KAINGKUALAN 27 - Tanou Moonsoi Timugon

Altar

¹ “Baalo' noyo rondo' altar intor ra tataun akasia. Altar no musiti' apat persegi, gawar no 2.2 ngamito, pila' no 2.2 ngamito am sawat no 1.3 ngamito.

² Baalin kaapat-apat pisuk no ra sangau. Musiti' pogondoon ra altar am angkupin ngaangai' no ra gangsa'.

³ Baalo' noyo paliuk ru kaau makaumau, am pambaal niayuk ra panuuk, mangkuk, garapu' am intok ru apui; musiti' ngaangai' ru kuliamos no baalon intor ra gangsa'.

⁴ Baalo' niayuk kekisi intor ra gangsa' am patakinon apat golong gangsa' ra kaapat-apat pisuk.

⁵ Sawat ru kekisi no musiti' malintanga' ra sawat ru altar. Kekisi no musiti' pariliton ra tampilon ragana' ru altar no.

⁶ Baalo' noyo ruo ngantaun ra tataun bandasan intor ra tataun akasia ondo' angkupin ra gangsa'.

⁷ Pasubolon tataun bandasan no ra karuruo sapapa' ru altar paat mamandas ra altar no.

⁸ Baalo' altar no intor ra papan am tampilon ra ralalom no makaluang-luang, sumugut ra inatang ondo' nanuluan Ku rirun rasawat ru gunung ti.”

Insor ru Kim ru Tuhan

⁹ “Baalo' noyo insor ra liputon Kim Kuno. Insor no am konoon maawar intor ra konoon linon molomos. Tampilon rabugus, gawar ru konoon no musiti' 44 ngamito,

¹⁰ antulanin ra ruo ngoopor lugu' gangsa' am ruo ngoopor antulan gangsa' am patakinon sangutan am niayuk tataun intor ra pirok.

¹¹ Baalon koson raginio niayuk tampilon ralayo.

¹² Tampilon kalasaan, gawar ru konoon maawar no 22 ngamito, am mopor ngantaun lugu' am mopor antulan.

¹³ Tampilon sirangon, giu' ra kulobon umpasan, gawar ru konoon no 22 ngamito niayuk.

^14-15 Moonong sapapa' ru kulobon, musiti' tabirin; gawar ru moonong tabir no 6.6 ngamito, am talu ngantaun lugu' am talu antulan.

¹⁶ Kulobon subalan no, musiti' tabirin ra gawar no 9 ngamito; tabir no musiti' baalon intor ra konoon molomos ondo' binaal intor ra bulu makabatik motomou, matanggilung am malia' am niayuk bungain ra sulaman. Tabir ru kulobon no musiti' antulanin ra apat ngantaun lugu' ra apat antulan.

¹⁷ Ngaangai' insor musiti' patunggulon ra rondo' am bokon ra sangutan pirok, kaitan-kaitan no musiti' baalon intor ra pirok am antulan no intor ra gangsa'.

¹⁸ Gawar ru insor no musiti' 44 ngamito, pila' no 22 ngamito am sawat no 2.2 ngamito. Tabir no musiti' baalon intor ra konoon linon molomos am antulan no intor ra gangsa'.

¹⁹ Ngaangai' kuliamos pakayon ralalom ru Kim, am niayuk ngaangai' paku' tataun ru Kim am insor no musiti' baalon intor ra gangsa'.”

Ralan magalung ra lampung

²⁰ “Susubo' noyo ulun ru Israil mangani' rirun ra umau jaitun ondo' moonsoi kaga' tayar ru lampung ti, maa' raginio masikitan lampung no moonong rondom.

²¹ Musiti' i Arun am anak ungkuyon nano magalung ra lampung no ralalom ru Kim Kuno, giu' ra liwar ru tabir ondo' saang ru Kaban Nabantuan. Giu' no, ra saang Kuno, musiti' sikitin lampung no intor ra mai' ti saboi ra susuab ti. Musiti' susuban ragitio gagayaan ra sabuoi-buoi no ru ulun ru Israil am papag nilo.”