KAINGKUALAN 33 - Tanou Moonsoi Timugon

Nanusub Tuhan ra ulun ru Israil mangiruan ra Gunung Sinai

¹ Indagu Tuhan ri Musa, “Iruani' noyo intok ragitio mabaya' ra ulun raginilo ondo' inibit muno miningkual intor ra Misir, am ongoi noyo ra tana' ondo' binantu' Kuli ri Abragam, Isak, Jakub am papag nilo.

² Mangator Aku rondo' malaikat koson maningganai ramuyun. Pagiruon Ku ulun ru Kanaan, Amori, Git, Piris, Giwi am Jibusi.

³ Mongoi kau ra tana' ondo' langkaya' am malabung. Kaa' Aku galama' kalo mongoi mabaya' ramuyun, maa' raginio kalo pusoon Takamin ra tanga' ru ralan, sabap ra ulun bambalingatan kau.”

⁴ Pakaining ulun raginilo ra ragu no, tumalimpuun ilo mangulir am kalo boo nalimpor ra mas,

⁵ sabap ra nanusub Tuhan ri Musa nampasaboi ra ragu Nano ra ulun ru Israil, “Ulun bambalingatan kau. Amon ru maya' Aku ramuyun kabalu' pana sangkinolor ayuk, maaru' pusoon Takamin lingono'. Raino, paguso' limpor mas mino; am aruon Ku ra atan baalon Kuno ramuyun.”

⁶ Ginio sabap ra kairuani' ru ulun ru Israil Gunung Sinai, kalo boo nalimpor ilo.

Kim ru Tuhan

⁷ Sasanggilan ayuk mangkim ulun ru Israil, mangalap i Musa ra Kim am potolorogon no giu' ra liwar ru pangkiman nilo, kalo maalur intor ra pangkiman no. Kim no inggalanin ra Kim ru Tuhan. Osoi ayuk makiila' ra Tuhan mongoi ra Kim no.

⁸ Moonong i Musa mongoi ra Kim no, ngaangai' ulun migor ra kulobon ru kim nilo am magilong ri Musa saboi makaumpos io ra ralalom ru Kim ru Tuhan.

⁹ Makaumpos i Musa, lugu' ru gaun tumuun am muog ra saang ru Kim no, am mindagu Tuhan ri Musa intor ra gaun no.

¹⁰ Makito ayuk ru ulun raginilo lugu' ru gaun giu' ra kulobon ru Kim ru Tuhan, sumamba ilo.

¹¹ Mindagu Tuhan ri Musa ra makapangkito ra bulos, koson ra sasangulun mindagu ra rangan nano. Sumaguli' boo i Musa ra pangkiman, kaa' i Josua anak ri Nun, buayoi ondo' mangindangan ri Musa, soroi ra Kim ru Tuhan.

Nambantu' Tuhan rumondon ra ulun Nano

¹² Indagu i Musa ra Tuhan, “Topot ra nanusub Kou raki' maningganai ra ulun ragitilo mongoi ra tana' ondo' binantu' Muno, kaa' kalo nambala' Kou raki' ra osoi susubon Muno maya' raki'. Minindagu Kou ra makaulig Kou raki' ra matanda' am niayuk maansayan raki'.

¹³ Amon ru topot ginio, pambala' ra inatangan Muno maa' raginio makapangandoi aku Rirun am magulayun mapabansuk ra guang Muno. Karaa' niayuk ra Okou nampili' ra ulun ragitilo masauk ra Okou galama' tatangan.”

¹⁴ Indagu Tuhan, “Maya' Aku rirun, am aniin Tokou ra kaluagan ru pangkaraan.”

¹⁵ Taam i Musa, “Amon ru kalo maya' Kou ramon, pai' akai susubo' mangiruan ra intok ti.

¹⁶ Ati kulaan ulun bokon makapandai ra maansayan Kou ra ulun Muno am aku, amon ru kalo maya' Kou ramon? Saang Muno ra tatanga' mai mapasusuai ramon intor ra bansa' bokon ra tana' ti.”

¹⁷ Indagu Tuhan ri Musa, “Baalon Ku koson ra kitaak muno, sabap ra mauligan Tokou ra matanda' am maansayan Aku rirun.”

¹⁸ Pangitaak boo i Musa, “Iowo' aku magilong ra sinda ru Saang Muno.”

¹⁹ Taam Tuhan, “Mansail Aku ra ngaangai' Katulayan Kuno ra saang muno, liliwa' mindagu ra inggalan Kuno ondo' matulai, iono Tuhan. Mapakito Aku ra ulun pilion Kuno ra asi' am pakimasian.

²⁰ Kalo pakitonon kou ra bulos Kuno, sabap ra kolondo' ulun ondo' magulayun maayag malupus makakito ra bulos Kuno.

²¹ Bigor ra rasawat ru bulur batu ondo' soroi ra sapapa' Kuno.

²² Paat ra mansail sinda ru Saang Kuno, pasubolon Tokou ralalom silot ru bulur batu am manili ra pagilangan muno ra kalindu' Kuno saboi ra Aku makasail.

²³ Kakaton Ku longon Kuno am makito mu bakulung Kuno, kaa' kalo makito bulos Kuno.”