KAINGKUALAN 7 - Tanou Moonsoi Timugon

¹ Indagu Tuhan ri Musa, “Iningo' noyo, mapasauk Aku rirun koson ri Aki Kapuuno' ra saang ru raja', am i Arun, pongkotob muno mindagu riso koson ra nabi muno.

² Balai' i Arun ra ngaangai' ondo' nanusuban Kuno rirun. Susubo' noyo io mambala' ra raja' maa' raginio mangiou ra ulun ru Israil manatang ra pagun nati.

³ Kaa' mangkinibit Aku ra raja' no bambalingatan, am kalo mangining ra ondo' raguon muno, kabalu' pana maparatong Aku ra masuang karaat ra Misir.

⁴ Mangukum Aku boo ra pagun no ra makalalaa', am magibit ra ulun Kuno Israil mingkual intor ra Misir.

⁵ Makapandai boo ulun ru Misir ra Aku noyo Tuhan paat ra Aku mangukum risilo am magibit ra ulun ru Israil mingkual intor ra pagun ru Misir.”

⁶ Nambaal i Musa am i Arun ra nanusuban ru Tuhan.

⁷ Umur ri Musa 80 ngambilor am i Arun 83 ngambilor paat ra ilo timinuum ra raja' ru Misir.

Jujuga' ri Arun

⁸ Indagu Tuhan ri Musa am i Arun,

⁹ “Amon ru makitaak raja' no ramuyun mambaal ra kaimuagan koson ra inono', susubo' i Arun mangalap ra jujuga' nano am patirin ra saang ru raja'. Makulau jujuga' no sumauk ra kukuo.”

¹⁰ Ginio ra ongoi i Musa am i Arun tuum ra raja' am pambaal ra kaimuagan koson ra nanusuban ru Tuhan. Papatiro' ri Arun jujuga' nano ra saang ru raja' am pagawai nano, am nakulau boo jujuga' no nasauk ra kukuo.

¹¹ Kopongo raginio pampiau raja' no ra ulun makakapandayan am ulun mapandai kaga' ra sihir, am ra kapandayan ra sihir, nambaal ilo ra baal nogondo'.

¹² Papatiro' nilo jujuga' nilo, nakulau jujuga' no nasauk ra kukuo. Kaa' jujuga' ri Arun nonolon ra jujuga' nilono.

¹³ Kaa' bambalingatan noyo raja' am marara' mangining ra ragu ri Musa am i Arun, koson ra rinagu noyo ru Tuhan.

Nalumpa' Misir ra karaat Raraa'

¹⁴ Kopongo raginio indagu boo Tuhan ri Musa, “Bambalingatan kaga' raja', Kalo mapaugar io ra ulun ru Israil.

¹⁵ Ginio ra ongoi noyo tuum ra raja' tampilon ra susuab ti, paat ra io tumuun ra Sungoi Nil. Ibito' noyo jujuga' ondo' igondo' nakulau nasauk ra kukuo, am inaani' io ra kiing ru sungoi.

¹⁶ Ragui' raja' no, ‘Tuhan i Aki Kapuuno' ru ulun ru Ibrani nanusub raki' koson mapasaboi ra bala' Nano rirun raja' maa' raginio mangiou kou ra ulun Nano mongoi sambayang Riso giu' ra tana' kaagisan. Kaa' saboi raino, okou raja' lakat poyo marara' mangining ra bala' no.

¹⁷ Ginio ra indagu Tuhan ra makapandai kou raja' ra osoi Tuhan no intor ra atan ondo' binaal Nano. Ilai' noyo, lambaan ku timug ru sungoi ra jujuga' ti, am makulau timug no sumauk ra raraa'.

¹⁸ Matoi papait, am masauk sungoi ti ra mootong kaga' saboi kalo mainum timug no ru ulun ru Misir.’ ”

¹⁹ Indagu Tuhan ri Musa, “Susubo' i Arun mangalap ra jujuga' nano am patutuyo' ra rasawat ru ngaangai' sungoi, babayaan ru timug am kulam ra Misir. Makulau timug sumauk ra raraa', am titikop ru pagun pana makararaa', kaa' niayuk ralalom ru tuung tataun am rarapu' batu.”

²⁰ Baalo' boo ri Musa am i Arun nanusuban ru Tuhan. Giu' ra saang ru raja' am pagawai nano, kakato' ri Arun jujuga' nano am palambaa' ra timug ru Sungoi Nil. Kulau boo timug ru sungoi no sumauk ra raraa'.

²¹ Patoi papait-papait ralalom ru sungoi no, am mootong kaga' owou no saboi timug ru sungoi no kalo mainum ru ulun ru Misir. Titikop pagun ru Misir makararaa'.

²² Kopongo raginio ulun-ulun mapandai kaga' ra sihir ra pagun ru Misir nambaal niayuk ra baal koson raginio ra kapandayan nilo, saboi bambalingatan noyo raja'. Koson ra rinagu ru Tuhan, marara' raja' mangining ra ragu ri Musa am i Arun.

²³ Kaa' uli' raja' ra istana nano ra kalo noyo nampalio ra baal ondo' nasauk no.

²⁴ Nangkali ngaangai' ulun ru Misir ra luang giu' ra galur ru kiing Sungoi Nil koson makaalap ra timug inumon, sabap ra timug ru sungoi no kalo mainum nilo.

²⁵ Nasailan noyo tulu' ngoorou intor ra kinulau ru Tuhan timug ru sungoi no nasauk ra raraa'.