KAINGKUALAN 40 - Tanou Moonsoi Timugon

Mambaal am patimpokon ra Kim ru Tuhan

¹ Indagu Tuhan ri Musa,

² “Paat ra orou kasaa' ra sila' kasaa', baalo' min Kim Kuno.

³ Pabantaa' Kaban Nabantuan ondo' makasuang Mopor Ukum ralalom Kim no am tabirin ra tabir giu' ra saang ru Kaban.

⁴ Ibito' mija' ra ralalom am pabantaa' kuliamos ra rasawat ru mija' no. Ibito' niayuk tampakan ra lampung am pabantaa' lampung ra rasawat no.

⁵ Pabantaa' altar mas intok panalaban ra kaminyan ra saang ru Kaban Nabantuan, am patairo' tabir giu' ra kulobon umpasan ra Kim.

⁶ Pabantaa' altar intok monolob ra taak simbalui ra saang ru Kim.

⁷ Pabantaa' bisin ra lolot ru Kim am altar, am suangi' bisin no ra timug.

⁸ Patakino' insor ra liput ru Kim am patairo' tabir giu' ra kulobon ru insor.

⁹ Mopongo raginio patimpokon Kim no am ngaangai' kuliamos no ra luitin ra umau upacara, am masauk Kim no ra matulai.

¹⁰ Mopongo raginio patimpokon altar am ngaangai' kuliamos no ra luitin ra umau upacara, am ngaangai' no masauk ra totopot matulai.

¹¹ Patimpokon niayuk bisin ru timug am antulan no ra nogondo' ralan no.

¹² Mopongo raginio ibiton boo i Arun am anak-anak nano mongoi ra kulobon ru Kim ru Tuhan, am baalon upacara mariu' risilo.

¹³ Pambayangon i Arun ra bayang ru imam am luitin io ra umau. Ralan ragitio patimpokon io maa' raginio mangandoi io Raki' koson ra imam.

¹⁴ Susubon anak-anak ri Arun no minggaar, am pambayangon ilo ra bayang maawar.

¹⁵ Mopongo raginio luitin ilo ra umau, koson ra okou napaluit ra ama' nilo ra umau, maa' raginio mangandoi Raki' koson ra imam. Upacara mapaluit ra umau no mapasauk ra bansa' nilo ra imam saboi ra papag ka papag.”

¹⁶ Baalo' ngaangai' no ri Musa koson ra nanusuban ru Tuhan riso.

¹⁷ Ginio ra orou kasaa' ra bulan kasaa', bilor karuo kalupus ilo nangiruan ra Misir, binaal Kim ru Tuhan.

¹⁸ Pabantaa' ri Musa antulan no, nanirong ra rangka no, napatunggul ra baak no am nopotolorog ra lugu'-lugu' no.

¹⁹ Bingkalo' no panaub ra Kim ru Tuhan, am taubi' no ra panaub ra bokon, koson ra nanusuban ru Tuhan.

²⁰ Kopongo raginio alapo' ri Musa ruo batu pamatikan no am pabantaa' no ra Kaban Nabantuan. Pasulungo' no tataun bandasan ru Kaban ra golong no, am taubi' no Kaban no ra panaub no.

²¹ Pabantaa' no Kaban no ralalom Kim ru Tuhan am patairo' tabir panili ra saang ru Kaban Nabantuan, koson ra nanusuban ru Tuhan riso.

²² Pabantaa' no mija' ralalom Kim ru Tuhan, tampilon ralayo, tampilon liwar ru tabir no,

²³ am pabantaa' ruti' ondo' pataakon ra Tuhan ra rasawat ru mija' no, koson ra nanusuban ru Tuhan.

²⁴ Pabantaa' ri Musa tampakan ra lampung ralalom Kim ru Tuhan, tampilon rabugus, natingkuang ra mija' no.

²⁵ Giu' no, ra saang ru Tuhan no, sikiti' no lampung no, koson ra nanusuban ru Tuhan.

²⁶ Pabantaa' no altar mas ralalom Kim ru Tuhan, ra saang ru tabir,

²⁷ am solobo' no kaminyan ondo' maamis owou, koson ra nanusuban ru Tuhan.

²⁸ Patairo' no tabir ra kulobon umpasan ra Kim ru Tuhan,

²⁹ am giu' no, ra saang ru tabir no, pabantaa' no altar panalaban ra taak simbalui. Rasawat ru altar no papataak io ra taak simbalui koson mapabansuk ra guang ru Tuhan, am taak simbalui koson maringkuanang ra Tuhan, koson ra nanusuban ru Tuhan.

³⁰ Pabantaa' no bisin ra lolot ru kim am altar, am suangi' ra timug.

³¹ Nambagu' i Musa, i Arun am anak-anak nano ra kalindu' am kalayam ra giu' no,

³² sasanggilan ayuk ilo mumpos ralalom Kim ru Tuhan kapoam minggaar ra altar, koson ra nanusuban ru Tuhan.

³³ Patakino' ri Musa insor ra liput ru Kim ru Tuhan am altar no, am niayuk patairo' tabir ra kulobon ru insor. Koson raginio noyo pinongo ri Musa ngaangai' kandoi raginio.

Manili gaun ra Kim ru Tuhan

³⁴ Kopongo raginio tuun boo gaun manili ra Kim ru Tuhan, am natikop Kim no ra sinda ratangan ru Tuhan.

³⁵ Ginio sabap ra, kalo makaumpos i Musa ralalom Kim ru Tuhan.

³⁶ Pabandingon ru ulun ru Israil pangkiman nilo ra intok bokon paat ra gaun no minsawat ayuk intor rasawat ru Kim ru Tuhan.

³⁷ Buoi ru gaun no kalo minsawat, kalo pabandingon nilo pangkiman nilo.

³⁸ Buoi ru ulun ru Israil timinanggau, makito nilo gaun ru Tuhan rasawat ru Kim no ra matawang ti, am bibilak apui ralalom ru gaun no ra rondom ti.