KAINGKUALAN 28 - Tanou Moonsoi Timugon

Bayang ru imam

¹ “Piawo' noyo maayo muno i Arun am anak ungkuyon nano i Nadab, Abigu, Iliajar am i Itamar. Timpokon ilo intor ra popolos ulun ru Israil, maa' raginio mangandoi ilo Raki' koson ra imam.

² Baali' maayo muno i Arun ra bayang ru imam, maa' raginio makito io ra maatang kaga'.

³ Piawo' noyo ngaangai' ulun ondo' aniin Kuno ra kapandayan, am susubo' ilo mambaal ra bayang ri Arun maa' raginio patimpokon io koson mangandoi ayuk Raki' koson ra imam.

⁴ Susubo' ilo mambaal ra utau, efod, sukub, sukub aniin ra sulam, serban am abot. Musiti' ilo mambaal ra bayang ru imam no ra maayo muno i Arun am anak-anak nano maa' raginio makapangandoi ilo ayuk Raki' koson ra imam.

⁵ Musiti' ulun mambaal ra ngaangai' no mamakai ra konoon bulu makabatik motomou, matanggilung am malia', banang mas am niayuk konoon linon molomos.

⁶ Musiti' ilo mambaal ra efod intor ra konoon bulu makabatik motomou, matanggilung am malia', banang mas am niayuk konoon linon molomos ondo' makasulam.

⁷ Ruo tali ru limbawo koson babangkos musiti' pikiton ra kiing ru efod.

⁸ Rondo' abot ondo' tuyuon baalo' intor ra bahan nogondo' ondo' musiti' papikiton ra efod maa' raginio masauk rondo' tayar ra efod.

⁹ Pangalap ruo batu sardis am tulisi' inggalan ru mopor am ruo ngaulun anak ri Jakub ra batu no,

¹⁰ sumugut ra nansunuan ru umur nilo; onom inggalan ra rondo' batu, am onom poyo ra batu ra bokon.

¹¹ Susubo' noyo sangulun tukang batu parmata ondo' mapandai toojo maa' raginio matulisan inggalan ru anak-anak ri Jakub ra ruo batu parmata no. Musiti' no bongkoson batu parmata no ra mas,

¹² am patakinon no ra tali ru limbawo ru efod koson manguakil ra mopor am ruo bansa' ru Israil. Gitio ralan ri Arun magibit ra inggalan nilo ra limbawo nano, maa' raginio Aku Tuhan, magail mangkara' ra ulun Kuno.

¹³ Pambaal noyo ra ruo bingkai mas

¹⁴ am ruo rantai mas kopoyo ondo' pinitol koson ra tali, am patakinon rantai no ra bingkai mas no.”

Utau

¹⁵ “Baali' Imam Maayo ra sampila' utau; pautawon utau no paat ra masaga' makapandai ra kasagaan ri Aki Kapuuno'. Musiti' utau no baalon intor ra bahan ondo' pakayon mambaal ra efod, am niayuk makasulam koson ra efod.

¹⁶ Musiti' utau no apat persegi am purunon ruo, makagawar 22 ngasintimito am pila' no 22 ngasintimito.

¹⁷ Patakinon apat ngambaris ra batu parmata ra utau no. Baris kasaa', patakinon batu dalima', batu topaj am batu garnit;

¹⁸ baris karuo; patakinon batu jamrud, batu nilam am batu berlian;

¹⁹ baris katalu patakinon batu pirus, batu akik am batu kasubung;

²⁰ am baris kaapat patakinon batu biril, batu sardis am batu jaspir. Musiti' ngaangai' parmata no bongkoson ra bingkai mas.

²¹ Musiti' moonong batu parmata no tulisin rondo'-rondo' ra inggalan ru anak-anak ri Jakub ondo' manguakil ra mopor am ruo bansa' Israil.

²² Pambaal noyo ra rantai intor ra mas kopoyo ondo' pinitol koson ra tali ra utau no.

²³ Pambaal niayuk ra ruo golong mas am patakinon ra karuruo pisuk ra rasawat ru utau.

²⁴ Pobongkoson rantai mas no ra ruo golong mas ni.

²⁵ Pobongkoson ruo ra pompor ru rantai ra bokon no ra karuruo bingkai, maa' raginio utau no makatunggul ra tampilon ra saang ru tali ru limbawo ru efod.

²⁶ Pambaal boo ra ruo golong mas am patakinon ra pisuk ragana' ru utau no, kiing ru tayar ralalom ondo' makatiu' ra efod.

²⁷ Pambaal noyo ruo golong mas poyo am patakinon ra tampilon ragana' ra ralimbou ru karuruo tali ru limbawo ru efod, maar ra pinikit am ra sapapa' rasawat ru abot ondo' tinuyu' baalo'.

²⁸ Pobongkoso' golong ru utau no ra golong ru efod ra tali motomou, maa' raginio utau no mokosoroi rasawat ru abot am kalo malakas.

²⁹ “Makasubol i Arun ra Lamin Pansunuran, musiti' io magutau ra ondo' makabatik ra inggalan ru bansa'-bansa' ru Israil, maa' raginio Aku Tuhan, magail mangkara' ra ulun Kuno.

³⁰ Pabulio' Urim am Tumim ralalom ru utau no maa' raginio maibit ri Arun paat ra io matong ra saang Kuno ondo' matulai. Paat ra koson raginio musiti' io magail magutau raginio koson makapandai ra kasagaan Kuno ra ulun ru Israil.”

Bayang ra bokon ru Imam

³¹ “Musiti' sukub ondo' bayangon ragana' ru efod baalon intor ra konoon bulu makabatik motomou.

³² Luang ru liog ra sukub no musiti' igoton ra konoon pita tenunan maa' raginio kalo maluoi marilak.

^33-34 Liput ru kiing tampilon ra ragana', baalin ra bubunga' baal no kawa' ru dalima' intor ra konoon bulu makabatik motomou, matanggilung am malia', pangkiloloton ra lunsing mas.

³⁵ Musiti' bayangon ri Arun sukub no paat ra io mapaugar ra kandoi ru imam. Paat ra io matong ra saang Kuno ra Lamin Pansunuran, kapoam paat ra io mugar intor ra intok no, maining bolos ru lunsing am kalo potoyon io.

³⁶ “Baalo' noyo rondo' bubunga' intor ra mas kopoyo am tulisi' ra ragu, ‘Patimpokon ra Tuhan’ ra bubunga' no.

³⁷ Pobongkoson bubunga' no tampilon ra saang ru serban ra tali motomou.

³⁸ Musiti' pakapiton ri Arun ra rabas nano. Ralan ragitio Aku Tuhan mangapu ra ngaangai' pataakon ondo' taakin ru ulun ru Israil Raki', kabalu' pana nambaal ilo ra kasalaan paat ra mapataak ra taak no.

³⁹ “Bayang maawar ri Arun no musiti' baalon intor ra konoon linon molomos. Pambaal niayuk ra serban intor ra konoon linon molomos am abot ondo' makasulam.

⁴⁰ “Pambaal niayuk ra bayang maawar, abot am sigal ra anak-anak ri Arun no maa' raginio makito ilo ra maatang kaga'.

⁴¹ Pabayangon bayang raginio ri Arun am anak-anak nano. Patimpokon am palilion ilo boo Raki' ra mangumau risilo ra umau jaitun, maa' raginio mangandoi ayuk Raki' koson ra imam.

⁴² Baalin ilo ra saluar mariwa' intor ra konoon linon. Gawar ru saluar no intor ra awak polos ra paa, manili tampilon ra inan ondo' kalo maaya' ilain.

⁴³ Musiti' saluaron ri Arun am anak-anak nano saluar raginio paat ra ilo mumpos ra Kim Kuno, kapoam tumingkuang ra altar koson mangandoi ra imam giu' ra Lamin Pansunuran, maa' raginio kalo matoi ilo mapakito ra tayar ru inan nilo ra kalo maaya' ilain. Gitio noyo aturan inaru' tayar ri Arun am papag nano.”