KAINGKUALAN 9 - Tanou Moonsoi Timugon

Namagatoi bibiag tinambiag

¹ Indagu Tuhan ri Musa, “Ongoi noyo tuum ra raja' am balai' io ra Tuhan i Aki Kapuuno' ru ulun ru Ibrani mindagu, ‘Paugaro' noyo ulun Kuno maa' raginio makasambayang ilo Raki'.

² Amon ru lakat poyo marara' kou mapaugar risilo,

³ ukumin Tokou. Maparatong Aku ra maruol ondo' malaat kaga' ra ngaangai' bibiag tinambiag muno; kuda, kaladai, unta, sapi', domba am kambing.

⁴ Pansalaan Ku bibiag tinambiag ru ulun ru Israil am bibiag tinambiag ru ulun ru Misir. Sanginan pana ra bibiag tinambiag ru ulun ru Israil kalo matoi.

⁵ Aku Tuhan nangaru' noyo ra orou susuab no baalon ginio.’ ”

⁶ Paat ra suabon no nambaal Tuhan koson ra rinagu Nali, am ngaangai' bibiag tinambiag ru ulun ru Misir namagatoi, kaa' bibiag tinambiag ru ulun ru Israil kolondo' minatoi.

⁷ Nangkuot raja' ra atan ondo' nasauk, am binalaan raja' ra bibiag tinambiag ru ulun ru Israil kolondo' sanginan pana minatoi. Kaa' lakat poyo bambalingatan am marara' raja' mapaugar ra ulun ru Israil.

Talipos

⁸ Indagu boo Tuhan ri Musa am i Arun, “Alap ra kukula' ngogonggom kaau intor ra rapuan. Musiti' pataukon ri Musa ra rasawat ra saang ru raja'.

⁹ Makatuba' kaau no koson ra tapung kaau ra titikop ru tana' ru Misir. Makalabui kaau no ra talipos ondo' maturak masauk ra pilat makanana' ra ulun am bibiag.”

¹⁰ Ginio ra alap i Musa am i Arun ra kaau intor ra rapuan am bigor ra saang ru raja'. Patauko' ri Musa kaau no ra rasawat, pakalabui boo kaau no ra talipos ondo' maturak masauk ra pilat makanana' ra ulun am bibiag.

¹¹ Kalo makatuum ulun mapandai kaga' ra sihir no ri Musa sabap ra napuu ilo ra talipos koson ulun ru Misir ra bokon no.

¹² Kaa' nangkinibit Tuhan ra bambalingatan raja', am koson ra rinagu ru Tuhan, marara' raja' mangining ra ragu ri Musa am i Arun.

Rasam batu

¹³ Indagu boo Tuhan ri Musa, “Ongoi noyo tuum ra raja' rumondom ra susuab no, am balai' io ra Tuhan i Aki Kapuuno' ru ulun ru Ibrani mindagu, ‘Paugaro' noyo ulun Kuno maa' raginio makasambayang ilo Raki'.

¹⁴ Raino ti mangukum Aku sala' ka ayuk ra pagawai muno am mamagun muno, kaa' okou niayuk, maa' raginio makapandai kou ra kolondo' osoi pana ondo' koson Raki' ra titikop ru tana' ti.

¹⁵ Amon ru nangukum Aku rirun am mamagun muno ra maruol, maaru' malingon kau ngai' maluus.

¹⁶ Kaa' polosoon Tokou maayag koson mapakito rirun ra kuasa' Kuno, maa' raginio inggalan Kuno mauligan toojo ra titikop ru tana' ti.

¹⁷ Kaa' lakat kou poyo lumimbau am kalo mapaugar ra ulun Kuno.

¹⁸ Olo'-olo' paat ragitio ra susuab no, paratuon Ku rasam batu ondo' maawas, ondo' kalo igondo' nasauk buoi ra sejarah ru pagun ru Misir.

¹⁹ Raino panusub no maa' raginio bibiag tinambiag am ngaangai' longgom muno ondo' soroi ra lisar ibiton ra intok masindungan. Ngaangai' ulun am bibiag tinambiag ondo' soroi ra liwar am kalo makasindung matoi malumpa' ru rasam batu.’ ”

²⁰ Malaa' kukula' ngaulun pagawai ru raja' sabap ra bala' ru Tuhan no. Ginio ra ibito' nilo inulipon am bibiag tinambiag nilo mumpos ralalom baloi maa' raginio makasindung.

²¹ Kaa' pagawai ra bokon no kalo nampalio ra bala' ru Tuhan am nopoloso ra inulipon am bibiag tinambiag nilo ra lisar.

²² Indagu boo Tuhan ri Musa, “Kakato' longon muno tampilon ra limbowon, rumatu' boo rasam batu ra titikop ru tana' ru Misir. Makalumpa' rasam no ra ulun, bibiag tinambiag am tutuu' giu' ra umo.”

²³ Ginio ra kakato' ri Musa jujuga' nano tampilon ra limbowon, am porotongo' ru Tuhan tingkalur am rasam batu; ganit pana nakatiu' ra tana'. Naparatu' Tuhan ra

²⁴ rasam batu ondo' maawas, am ganit nakatiu' ra giu' am giti. Ginio noyo rasam ondo' makalalaa' kaga' ondo' igondo' nasauk buoi ra sejarah ru Misir.

²⁵ Giu' ra titikop pagun ru Misir, pinuso ru rasam batu ngaangai' ondo' soroi ra lisar, nakaaya' ngaangai' ulun am bibiag tinambiag. Namuso rasam batu no ra ngaangai' tutuu' ra umo am napagaba' ra ngaangai' puun tataun.

²⁶ Tampilon ayuk ra Gosyin, intok inayanan ru ulun ru Israil kalo nalumpa' ra rasam batu.

²⁷ Pampiau boo raja' ri Musa am i Arun am indagu, “Raino ti natulaan aku. Motopot toojo Tuhan no, aku am mamagun kuno makasala.

²⁸ Pakiasi' noyo ra Tuhan. Sama' noyo akai naimbolo' sabap ra tingkalur am rasam batu ti. Bantuon ku ra mapaugar ramuyun. Kalo pana boo mayan kau ragiti.”

²⁹ Indagu i Musa ra raja', “Makaingkual aku ayuk ra bandar, makiasi' aku ra Tuhan liliwa' mangakat ra longon. Lumonggo' tingkalur am tuminas rasam batu ti, koson makapandai kou ra tana' ti longgom ru Tuhan.

³⁰ Kaa' nakapandai aku ra okou raja' am pagawai muno kalo poyo malaa' ra Tuhan i Aki Kapuuno'.”

³¹ Tatanom rami am barli nangalupis, sabap ra barli nangkawa' noyo am rami mambusak,

³² kaa' gandum kalo nalupis sabap ra kalo poyo bulintok no.

³³ Iruani' boo ri Musa raja' am ongoi ra liwar ru bandar. Giu' no nakiasi' io ra Tuhan am nangakat ra longon, longgo' boo tingkalur, rasam batu am rasam.

³⁴ Pakakito raja' ra atan nasauk no, makatula poyo raja'. Raja' am pagawai nano magulayun bambalingatan.

³⁵ Mogondo' ra rinagu ru Tuhan ondo' pinabala' galing ri Musa, kalo mapaugar raja' ra ulun ru Israil.