KAINGKUALAN 37 - Tanou Moonsoi Timugon

Mambaal ra Kaban Nabantuan

¹ Pambaal i Bijalil ra Kaban Nabantuan intor ra tataun akasia makagawar 110 ngasintimito, makapila' 66 ngasintimito, am makasawat 66 ngasintimito.

² Angkupi' no ra mas kopoyo tampilon ra ralalom am liwar no am baali' liput no ra bingkai mas.

³ Pambaal io ra apat golong mas ra tataun bandasan no am patakino' golong no ra kaapat-apat pisuk ru Kaban no, ruo golong ra sapapa' am ruo golong poyo ra sapapa'.

⁴ Pambaal io ra tataun bandasan intor ra tataun akasia am angkupi' no ra mas.

⁵ Pasulungo' no tataun bandasan no ralalom ru golong no ra moonong sapapa' ru Kaban.

⁶ Pambaal io rondo' panaub intor ra mas kopoyo makagawar 110 ngasintimito am makapila' 66 ngasintimito.

^7-8 Ginio ra karuo-ruo pompor ru panaub no, pambaal io ruo kirub intor ra mas inamar. Pambaal io ra karuo-ruo no nogondo' ra panaub.

⁹ Pinantaluma' kirub no, am pinainduku', am ra kawo ondo' nabingkal koson manaub ra panaub ru Kaban.

Mambaal ra mija' intok ru ruti' ondo' pataakon ri Aki Kapuuno'

¹⁰ Pambaal i Bijalil rondo' mija' intor ra tataun akasia, makagawar 88 ngasintimito, makapila' 44 ngasintimito am makasawat 66 ngasintimito.

¹¹ Angkupi' no ra mas kopoyo am takini' no liput no ra bingkai mas.

¹² Pambaal io kiing no makapila' 7.5 ngasintimito ra liput ru mija' no. Tinakinan kiing no ra bingkai mas ra liput no.

¹³ Pambaal io apat golong mas ra tataun bandasan no am patakino' no ra kaapat-apat pisuk, intok ru lugu' ru mija'.

¹⁴ Golong no koson manungka' ra tataun bandasan ru mija' pinatakin maar ra kiing ru mija'.

¹⁵ Pambaal io ra tataun bandasan no intor ra tataun akasia am angkupi' no ra mas.

¹⁶ Pambaal io niayuk ra piring-piring, sangkir-sangkir, jag-jag, am mangkuk pakayon ra taak ru wain. Binaal ngaangai' kuliamos ru mija' no intor ra mas kopoyo.

Mambaal ra tampakan ra lampung

¹⁷ Pambaal i Bijalil rondo' tampakan ra lampung intor ra mas kopoyo. Pambaal io ra antulan am batang no intor ra mas inamar. Bunga' ra pinabunga' makaaya' pumput am tapi' no binaal pogondoo' ra batang ru lampung no.

¹⁸ Onom ngampango binaal ra batang ru tampakan ra lampung no, talu ngampango ra moonong sapapa' no.

¹⁹ Moonong pango no binungaan ra bunga' kokoson ra talu busak bunga' badam am pumput am tapi' no.

²⁰ Batang ru tampakan ra lampung no binungaan ra apat busak, kokoson ra bunga' badam am pumput am tapi' no.

²¹ Ragana' ru moonong pantaluma' ru pango binaalan ra rondo' pumput.

²² Pumput-pumput, pango-pango am tampakan ra lampung, ngaangai' no binaal intor ra sampila' mas kopoyo inamar.

²³ Pambaal io tulu' lampung ra tampakan ra lampung no; pambaal io niayuk ra sumpit koson pangimpasau ra sumbu' ru lampung, am niayuk talam no intor ra mas kopoyo.

²⁴ Namakai io ra 35 ngakilogram mas kopoyo koson mambaal ra tampakan ra lampung no am ngaangai' kuliamos no.

Mambaal ra altar intok panalaban ra kaminyan

²⁵ Pambaal i Bijalil ra rondo' altar intor ra tataun akasia koson intok panalaban ra kaminyan. Baal ru altar no apat persegi; gawar no 45 ngasintimito, pila' no 45 ngasintimito am sawat no 90 ngasintimito. Sangau ra kaapat-apat pisuk no pogondoon ra altar no.

²⁶ Angkupi' no ra mas kopoyo tampilon rasawat ru altar no, kaapat-apat sapapa' no, am niayuk sangau no, am pambaal io ra bingkai mas ra liput no.

²⁷ Pambaal io niayuk ruo golong mas ragana' ru bingkai mas ra karuo-ruo sapapa' no koson mamiot ra tataun bandasan ru altar no.

²⁸ Pambaal io ra tataun bandasan no intor ra tataun akasia am angkupi' no ra mas.

Mambaal ra umau upacara am kaminyan

²⁹ Pambaal niayuk i Bijalil ra umau upacara ondo' mapasau, am kaminyan kopoyo ondo' maamis owou, ondo' pinaratok koson ra umau maamis owou.