KAINGKUALAN 8 - Tanou Moonsoi Timugon

Antit

¹ Indagu boo Tuhan ri Musa, “Ongoi tuum ra raja' am balai' io ra ragu ru Tuhan, ‘Paugaro' noyo ulun Kuno maa' raginio makasambayang ilo Raki'.

² Amon ru kalo iowon mu, totopon Ku pagun muno ra antit koson ra ukuman.

³ Sungoi Nil mototop kaga' ra antit, saboi mingkual antit intor ra timug am mumpos ra istana muno, mumpos ra lamin kaalangan am rasawat ru katil muno, am niayuk mongoi ra baloi ru pagawai muno am mamagun muno, am poyo mumpos ra pangansakan ra ruti' am intok pambaalan ra ruti'.

⁴ Tumindak antit no rirun, mamagun muno am ngaangai' pagawai muno.’ ”

⁵ Indagu Tuhan ri Musa, “Susubo' i Arun mapatutui ra jujuga' nano ra rasawat ru sungoi, babayaan ru timug am kulam maa' raginio mujak antit am mamapak ra titikop ru tana' ru Misir.”

⁶ Patutuyo' ri Arun jujuga' nano ra rasawat ru timug, ujak boo antit no saboi nokototop ra titikop ru pagun no.

⁷ Kaa' ulun mapandai kaga' ra sihir ru Misir niayuk namakai ra kapandayan mapiot nilo, am nangkinibit ra antit-antit no sabulujak saboi nototop titikop ru pagun.

⁸ Nampiau raja' ri Musa am i Arun am indagu, “Pakiasi' noyo ra Tuhan maa' raginio pusoon No antit-antit ti, am paugaron ku bansa' min, maa' raginio makapapataak ilo ra taak simbalui ra Tuhan.”

⁹ Indagu i Musa ra raja', “Nakatampos aku noyo makiasi' rirun raja'. Aruo' noyo paat no am makiasi' aku rirun raja', pagawai muno am mamagun muno. Palabuson kou raja' intor ra antit-antit no, am kolondo' boo soroi ondo' ayuk am antit ondo' soroi ralalom ru Sungoi Nil.”

¹⁰ Taam raja' no, “Pakiasi' noyo ra bala kuno ra susuab no.” Indagu i Musa, “Makiasi' aku koson ra kitaak muno raja', am makapandai kou raja' boo ra kolondo' koson ra Tuhan i Aki Kapuuno' mai.

¹¹ Antit-antit no painggaluron intor rirun raja', baloi muno, pagawai muno am mamagun muno. Kolondo' boo antit soroi ondo' ayuk am soroi ralalom ru Sungoi Nil.”

¹² Iruani' boo ri Musa am i Arun raja' no. Nakiasi' i Musa ra Tuhan koson mamuso ra antit no ondo' pinaratong Nano ra raja'.

¹³ Sinugut ru Tuhan kitaak ri Musa am antit ralalom baloi, giu' ra liliut am giu' ra umo, minatoi ngaangai'.

¹⁴ Timungo' ru ulun ru Misir baangkai ru antit no saboi paribujuk, saboi mootong titikop ru pagun.

¹⁵ Paat ra nakito ru raja' ra minatoi noyo ngaangai' antit, bambalingatan saguli' raja'. Marara' raja' mangining ra ragu ri Musa am i Arun koson ra rinagu ru Tuhan.

Pulias

¹⁶ Indagu Tuhan ri Musa, “Susubo' i Arun mapalamba' ra tana' no ra jujuga' nano, am makulau boo kaau sumauk ra pulias ra titikop ru pagun ru Misir.”

¹⁷ Ginio ra lambaa' ri Arun tana' ra jujuga' nano, am kaau ra titikop ru pagun ru Misir nakulau nasauk ra pulias ondo' muroom ra ulun am bibiag.

¹⁸ Ulun mapandai kaga' ra sihir no kuminam mamakai ra kapandayan ru sihir nilo koson mapasalula' ra pulias kaa' kalo naalap nilo. Pulias soroi ra ngaangai' intok.

¹⁹ Indagu ulun mapandai kaga' ra sihir no ra raja', “Binaal gitio ri Aki Kapuuno'!” Kaa' lakat poyo bambalingatan raja' am marara' mangining ra ragu ri Musa am i Arun, koson ra rinagu ru Tuhan.

Bulongor

²⁰ Indagu Tuhan ri Musa, “Ongoi noyo tuum ra raja' rumondom ra susuab no paat ra io mongoi ra sungoi. Balai' io ra indagu Tuhan, ‘Paugaro' noyo ulun Kuno mongoi sambayang Raki'.

²¹ Amon ru marara' kou, maparatong Aku ra bulongor rirun, pagawai muno am mamagun muno. Baloi-baloi ru ulun ru Misir, am poyo titikop ru pagun matikop ra bulongor.

²² Kalo mapatiu' Aku ra tampilon Gosyin intok inayanan ru ulun Kuno. Kolondo' bulongor ra giu' no. Mambaal Aku ra baal ragitio maa' raginio makapandai kou ra Aku, Tuhan, makakuasa' ra pagun ti.

²³ Pansalaan Ku popolos ru ulun Kuno am mamagun muno. Kaimuagan ti masauk ra orou susuab no.’ ”

²⁴ Naparatong Tuhan ra masuang kaga' bulongor minongoi ra istana raja' am baloi ru pagawai nano. Titikop ru pagun ru Misir naimbolo' kaga' sabap ra bulongor no.

²⁵ Pampiau boo raja' ri Musa am i Arun am indagu, “Ongoi noyo papataak ra taak simbalui ri Aki Kapuuno' mino ra pagun ti.”

²⁶ Kaa' taam i Musa, “Kalo makapambaal akai ra ngaangai' raginio, sabap ra manginalu ulun ru Misir paat ra makakito ramon mapataak ra bibiag koson taak simbalui ra Tuhan i Aki Kapuuno' mai. Amon ru mamakai akai ra bibiag ondo' maparuol ra guang nilo, bobolon nilo akai ra batu saboi matoi.

²⁷ Musiti' akai mongoi ra tana' kaagisan galur no talu ngoorou pangkiralanan koson mapataak ra taak simbalui ra Tuhan i Aki Kapuuno' mai, koson ra nanusuban Nali.”

²⁸ Indagu raja', “Mapaugar aku ramuyun mongoi ra tana' kaagisan koson mapataak ra taak simbalui ra Tuhan i Aki Kapuuno' min, ru kalo mongoi kau ra maalur kaga'. Pakiasi' noyo raki'.”

²⁹ Taam i Musa, “Makaugar aku ayuk, makiasi' aku ra Tuhan maa' raginio susuab no bulongor no magiru' intor rirun raja', pagawai muno am mamagun muno. Kaa' pai' boo pamparuung ramon, am pai' ingai' ulun ru Israil mongoi koson mapataak ra taak simbalui ra Tuhan.”

³⁰ Iruani' ri Musa raja' no am pakiasi' ra Tuhan.

³¹ Sinugut ru Tuhan pakiasian ri Musa. Nagiru' bulongor no intor ra raja', pagawai nano am mamagun nano; kolondo' sanginan pana natatang.

³² Kaa' raino ti pana bambalingatan raja' am marara' mapaugar ra bansa' no.