KAINGKUALAN 35 - Tanou Moonsoi Timugon

Aturan ra orou Sabat

¹ Timungo' ri Musa ngaangai' ru ulun ru Israil am indagu risilo, “Gitio noyo susuban ru Tuhan ramuyun:

² Mokoonom ngoorou kau mangandoi, kaa' musiti' karaan orou ra katulu' no ra matulai; orou raginio orou tangusan patimpokon ra Tuhan. Osoi mangandoi paat ra orou raginio musiti' potoyon.

³ Paat ra orou Sabat kalo pampaangon kau ra apui giu' ra baloi min.”

Taak ra pataakon ra Kim ru Tuhan

⁴ Indagu i Musa ra ngaangai' ulun ru Israil, “Gitio noyo ondo' nanusuban ru Tuhan:

⁵ Ibito' taak ra Tuhan. Osoi ondo' moogot mangani' ra taak musiti' mapataak ra mas, pirok kapoam gangsa';

⁶ konoon linon molomos; konoon bulu makabatik motomou, matanggilung am malia'; konoon intor ra bulu kambing;

⁷ kungkung ru domba gawayan ondo' kinalia'; kungkung molomos, tataun akasia;

⁸ umau ru lampung, apa' ru umau upacara am kaminyan maamis owou;

⁹ batu sardis am batu parmata ra bokon ondo' pinatakin ra efod am utau ru Tingganai Maayo Imam.”

Kuliamos ra Kim ru Tuhan

¹⁰ “Ngaangai' mangandoi ra matasik ra popolos min musiti' matong am mambaal ra ngaangai' ondo' nanusuban ru Tuhan:

¹¹ Kim ru Tuhan, am niayuk taap am panaub ra taap, papakaitan am tulang nano, lantakan ru taap, lugu' ru kulobon am antulan no;

¹² Kaban Nabantuan am tataun bandasan no, panaub no am tabir ondo' panili no;

¹³ mija' am tataun bandasan no am ngaangai' kuliamos no; ruti' ondo' pataakon ri Aki Kapuuno';

¹⁴ tampakan ra lampung koson mampasinda am kuliamos no; lampung-lampung am umau;

¹⁵ altar panalaban ra kaminyan am tataun bandasan no; umau upacara; kaminyan ondo' maamis owou; tabir ru kulobon umpasan ra Kim ru Tuhan;

¹⁶ altar panalaban ra taak simbalui, am kekisi gangsa', tataun bandasan am ngaangai' kuliamos no; bisin am antulan no;

¹⁷ tabir ru insor, am niayuk lugu' ru insor am antulan ru lugu'; tabir tayar ru kulobon ru insor;

¹⁸ paku' tataun am tali ra Kim ru Tuhan am insor no;

¹⁹ bayang sambayang ru imam-imam paat ra ilo mangandoi ra Lamin Pansunuran, am bayang timpok ri Imam Arun am anak-anak nano.”

Nagibit ulun ru Israil ra taak

²⁰ Kopongo raginio ungkias ngaangai' ulun ondo' timinimung no,

²¹ am moonong ulun ondo' makaguang magibit ra taak ra Tuhan koson mambaal ra Kim ru Tuhan. Pagibit ilo ra ngaangai' kuliamos ondo' gogoton ra sambayang am koson mambaal ra bayang ru imam.

²² Moonong ulun ondo' masaga' mangani' ra taak, iou ra ungkuyon am niayuk ruandu', matong magibit ra kerongsang, anting-anting, sinsing, sisigot am ngaangai' salinut ru kuliamos intor ra mas am patimpokon boo ngaangai' no ra Tuhan.

²³ Moonong ulun ondo' mokokonoon linon molomos; konoon bulu makabatik motomou, matanggilung am malia'; konoon binaal intor ra bulu kambing; kungkung ru domba gawayan ondo' kinalia'; kapoam kungkung molomos, mapataak ra kuliamos no.

²⁴ Ngaangai' ulun ondo' makapapataak ra pirok kapoam gangsa' magibit ra taak nilo ra Tuhan. Koson niayuk ondo' binaal ru ngaangai' ulun ondo' makatataun akasia ondo' pakayon ra kandoi raginio.

²⁵ Ngaangai' ruandu' ondo' matasik mambaal ra banang, magibit ra banang linon am niayuk banang bulu makabatik motomou, matanggilung am malia' ondo' binaal nilo.

²⁶ Nambaal ilo niayuk ra banang intor ra bulu ru kambing.

²⁷ Tingganai-tingganai nagibit ra batu sardis am batu parmata ra bokon koson patakinon ra efod am utau.

²⁸ Magibit ilo niayuk ra apa' pampagamis ra akanon am umau ru lampung, umau upacara am kaminyan ondo' maamis owou.

²⁹ Ngaangai' ulun ru Israil ondo' moogot am masaga' mangani' ra atan pana, magibit ra taak nilono ra Tuhan koson ra kandoi ondo' nanusuban Nano ri Musa.

Ulun mangatasik mambaal ra Kim ru Tuhan

³⁰ Indagu i Musa ra ulun ru Israil, “Nampili' noyo Tuhan ri Bijalil anak ri Uri, akupu ri Gur intor ra bansa' ru Jiuda.

³¹ Inanian ri Aki Kapuuno' i Bijalil ra kuasa' Nano, am nangani' riso ra katasikan, kinapandai am pangaratian ralalom ngaangai' salinut ru kandoi seni,

³² koson mangatang ra rekabentuk ondo' mompogogot ra katasikan am niayuk mambaal mamakai ra mas, pirok am gangsa';

³³ koson manuyu' ra batu parmata ondo' patakinon; koson mangukir ra tataun, am koson mambaal ra ngaangai' salinut ru kandoi seni ra bokon.

³⁴ Inanian ru Tuhan ra kapandayan i Bijalil am Ogoliab anak ri Agisamak intor ra bansa' ru Dan, koson mangila' ra katasikan nilo ra ulun bokon.

³⁵ Nangani' Io risilo ra katasikan koson mambaal ra ngaangai' salinut ru kandoi ondo' binaal ru mangukir, perekabentuk, am mambaal ra konoon linon molomos, konoon bulu makabatik motomou, matanggilung am malia', am konoon-konoon ra bokon. Nakapambaal ilo ra ngaangai' salinut ru kandoi, am niayuk perekabentuk ra matasik.