KASAUKAN 11 - Tanou Moonsoi Timugon

Manara Babil

¹ Paat ra talimpuun i, mamagun ra titikop ru tana' ti mokoondo' rondo' ayuk ragu am ilo magindagu ra rondo' ayuk sinulabit.

² Paat ilo minanding tampilon ra sirangon, nakatuum ilo ra tana' limayak ra Babilonia am pamagun ilo ra intok raginio.

³ Magindagu ilo ra rondo' am bokon, “Ibok! Pambaal takau ra batu bata' am uboon takau saboi mokotog.” Ginio boo ra makabatu bata' ilo koson pambaal nilo ra baloi am tiir koson alapon ra pomolokot.

⁴ Indagu ilo, “Raino pambaal takau ra bandar am manara ondo' makasuku' ra lingkatur ru limbowon maa' raginio itakau mauligan kaga' ru ulun am kalo makapantuliar ra titikop ru tana' ti.”

⁵ Tauli tuun boo Tuhan mongoi pagilong ra bandar no am manara ondo' binaal ru ulun.

⁶ Indagu Tuhan, “Ulun-ulun ragitio nasauk ra rondo' bansa' am mindagu ra rondo' ragu; am gitio talimpuun ayuk poyo ra inatangan nilo. Kalo boo mabuoi raginio, sangkabaali' nilo ra kasagaan nilo.

⁷ Ibok tuun Takau am jojowo' ragu nilono maa' raginio kalo makapagarati' ilo ra rondo' am bokon.”

⁸ Ginio noyo ra ilo pinantutuliar ru Tuhan ra titikop ru tana' ti. Longgo' ilo boo nambaal ra bandar no.

⁹ Bandar no ininggalanan ra Babil sabap ra giu' noyo jinajou ru Tuhan ragu ru ulun, am ra giu' noyo napatuliaran ru Tuhan ra ulun ra titikop ru tana' ti.

Papag ri Siim

¹⁰ Gitio noyo Papag ri Siim. Kopongo ruo ngambilor intor ra rosob i, paat umur ri Siim 100 ngambilor, makaanak ungkuyon io sangulun ininggalanan ri Arpaksad.

¹¹ Kopongo ragili, naayag io poyo buoi 500 ngambilor am makaanak poyo ra bokon.

¹² Paat umur ri Arpaksad 35 ngambilor, makaanak ungkuyon io sangulun ininggalanan ri Sila.

¹³ Kopongo ragili, naayag poyo i Arpaksad buoi 403 ngambilor am makaanak poyo ra bokon.

¹⁴ Paat umur ri Sila 30 ngambilor, makaanak ungkuyon io sangulun ininggalanan ri Ibir.

¹⁵ Kopongo ragili, naayag poyo i Sila buoi 403 ngambilor am makaanak poyo ra bokon.

¹⁶ Paat umur ri Ibir 34 ngambilor, makaanak ungkuyon io sangulun ininggalanan ri Pilig.

¹⁷ Kopongo ragili, naayag poyo i Ibir buoi 430 ngambilor am makaanak poyo ra bokon.

¹⁸ Paat umur ri Pilig 30 ngambilor, makaanak ungkuyon io sangulun ininggalanan ri Riyu.

¹⁹ Kopongo ragili, naayag poyo i Pilig buoi 209 ngambilor am makaanak poyo ra bokon.

²⁰ Paat umur ri Riyu 32 ngambilor, makaanak ungkuyon io sangulun ininggalanan ri Sirug.

²¹ Kopongo ragili, naayag poyo i Riyu buoi 207 ngambilor am makaanak poyo ra bokon.

²² Paat umur ri Sirug 30 ngambilor, makaanak ungkuyon io sangulun ininggalanan ri Nagor.

²³ Kopongo ragili, naayag poyo i Sirug buoi 200 ngambilor am makaanak poyo ra bokon.

²⁴ Paat umur ri Nagor 29 ngambilor, makaanak ungkuyon io sangulun ininggalanan ri Tirag.

²⁵ Kopongo ragili, naayag poyo i Nagor buoi 119 ngambilor am makaanak poyo ra bokon.

²⁶ Paat umur ri Tirag 70 ngambilor, makaanak ungkuyon io talu ngaulun iono i Abram, Nagor am i Aran.

Papag ri Tirag

²⁷ Gitio noyo papag ri Tirag: I Tirag ama' ri Abram, Nagor am i Aran. I Aran ama' ri Lot.

²⁸ Minatoi i Aran ra pamagunan nano galama' iono bandar Ur giu' ra Babilonia, paat ra ama' nano lakat ayuk poyo naayag.

²⁹ I Abram nanangandu' ri Sarai am i Nagor nanangandu' ri Milka, anak ruandu' ri Aran. Makaanak ungkuyon poyo i Aran ra bokon ininggalanan ri Jiska.

³⁰ I Sarai ti tabanang.

³¹ Nagibit i Tirag ra anak ungkuyon nano i Abram, akupu nano i Lot anak ri Aran am anak mangiwan ra ruandu' nano i Sarai, andu' ri Abram, nangiruan ra bandar Ur ru Babilonia, am ongoi ra pagun ru Kanaan. Kaa' pakasuku' ra Aran, pamagun ilo ra giu' no.

³² Intok raginio pinatayan ri Tirag ra umur nano 205 ngambilor.