai ri Abram, “Kalo noyo lair paganakon aku ru Tuhan. Ginio ra rulugo' noyo ulipon kuno. Makapaganak io lair raki' kasangulun anak.” I Abram pana nangiou ra atan ondo' rinagu ri Sarai.

³ Ginio ra pataako' ri Sarai i Agar no ri Abram. Paat raginio mopor ngambilor noyo buoi ri Abram namagun ra pagun ru Kanaan.

⁴ Rinulug boo ri Abram i Agar am kaapang io. Kalimani' ri Agar ra maapang io noyo, liminimbau io boo am magasab ri Sarai.

⁵ Indagu boo i Sarai ri Abram, “Ginio sala muno saboi magasab i Agar no raki'. Aku galama' napataak riso rirun am paat nalimanan no ra maapang io, magasab io boo raki'. Gama' ru salingapuon toojo ru Tuhan no ra osoi kia rito motopot, okou kia kapoam aku.”

⁶ Taam i Abram, “Ba iou, io ulipon muno am makakuasa' kou poyo riso. Okou ra guang mambaal ra atan ayuk pamakuan muno riso.” Imboloo' boo ri Sarai i Agar ra najanjayan saboi nagiru'.

⁷ Malaikat ru Tuhan nakatuum ri Agar maar ra taur ru timug ra tana' kaagisan, giu' ra ralan mongoi ra tana' kaagisan Syur.

⁸ Indagu malaikat no, “Agar, ulipon ri Sarai, ati intor muno am ati angayan muno?” Taam i Agar, “Nagiru' aku intor ri Sarai, nangulipon raki' no.”

⁹ Indagu malaikat no, “Ruli' no riso am sauk noyo ra ulipon nano.”

¹⁰ Indagu poyo malaikat no, “Aniin tokou ra papag masuang saboi kolondo' sangulun pana makauntob risilo.

¹¹ Kalo boo mabuoi maganak kou ra sangulun anak ungkuyon ondo' inggalanin mu ri Ismail sabap naining ru Tuhan laa muli.

¹² Kaa' anak muno maayag koson ra kaladai masigo, manggal io ra osoi ayuk am manggal osoi ayuk riso. Mayan io ra maalur intor ra ngaangai' pabukat nano.”

¹³ Magikuot i Agar ra guang nano, “Motopot kia nakakito aku ri Aki Kapuuno' am kalo minatoi?” Ginio ra sabito' no Tuhan ondo' minindagu riso no ri “I Aki Kapuuno' Ondo' Magilong”.

¹⁴ Ginio ra ulun manginggalan ra tulubong ondo' lolot ru Kadis am Birid, “Tulubong ru Io Ondo' Maayag Ondo' Magilong Raki'”.

¹⁵ I Agar pana naganak ra sangulun anak ungkuyon, ama' no i Abram ondo' nanginggalan ra anak no i Ismail.

¹⁶ Paat raginio umur ri Abram balu' ngoopor am onom ngambilor.